1 Chaymanta Espíritu Santoqa Jesusta pusarqa ch'innejman, chaypi Kuraj Supay atispaqa Jesusta juchaman urmachinampaj. 2 Chay ch'innejpi Jesusqa tawa chunka p'unchayta, tawa chunka tutatawan mana mikhusqa kaspa, yarqhachikorqa. 3 Chaypacha Kuraj Supay qayllaykorqa Jesusta juchaman urmachiyta munaspa, nerqataj: Diospa Churinchus kanki chayqa, niy kay rumista t'antaman tukunankuta, nispa. 4 Chantá Jesús kuticherqa: Diosmanta Qhelqasqapi nin: Mana t'antallawanchu runaqa kawsanqa; astawanqa, Diospa siminmanta tukuy llojsimoj nisqaswan kawsanqa, nispa. 5 Chaymanta, Kuraj Supayqa Jerusalén llajtamanñataj Jesusta pusaspa, Temploj torren patapi rikhuricherqa. 6 Nerqataj: Diospa Churinchus kanki chayqa, uraman wijch'uykukuy, imaraykuchus Diosmanta Qhelqasqapi nin: Diosqa angelesninta kachamusonqa makisninkuwan jap'isunankupaj, chakiykita ama rumiman takakunaykipaj, nispa. 7 Jesustajrí kuticherqa: Qhelqasqallataj kashan: Señor Diosniykita ama pruebaman churankichu, nispa. 8 Ujtawan Kuraj Supay pusarqa Jesusta jatun orqo pataman. Chaymantataj tukuy kay pachantimpi kaj llajtasta, qhapaj kapuyninkutawan ima rikuchispa, 9 Jesusta nerqa: Noqa kay tukuy imata qosqayki, qonqorikuspachus yupaychawanki chayqa, nispa. 10 Chaypacha Jesús kuticherqa: Riy kaymanta, Satanás. Diosmanta Qhelqasqapi nin: Señor Diosniykita yupaychanki, Pay sapallantataj sirvinki, nispa. 11 Chantá Kuraj Supay riporqa, angelestaj jamuspa, mikhuyta jaywarqanku. 12 Jesusqa Juan Bautista preso kasqanta uyarispa, Galileaman rerqa. 13 Nazaretta saqespa, Capernaum llajtaman tiyakoj riporqa. Chay llajtaqa Galilea Qocha kantupi karqa, Zabulón jallp'asnejpi, Neftalijpapiwan. 14 Chay karqa profeta Isaiaspa nisqan junt'akunampaj: 15 Zabulonpa, Neftalijpa jallp'asnin, Jatun Qochaman rej ñan, Jordán Mayoj chimpan; Galilea jallp'a, maypichus mana judío kajkuna tiyakunku, chay. 16 Laqhapi tiyakoj runas rikorqanku uj jatun k'anchayta. Wañuy llanthu cheqapi tiyakojkunamampis uj k'anchay lliphipimorqa, nispa. 17 Chaymantapacha Jesús kay jinata willarayta qallarerqa: Diosman kutirikuychej, imaraykuchus janaj pacha reinoqa qayllaykamunña, nispa. 18 Jesusqa Galilea Qocha kantunta rishaspa, iskay wawqesta rikorqa. Ujnin karqa Simón, Pedro sutiyoj, ujnintaj Andrés. Paykunaqa challwiris kaspa, challwa jap'ina ch'ipata jatun qochaman wijch'uykusharqanku. 19 Jesustaj paykunata nerqa: Jamuychej qhepayta, Noqataj runa jap'ej challwirista ruwasqaykichej, nispa. 20 Paykunataj chay ratopacha ch'ipasninkuta saqerpayaspa, Jesuspa qhepanta rerqanku. 21 Astawan ñawpajman rispaqa, iskay wawqestawan rikullarqataj: Santiagota, Juantawan. Paykunaqa karqanku Zebedeoj churisnin. Uj botepi kasharqanku Zebedeo tatankuwan, challwa jap'ina ch'ipasninkuta t'irispa. Paykunatapis Jesusqa wajyallarqataj. 22 Chay ratopachataj boteta, tatankutawan saqerpayaspa, Jesuspa qhepanta rillarqankutaj. 23 Jesús muyumorqa tukuynin Galileata, yachachispa sinagogasninkupi, willaraspataj reinoj evangelionmanta. Llajtapitaj runasta sanoyacherqa tukuy laya onqoykunamanta, nanaykunamantawan. 24 Chantá tukuy Siria jallp'api Jesús atiyniyoj kasqanta uyarispa, runasqa pusamorqanku tukuy laya onqoykunawan, ñak'ariykunawan, nanaykunawan ima kajkunata, supayniyojkunata, t'uku onqoyniyojkunata, suchusta ima. Chantá Jesusqa paykunata sanoyaracherqa. 25 Ashkha runastaj Jesuspa qhepanta risharqanku Galileamanta, Decapolismanta, Jerusalenmanta, Judeamanta, Jordán Mayoj chimpanmanta ima.
