1 Chaypacha Jesusqa samarikuna p'unchaypi trigo chajraspa chawpinta risharqa. Yachachisqasnintaj yarqhachikuspa, qallarerqanku trigo umasta p'itiyta, mikhorqankutaj. 2 Fariseosqa chayta rikuspa, Jesusman nerqanku: Qhaway yachachisqasniykita; samarikuna p'unchaypi mana ruwanata ruwashanku, nispa. 3 Jesustajrí paykunaman nerqa: Manachu leerqankichej, uj kuti David, paywan kajkunawan ima yarqhachikuspa imatachus ruwasqanta? 4 Diospa wasinman yaykuspa, Diospaj t'aqasqa t'antasta mikhorqanku, mayqenkunatachus David mana mikhunanchu karqa, nitaj paywan kajkunapis, chayta; sacerdoteslla chaytaqa mikhunanku karqa. 5 Chayrí, manachu leypi leerqankichej, Templopi sacerdotes samarikuna p'unchayta mana waqaychasqankuta? Chaywampis mana juchayojchu kanku. 6 Noqatajrí niykichej: Kaypi aswan kuraj kashan Templomanta nisqaqa. 7 Yachawajchejchus imatachus niyta munasqanta: Ujkunata khuyanaykichejta munani, mana uywa wañuchisqatachu, nispa chayqa, mana juchachawajchejchu karqa mana juchayojkunataqa, 8 imaraykuchus Runaj Churenqa samarikuna p'unchaypa Señornin. 9 Chaymanta llojsispa, Jesusqa sinagogankuman rerqa. 10 Chaypitaj uj makin ch'akisqa runa kasharqa. Jinapi runasqa Jesusta ch'ataykuyta munaspa, taporqanku: Atikunchu samarikuna p'unchaypi onqosqata sanoyachina? nispa. 11 Jesustaj paykunaman nerqa: Pipis qankunamanta uj ovejayoj kaspa, samarikuna p'unchaypi ovejan pujyuman urmaykojtin, manachu orqhokapunman? 12 Chantá manachu runaqa aswan valorniyoj ovejamanta nisqaqa? Chayrayku samarikuna p'unchaypipis allin kajtaqa ruwana, nispa. 13 Chantá chay runaman nerqa: Jaywariy makiykita, nispa. Paytaj makinta jaywarejtin, chay ujnin makin jina sanoman tukuporqa. 14 Fariseostajrí llojsiytawan, paykunapura parlarqanku imaynamantachus Jesusta wañuchinankupaj. 15 Jesusqa chayta yachaspa, riporqa, paywantaj ashkha runas rillarqankutaj. Tukuy onqosqastataj sanoyacherqa. 16 Chantá paykunata mayta kamacherqa ama pimampis willanankuta pichus Pay kasqanta. 17 Chayta ruwarqa profeta Isaiaspa nisqan junt'akunampaj: 18 Kaymin ajllasqa kamacheyqa, munakusqay; Paypi almayqa kusikun. Payman qosaj Espirituyta, chantá Diospa justicianta mana judío kajkunaman willanqa. 19 Mana churanakonqachu, nitaj qhaparqachanqachu, nillataj pipis callespi parlasqanta uyarenqachu. 20 Lajrasqa soqosollatapis mana p'akenqachu, nitaj q'oshñishaj mechatapis wañuchenqachu, justiciata atipachinankama. 21 Paypa sutimpitaj mana judío kajkuna atienekuspa suyakonqanku. 22 Chaymantá Jesusman pusarqanku supayniyoj ciego opa runata, Jesustaj payta sanoyacherqa. Ajinamanta chay runaqa parlarerqa, qhawarerqataj. 23 Tukuy runastaj t'ukuspa, nerqanku: Manachu kayqa Davidpa Churin kanman? nispa. 24 Fariseosrí chayta uyarispa, nerqanku: Kay runaqa mana Paypa atiyninwanchu supaykunata qharqon; Beelzebú Kuraj Supaypa atiyninwan chaykunata qharqon, nispa. 25 Jesusqa imatachus yuyasqankuta yachaspa, nerqa: Sichus mayqen reinollapis iskayman t'aqakun chayqa, chinkapun. Jinallatataj sichus uj llajtapi, chayrí familiapipis t'aqanaku tiyan chayqa, chinkapullantaj. 26 Sichus Satanasqa pay kikillantataj qharqokun chayqa, pay kikin t'aqanasqa kashan. Imaynatataj reinonqa kallanqapuniri? 27 Chantá Beelzebujpa atiyninwanchus supaykunata qharqoni chayqa, qankunaj churisniykichejrí, pejpa atiyninwantaj supaykunata qharqonku? Chayrayku, paykunamin juezkunaykichej kanqanku. 