MATEO 27

1Sut'iyamojtenqa, kuraj kaj sacerdotes, judiospa kuraj runasnin ima juntapi tantakuspa, yachachinakorqanku Jesusta wañuchichinankupaj. 2Chantá Jesusta makisnin watasqata pusaspa, kamachej Pilatoman jaywaykorqanku. 3Chantá jap'ichej Judasqa Jesusta wañunampaj juchachasqata rikuspa, sonqonta nanachikorqa. Kinsa chunka qolqetataj kutichiporqa kuraj kaj sacerdotesman, kuraj runasman ima. 4Nerqataj: Juchallini mana juchayojta wañuyman jaywaspa, nispa. Paykunatajrí nerqanku: Ima dakuwayku chaymantari? Qan chaytaqa imanaypis, nispa. 5Chantá Judasqa Templo ukhupi qolqeta qhallirparispa, llojsiporqa. Riytawantaj, sipikamorqa. 6Kuraj sacerdotesqa chay qolqeta oqharispa, nerqanku: Kay qolqetaqa mana atisunmanchu ofrenda qolqetawan khuska waqaychayta, imaraykuchus kay qolqeqa yawarpa precion, nispa. 7Chantá paykunapura parlanakuspa, manka llut'ajpa jallp'anta chay qolqewan ranterqanku, forasterosta chayman p'ampanankupaj. 8Chayrayku chay jallp'aqa kunankama, Yawar Jallp'a sutiyoj kashan. 9Ajina junt'akorqa profeta Jeremiaspa nisqan: Kinsa chunka qolqeta jap'erqanku; chay preciotaqa Payman Israelpa wakin churisnin churarqanku. 10Chay qolqewantaj, manka llut'ajpa jallp'anta ranterqanku, Señor kamachiwasqanman jina. 11Pilatoj ñawpaqenman Jesusta pusajtinku, Pilato Payta taporqa: Qanchu judiospa reynin kanki? nispa. Jesustaj kuticherqa: Arí, qan chayta ninki, nispa. 12Kuraj kaj sacerdotes, judiospa kurajninkunawan Jesusta ch'ataykushajtinku, Pay mana imatapis kutichikorqachu. 13Chayrayku Pilato taporqa: Manachu uyarinki Qampa contraykita tukuy imaymanata nisqankuta? nispa. 14Jesustajrí mana uj simillatapis kutichikorqachu, chaymantataj Pilatoqa mayta t'ukorqa. 15Kuraj kamachejkunaj usunkuman jina, sapa Pascua fiestapi, kamachejqa uj presota kacharichej, pitachus runas munaj kanku, chayta. 16Chaypachataj, uj uyarisqa sajra runa Barrabás sutiyoj, carcelpi wisq'asqa kasharqa. 17Jinapi Pilatoqa tantasqa runasta taporqa: Pitataj munankichej kacharichinayta: Barrabastachu, chayrí Cristo nisqa Jesustachu? nispa. 18Pay yacharqa kurajkuna chhoqonakuspalla Jesusta payman jaywaykusqankuta. 19Chantá Pilato juzganampaj kashajtin, warmin nichimorqa: Ama imatapis ruwaychu chay cheqan kaj runawanqa. Payrayku kunan ch'isi mancharikuna jinata mosqokorqani, nispa. 20Jinapi kuraj sacerdotes, kurajkunawan ima runasman yachaykucherqanku mañanankuta Barrabasta kacharichinanta, Jesustataj wañuchichinanta. 21Pilatotaj taporqa: Mayqentataj kacharichinayta munankichej? nispa. Paykunataj kuticherqanku: Barrabasta, nispa. 22Paytaj nerqa: Imanasajtaj Cristo nisqa Jesuswanri? nispa. Tukuyninkutaj qhaparerqanku: Cruzpi chakatasqa kachun, nispa. 23Pilato nillarqataj: Imarayku ari? Ima sajratataj ruwarqari? nispa. Paykunarí aswan sinch'itaraj qhaparerqanku: Cruzpi chakatasqa kachun, nispa. 