1 Chantá, janaj pacha reinoqa rijch'akun chunka sipaskunaman. Paykunaqa k'anchanasninkuta oqharikuspa, casarakojta taripaj risqanku. 2 Phishqa sipaskuna mana yuyayniyoj kasqanku, phishqataj yuyayniyoj. 3 Chay mana yuyayniyoj sipaskunaqa k'anchanasninkuta oqharispa, mana aceiteta apakusqankuchu. 4 Yuyayniyojkunarí yurusninkupi, k'anchanasninkupi ima aceiteta apakusqanku. 5 Casarakoj mana usqhayta chayamojtintaj, tukuyninku puñuywan atichikuspa, puñurparisqanku. 6 Chawpi tutata uj qhapariy uyarikusqa: Casarakoj runa chayamushanña; taripamuychej ari, nispa. 7 Tukuynin sipaskunataj jatariytawan, k'anchanasninkuta wakichisqanku. 8 Jinapi mana yuyayniyojkunaqa nisqanku yuyayniyojkunaman: Qoriwayku uj chhika aceiteta, imaraykuchus k'anchanasniyku wañupushankuña, nispa. 9 Yuyayniyojkunatajrí kutichisqanku: Mana qoriykumanchu, imaraykuchus noqaykupaj, qankunapajpis pisinman. Astawanqa, rispa qhatojkunamanta rantikamuychej ari, nispa. 10 Chantá paykuna aceiteta rantej rinankukama, casarakoj runa chayamusqa, yuyayniyoj sipaskunataj paywan khuska casamiento wasiman yaykusqanku, punkutaj wisq'akapusqa. 11 Qhepata chayamoj sipaskunataj wajyakusqanku: Wiraqochi, wiraqochi, kicharimuwayku, nispa. 12 Casarakojtajrí nimusqa: Cheqatapuni niykichej: Qankunataqa mana rejsiykichejchu, nispa. 13 Wakichisqapuni kaychej, imaraykuchus mana yachankichejchu ima p'unchaytachus, chayrí ima horatachus Runaj Churin kutimunanta. 14 Janaj pacha reinoqa rijch'akun uj runa karuman puririshaspa, kamachisninman kapuyninta saqejman. 15 Ujman phishqa talento qolqeta qosqa, ujmantaj iskayta, ujninmantaj uj talentollata. Ajinata sapa ujman qosqa atisqankuman jina. Chaymantataj karuman ripusqa. 16 Chantá phishqa talentosta jap'ej kamacheqa chay qolqeta uj jinatawan mirachisqa. 17 Jinallatataj iskay talentosta jap'ejpis iskaytawan mirachisqa. 18 Uj talentota jap'ejrí rispa, pampata allaytawan, chayman p'ampaykusqa patronnimpa qolqentaqa. 19 Patronninkoqa unaymanta kutimuspa, paykunamanta cuentata mañasqa. 20 Jinapi phishqa talentosta jap'ej kamachi chimpaykuspa, jaywasqa uj phishqatawan: Wiraqochi, kay phishqa talentosta qowarqanki, chaywantaj kay phishqatawan miracherqani, nispa. 21 Patronnintaj nisqa: Walejpacha, allinta ruwaj kamachi. Pisi kajpi qanqa allinta ruwaspa junt'asqaykirayku, kunanqa aswan ashkhata qosqayki; patronniykej kusikuyninman yaykuy, nispa. 22 Chaymantaqa iskay talentosta jap'ejñataj chimpaspa, nisqa: Wiraqochi, kay iskay talentosta qowarqanki, chaywantaj kay iskaytawan miracherqani, nispa. 23 Patronnintaj payman nisqa: Walejpacha, allinta ruwaj kamachi; pisi kajpi allinta ruwaspa junt'asqaykirayku, kunanqa aswan ashkhata qosqayki; patronniykej kusikuyninman yaykuy, nispa. 24 Chantá uj talentota jap'ejqa chimpaykuspa, nisqa: Wiraqochi, rejserqayki phiña runa kasqaykita, mana tarpuspalla cosechasqaykita, jinallataj mana t'akaspalla oqharisqaykita. 25 Chayrayku, manchachikuspa, jallp'aman p'ampaykamorqani qolqeykita. Kayqa, jap'ikapuy qolqeykita, nispa. 