28 Diospa Espiritumpa atiyninwanchus supaykunata qharqoni chayrí, cheqatapuni Diospa reinonqa qankunaman chayamunña. 29 Chayrí imaynatataj pipis uj kallpasapa runaj wasinman yaykunman tukuy imasninta qhechoj, manaraj wasiyojta ñawpajta wataykuspari? Payta wataykusparaj, wasintaqa ch'inyachinman. 30 Mana Noqawan kajqa contraypi kashan. Mana Noqawan pallajpis t'akan. 31 Chayrayku niykichej: Runaj ima juchallampis, Diospa contranta rimasqampis, pampachasqa kanqa. Espíritu Santopaj sajrata rimasqarí, mana pampachasqachu kanqa. 32 Sichus pipis Runaj Churimpa contranta riman chayqa, chay juchan pampachasqa kanqa. Sichus pipis, Espíritu Santoj contranta riman chayrí, mana chay juchaqa pampachasqachu kanqa kay p'unchaypi, nitaj jamoj p'unchaypipis. 33 Allin sach'aqa allin poqoyta poqon. Mana allin sach'arí mana allin poqoytachu poqon. Chayrayku, sach'ataqa poqoyninnejta rejsinchej. 34 Katarispa miraynin. Imaynatataj allinta parlawajchej sajras kashaspari? Sonqopi imachus junt'a kashan, chaymanta simeqa parlan. 35 K'acha runaqa sonqompi k'acha kaj imasmanta allin imasta orqhomun. Sajra runatajrí, sonqompi sajra kaj imasmanta mana allin imasta orqhomun. 36 Chayrayku niykichej: Juicio p'unchaypeqa runas cuentata qonqanku tukuy qhasi manakajta parlasqankumanta, 37 imaraykuchus parlasqaykiman jina cheqan runapaj rejsisqa kanki, manachayrí juchachasqa kanki. 38 Chaymantataj leymanta wakin yachachejkuna, fariseoswan ima Jesusman kuticherqanku: Yachachej Señor, munaykuman t'ukunapaj jina uj señalta rikuchinawaykuta, nispa. 39 Jesustajrí paykunaman kuticherqa: Kay sajra, qhenchachakoj runaj miraynenqa mañan uj señalta. Jinapis mana waj señal qosqachu kanqa paykunaman; profeta Jonaspa señalnillan qosqa kanqa. 40 Imaynatachus Jonás jatun challwaj wijsampi karqa kinsa p'unchayta, kinsa tutatawan, ajinallatataj Runaj Churimpis kinsa p'unchayta, kinsa tutatawan jallp'aj sonqompi kanqa. 41 Chantá Nínive llajtayojkuna juiciopi jatarimuspa, kunan p'unchay runasta juchachanqanku. Ninivemanta kajkunaqa, Jonás willarajtinkama, Diosman kutirikorqanku. Kaypitaj kashan Jonasmanta aswan kuraj. 42 Ura ladomanta reinapis juiciopi jatarimuspa, kunan p'unchay runasta juchachallanqataj. Payqa karu llajtamanta jamorqa Salomonpa yachayninta uyarej. Kaypi kajtajrí, Salomonmanta nisqaqa aswan kuraj. 43 Millay supay uj runamanta llojsispaqa, ch'aki jallp'asnejta purin samarikuyta mask'aspa, manataj tarinchu. 44 Chaypacha nin: Kutipusaj, maymantachus llojsimorqani, chay wasiman, nispa. Rispataj, taripan ch'usaj wasita, pichasqata, sumaj k'achanchasqatataj. 45 Jinapi pusamoj rin paymanta aswan millay qanchis supaykunata. Runaman yaykuspa, chaypi tiyakunku. Chantá chay runaj kawsaynenqa aswan millayman tukupun ñawpaj kasqanmanta nisqaqa. Ajinallataj kanqa kay sajra runaspa miraynimpajpis. 46 Jesús runasman parlashajtillanraj, maman, wawqesnin ima jawapi suyasharqanku, Paywan parlayta munaspa. 47 Uj runataj Jesusman willarqa: Mamayki, wawqesniyki ima jawapi suyashasunku, Qanwan parlayta munaspa, nispa. 48 Jesustajrí chay runaman kuticherqa: Pitaj mamayri? Pikunataj wawqesniy kankuri? nispa. 49 Makinwan yachachisqasninta rikuchispataj, nerqa: Qhawariychej, kaykuna kanku mamay, wawqesniypis. 50 Pichus janaj pachapi kashaj Tataypa munayninta ruwajmari wawqeytaj, panaytaj, mamaytaj, nispa.