24Chaypacha Pilatoqa astawan ch'ajwa jatarisqanta rikuspa, mana imanayta atispataj, yakuta apachimorqa, runaspa ñawpaqempitaj makisninta mayllakorqa. Chantá nerqa: Mana noqaqa juchayojchu kani kay cheqan runaj wañuyninmanta; qankuna juchayoj kankichej, nispa. 25Runastaj kuticherqanku: Noqayku, wawasniykuwan ima cuentayoj kasqayku Paypa wañuyninmanta, nispa. 26Chantá Pilatoqa Barrabasta kacharicherqa, Jesustataj jasut'ichispa, cruzpi chakatasqa kanampaj jaywaykorqa. 27Chaymanta, Pilatoj soldadosnin Jesusta pusarqanku kamachina wasiman, Paytataj muyuykorqanku. 28P'achasninta lluch'uspa, uj puka p'achata churaykorqanku. 29Umanmantaj uj simp'asqa khishka pilluta churaykorqanku, paña makinmantaj uj soqoso k'aspita. Chantá ñawpaqenman qonqoriykukuspa, mayta alqochakorqanku: Kawsachun, judiospa reynin, nispa. 30Payman thoqaykuspataj, soqoso k'aspiwan umampi wajtarqanku. 31Ajinata alqochakuytawan, puka p'achata lluch'uspa, p'achanta churaykaporqanku. Chaymantataj Payta pusarqanku cruzman chakatanankupaj. 32Llajtamanta llojsishaspa, tinkukorqanku Cirene llajtamanta Simón sutiyoj runawan, Jesuspa cruznintataj munajta mana munajta paywan lijracherqanku. 33Chantá chayarqanku Gólgota nisqa orqoman; chay niyta munan: T'ojlu pata. 34Chaypitaj vinagreta, jayaq'etawan chajruykuspa, Jesusman jaywarqanku; Jesustajrí llamirispa, mana ujyayta munarqachu. 35Jinapi Jesusta cruzpi chakataytawan, soldadosqa suerteta choqaspa, Jesuspa p'achasninta rak'inakorqanku, profetaj kay nisqanman jina: P'achasniyta rak'inakorqanku suerteta choqaspa, nispa. 36Chay soldadostaj chaypi tiyaspa, qhawasharqanku. 37Cruzpi, uman patanejman uj qhelqasqata churarqanku, imamantachus juchachasqankuta: Kayqa Jesús, Judiospa Reynin, nispa. 38Chaypacha, Jesustawan khuska chakatallarqankutaj iskay suwastapis, ujninta pañanman, ujnintataj lloq'enman. 39Chaynejta purejkunataj umankuta khiwirispa, mayta Paypaj rimarqanku. 40Nerqankutaj: Qan Templota urmachej, kinsa p'unchaypitaj sayarichej; Qan kikiykita kacharichikuy. Diospa Churinchus kanki chayqa, urayk'amuy chay cruzmanta, nispa. 41Ajinallatataj, kuraj sacerdotespis alqochakorqanku, leymanta yachachejkunawan, fariseoswan, kuraj runaswan ima, nerqankutaj: 42Wajkunata salvarqa, Pay kikintajrí mana salvakuyta atinchu. Payqa Israelpa reynin; kunampacha cruzmanta urayk'amuchun, Paypitaj creesunchej. 43Diospi atienekorqa; kunanqa Dios Payta kacharichichun ari, sichus Payta munakun chayqa, imaraykuchus Pay nerqa: Diospa Churin kani, nispa. 44Kikillantataj nerqanku, Paywan khuska cruzpi chakatasqa kasharqanku, chay suwaspis. 45Chaypacha tukuynin jallp'api laqhayaykorqa, chawpi p'unchaymanta samay horakama. 