26 Patronnintajrí payman kutichisqa: Sajra, qhella kamachi, yacharqankichu mana tarpuspalla cosechasqayta, jinallataj mana t'akaspalla oqharisqayta? 27 Jina kajteyqa, bancoman qolqeyta churanayki karqa, kutimuspa qolqeyta interesnintawan orqhokapunaypaj, nispa. 28 Chantá kamachisninta nisqa: Qhechuychej chay qolqe talentota, chunka talentosniyojmantaj qoychej. 29 Kapuyniyojmanqa qosqa kanqa, aswan kapuyniyoj kanampaj; pisi kapuyniyojmantatajrí pisi kapusqampis qhechusqa kanqa. 30 Jinataj chay ni imapaj allin kamachitaqa jawa laqhaman wijch'uychej, maypichus waqay, kiru k'arukuytaj kanqa, chayman. 31 Maypachachus Runaj Churenqa Rey jina jatun kaynimpa k'anchaynimpi tukuy angelesninwan jamonqa chaypacha, lliphipej kamachina tiyanampi tiyaykukonqa. 32 Tukuynejmantataj tukuy laya runas ñawpaqenman tantakamonqanku. Paytaj ujkunata ujkunamanta t'aqanqa, imaynatachus michejpis ovejasta cabrasmanta wajman t'aqan, ajinata. 33 Ovejasta pañanman churanqa, cabrastataj lloq'enman. 34 Chantá Reyqa pañampi kajkunata nenqa: Jamuychej, Tataypa bendecisqasnin, jap'ikapuychej qankunapaj qallariymantapacha wakichisqa reinota. 35 Yarqhasqa kashajtiy, qankunaqa mikhuchiwarqankichej; ch'akiyniyoj kashajtiy, ujyachiwarqankichej; forastero kashajtiy, wajyarikuwarqankichej. 36 P'achamanta usushajtiy, p'achallichiwarqankichej; onqosqa kashajtiy, waturikuwarqankichej; carcelpi kashajtiypis, watukoj jamuwarqankichej, nispa. 37 Chantá cheqan kajta ruwajkuna nenqanku: Señor, mayk'ajtaj yarqhasqata rikususpa, mikhuchisorqayku, chayrí ch'akiyniyoj kashajtiyki, ujyachisorqayku? 38 Mayk'ajtaj forasterota rikususpa, wajyarikorqayku, chayrí p'achamanta usushajtiyki, p'achallicherqayku? 39 Mayk'ajtaj onqosqata, chayrí carcelpi kashajtiykipis, waturikorqaykuri? nispa taponqanku chay cheqan runasqa. 40 Reytaj paykunaman kutichenqa: Cheqatapuni niykichej: Imatachus chay mana kasuta ruwana ujnin kaj wawqeypaj ruwarqankichej, chaytaqa noqa kikiypaj ruwarqankichej, nispa. 41 Chantá lloq'empi kajkunaman nenqa: Riychej kaymanta, sajra runas, wiñay nina larwayman, mayqenchus wakichisqa kashan Kuraj Supaypaj, chantá angelesnimpaj ima. 42 Qankunaqa yarqhasqa kashajtiy, mana mikhunata qoriwarqankichejchu, ch'akichikojtiytaj, yakuta mana jaywariwarqankichejchu. 43 Forastero kashajtiy, mana wajyarikuwarqankichejchu; p'achamanta usushajtiy, mana p'achallichiwarqankichejchu; onqosqa, carcelpitaj kashajtiypis, mana waturikuwarqankichejchu, nispa. 44 Chantá paykuna taponqanku: Señor, mayk'ajtaj rikusorqayku yarqhasqata, ch'akichikojta, forasterota, p'achamanta pisichikojta, onqosqata, carcelpi wisq'asqata ima, manataj yanapasorqaykuchu? nispa. 45 Reytaj paykunaman kutichenqa: Cheqatapuni niykichej: Sichus chay mana kasuta ruwana ujnin kaj wawqeypaj mana imata ruwaporqankichej chayqa, nillataj noqapajpis ruwapuwarqankichejchu. 46 Chaykunaqa wiñay ñak'ariyman renqanku, cheqan kajta ruwajkunataj wiñay kawsayman renqanku.
