1 Jesús nacekorqa Belén llajtapi, chaytaj karqa Judea jallp'api, rey Herodes kamachishajtin. Chaypacha inti llojsimuynejmanta yachaysapa runas Jerusalenman chayamorqanku. 2 Taporqankutaj: Maypitaj kashan judiospa reynin nacekojri? Kayta niyku, imaraykuchus ch'askanta rikuyku inti llojsimuynejpi. Chayrayku kayman jamuyku Payta yupaychaj, nispa. 3 Rey Herodes chayta uyarispa, mancharikorqa, jinallatataj Jerusalenpi tukuy kajkunapis. 4 Chaymantataj kuraj sacerdotesta, Diospa leyninta yachachejkunatawan wajyachispa, taporqa: Maypitaj Cristo nacekunan karqari? nispa. 5 Paykuna nerqanku: Belenpi, Judea jallp'api, imaraykuchus kay jinata profeta qhelqarqa: 6 Qanrí Belén, Judajpa jallp'ampi kaj, manamin aswan juch'uychu kanki Judajpa llajtasnin ukhupi. Qanmanta llojsenqa uj kamachej, Paytaj Israel aylluyta michenqa, nispa. 7 Chantá Herodesqa pakayllamanta yachaysapa runasta wajyaspa, aswan allinta taporqa mayk'ajpunichus chay ch'aska paykunaman rikhurisqanta. 8 Chaymantá paykunata kacharqa Belenman: Riychej jaqayman, allintataj yachamuychej chay wawamanta. Wawata tarispataj, willawankichej, noqapis Payta yupaychamunaypaj, nispa. 9 Chay yachaysapa runasqa reypa nisqanta uyariytawan, riporqanku. Chantá inti llojsimuynejpi rikhurimoj ch'askaqa ñawpaqenkuta risharqa, wawa maypichus kasharqa, chaykama, chaynejpitaj sayaykorqa. 10 Paykuna chay ch'askata rikuspa, maytapuni kusikorqanku. 11 Wasiman yaykuspataj, wawata, María mamantawan rikorqanku. Chaypi qonqoriykukuspa, wawata yupaycharqanku. Chantá, q'episninkumanta orqhospa, jaywarqanku qorita, inciensota, mirratawan. 12 Chantá mosqoypi Dios paykunaman willarqa ama Herodesman kutinankuta. Chayrayku waj ñannejta llajtankuman kutiporqanku. 13 Yachaysapa runas ripusqankumanta, Señorpa angelnenqa Joseman mosqoypi rikhurispa, nerqa: Sayariy, wawata, mamantawan pusarikuspa, ayqey Egipto jallp'aman. Chaypitaj qhepakunki noqa ujtawan willasunaykama, imaraykuchus Herodesqa wawata mask'anqa Payta wañuchichinampaj, nispa. 14 José jatariytawankama, wawata, mamantawan tutapacha pusarikuspa, riporqa Egiptoman. 15 Chaypitaj kamorqa Herodes wañunankama. Ajinata junt'akorqa Señorpa nisqan profetanejta: Egiptomanta Churiyta wajyarqani, nispa. 16 Herodesqa yachaysapa runas payta ch'awkiyasqankuta yachaspa, maytapuni phiñakorqa. Chantá pay kamacherqa Belén llajtapi, muyuynimpi ima tukuy qhari wawasta wañurachinankuta iskay watayojmanta uraman, yachaysapa runasta allinta tapusqanman jina. 17 Chaypacha junt'akorqa profeta Jeremiaspa qhelqasqan: 18 Ramá llajtapi uj qhapariy uyarikun, jatun waqay, jik'uytaj. Raquel waqasharqa wawasninmanta, manataj sonqochasqa kayta munarqachu, imaraykuchus wawasnin wañusqasña karqanku. 19 Herodes wañusqanmantaña, Señorpa angelnenqa mosqoypi Joseman rikhurillarqataj Egipto jallp'api. Pay nerqa: 20 Sayariy, wawata, mamantawan pusariykukuspa, kutipuy Israel jallp'aman, imaraykuchus wawata wañuchiyta munajkunaqa ñapis wañurankuña, nispa. 21 Chaymantá José jatariytawan, wawata, mamantawan pusarikuspa, kutiporqa Israel jallp'aman. 22 Jinapi José uyarerqa Judeapi Arquelao kamachishasqanta tatan Herodespa cuentanmanta. Chayrayku Joseqa manchachikorqa chayman riyta. Dios mosqoypi willasqanraykutaj, Galilea jallp'aman riporqa. 23 Nazaret llajtaman chayaspa, chaypi tiyakorqa. Ajina junt'akorqa profetaspa nisqanku: Jesusqa nazareno sutichasqa kanqa, nispa.