46Chaypacha Jesusqa sinch'ita qhaparerqa: Eloi, Eloi, lema sabactani? nispa. Chay niyta munan: Diosníy, Diosníy, imaraykutaj saqerpariwankiri? nispa. 47Wakin chaypi kashajkunataj chayta uyarispa, nerqanku: Kay runaqa Eliasta wajyakushan, nispa. 48Ujnintaj usqhay usqhayta phinkispa, soqoso k'aspiman esponjata wataykuytawan, vinagreman chhapuykorqa, Jesusmantaj jaywarqa ujyanampaj. 49Wakintaj nerqanku: Saqey; qhawasunchej, ichachus Elías jamuspa kacharichenqa, nispa. 50Chantá ujtawan sinch'ita qhaparispa, Jesús wañuporqa. 51Chay ratopachataj, Temploj velo nisqa cortinan iskayman llik'irparikorqa patamanta urakama. Jallp'ataj sinch'ita ikhakorqa, chhankaspis phatararqanku. 52Aya p'ampanas kicharikorqanku, Diospa ashkha ajllasqasnintaj wañusqasmanta kawsarimorqanku. 53Paykunataj maypichus p'ampasqa kasqankumanta llojsispa, Jesús kawsarimpusqanmantaña, Diospa ajllakusqan llajta Jerusalenman yaykorqanku; chaypitaj ashkha runasman rikhurerqanku. 54Jesusta qhawasharqanku, chay capitanwan, soldadoswan imaqa jallp'ata ikhakojta, chay waj imastawan rikuspa, maytapuni mancharerqanku, nerqankutaj: Cheqapuni kay runaqa Diospa Churin kasqa, nispa. 55Chaypeqa ashkha warmis kasharqanku karullamanta qhawaspa; paykunaqa jamusqanku Galileamantapacha Jesusta yanapaspa. 56Chay warmis ukhupitaj kasharqanku María Magdalena, Santiagojta, Josejpatawan mamanku María, Zebedeoj churisnimpa mamanku ima. 57Ch'isiyaykushajtin chayamorqa uj qhapaj runa José sutiyoj, Arimatea llajtayoj. Paypis Jesuspa ujnin yachachisqallantaj karqa. 58Jinapi payqa Pilatoman qayllaykuspa, Jesuspa ayanta mañarqa. Pilatotaj kamacherqa ayata qonankuta. 59Chantá Joseqa ayata oqhariytawan, uj yuraj llimphu qhatanawan mayt'uykorqa. 60Chaymantataj, chhankapi ruwasqa mosoj aya p'ampanaman churaykorqa, mayqentachus José paypaj ruwachikusqa, chayman. Jatun rumiwan punkunta wisq'aykuspataj, riporqa. 61Chay aya p'ampanaj ñawpaqempi tiyasharqanku María Magdalena, chay waj Mariawan ima. 62Q'ayantin, Pascua fiestapaj wakichina p'unchaypa qhepan kaj p'unchaypi kuraj sacerdotes, fariseos ima Pilatoman rerqanku. 63Paymantaj nerqanku: Wiraqochi, yuyarikuyku jaqay ch'awka runa kawsashaspallaraj nisqanta: Kinsa p'unchaymanta kawsarimpusaj, nispa. 64Chayrayku kamachiy ari, kinsa p'unchaykama allinta chay, maypichus p'ampasqa kashan, chayta qhawanankuta, ama yachachisqasnin jamuspa ayanta suwanankupaj. Chantá runasman ninkuman: Wañusqakunamanta kawsarimpun, nispa. Jinapeqa, chay qhepa ch'awkeyay aswan jatun kanman ñawpajmanta nisqaqa. 65Pilatoqa nerqa paykunaman: Kay soldadosta qhawanankupaj pusaychej, sumajta waqaychaykuspa qhawanankupaj, nispa. 66Paykunataj rispa, chay aya p'ampanata sumajta wisq'aykorqanku, rumita sellaykuspataj, soldadosta qhawanankupaj churarqanku.

will be added

X\