MARCOS 8

1Chay p'unchaykunapi ujtawan ashkha runas tantakamorqanku. Mana imapis mikhunankupaj kajtintaj, Jesús yachachisqasninta wajyaspa, nerqa: 2Kay runasmanta sonqoy nanawan, imaraykuchus kinsa p'unchaytaña Noqawan kashanku, manataj imapis mikhunankupaj kanchu. 3Sichus mana mikhusqasta wasisninkuman kachapusaj chayqa, ñampi sayk'uspa llawch'iyarankuman, imaraykuchus wakenqa karumanta jamunku. 4Chantá yachachisqasnin kuticherqanku: Maypitaj t'anta kanman kay ch'impi, kay chhika runasman mikhuchinapajri? nispa. 5Jesustajrí paykunata taporqa: Mashkha t'antastaj kapusunkichej? nispa. Paykunataj kuticherqanku: Qanchis t'antalla tiyan, nispa. 6Chantá Jesús runasta kamacherqa pampapi tiyarakunankuta. Chay qanchis t'antasta jap'ispataj, Diosman graciasta qorqa. T'antasta partiraspataj, yachachisqasninman jaywarqa runasman rak'iranankupaj. Paykunataj ajinata ruwarqanku. 7Kallarqataj paykunajta pisi challwitasninku; chaykunamantapis graciasta qospa, kamachillarqataj chaytapis runasman jaywamunankuta. 8Tukuyninku mikhorqanku sajsakunankukama, puchojtataj qanchis canastas junt'ata oqharerqanku. 9Mikhojkunaqa tawa waranqa jina qharis karqanku. Chaymantaqa Jesús kacharaporqa runasta. 10Chantá Jesusqa yachachisqasninwan boteman yaykuspa, Dalmanuta nisqa cheqaman rerqa. 11Chaymantaqa fariseos jamuspa, Jesuswan churanakuyta qallarerqanku; pantachiyta munaspataj, mañarqanku janaj pachamanta señalta rikuchinanta. 12Jesustajrí ukhuta samarispa, paykunata nerqa: Imaraykutaj kunan tiempo runas señalta rikuyta munanku? Sut'inta niykichej: Mana ima señalpis ruwakonqachu kunan tiempo runaspajqa, nispa. 13Chantá paykunata saqerparispa, yachachisqasninwan ujtawan boteman yaykorqa, qochaj uj lado chimpanman rinampaj. 14Chaypacha yachachisqasnenqa qonqapusqanku t'antata apakuyta. Botepiña kashaspataj, uj k'ata t'antayojlla rikhurerqanku. 15Chantá Jesús paykunata mayta nerqa: Allintapuni qhawakuychej fariseospa levadurankumanta, jinallataj Herodespa levaduranmantapis, nispa. 16Yachachisqasnintajrí ninakusharqanku: Chaytaqa nin mana t'antata apakamusqanchejrayku, nispa. 17Jesusqa chay ninakusqankuta yachaspa, paykunata k'amerqa: Imaraykutaj siminakushankichej, mana t'antaykichej kasqanrayku? Manarajchu yachankichej, nitajchu entiendeyta atinkichej? Rumi sonqosllarajpunichu kashankichej? 18Ñawisniyoj kashaspapis, manachu rikunkichej? Ninrisniyoj kashaspapis, manallatajchu uyarinkichej? 19Yuyarikuychej imaynatachus phishqa t'antasta partispa, phishqa waranqa runaman mikhuchisqayta. Mashkha canastas junt'atataj puchoj t'antata oqharerqankichej? nispa nerqa Jesusqa. Paykunataj kuticherqanku: Chunka iskayniyoj canastasta, nispa. 20Jesús nillarqataj: Qanchis t'antasta tawa waranqa runasman mikhuchisqaymanta, mashkha canastas junt'ata puchoj t'antata oqharerqankichej? nispa. Paykunataj nerqanku: Qanchis canastasta, nispa. 21Jesustaj nerqa: Chantá manarajpunichu entiendeyta atinkichej? nispa. 22Chay qhepata Betsaida llajtaman chayamorqanku. Chantá runasqa Jesusman uj ciegota pusamuspa, mañarqanku llankhaykunanta. 23Jesustaj ciegoj makinmanta jap'iykuspa, llajtamanta jawaman pusarqa. Thoqayninwan ñawisninta jawiykuytawantaj, makisninwan payta llankhaykuspa, taporqa: Rikunkichu imallatapis? nispa. 24Paytaj qhawarispa, nerqa: Rikushani runasta sach'asta jina puriykachashajta, nispa. 25Chantá Jesús ujtawan makisninwan chay runaj ñawisninta llankhaykorqa. Kay kutipeqa chay runa allinta rikorqa, ñawisnintaj sanoyaporqanku, tukuy imatataj sut'ita rikorqa. 26Jesustaj chay runata wasinman kachapuspa, nerqa: Ama llajtaman yaykuychu, nispa. 27Chaymanta Jesús yachachisqasninwan rerqa Cesarea Filipoj ranchosninman. Ñanta rishaspa, Jesús yachachisqasninta taporqa: Runasqa pi kasqaytataj ninku? nispa. 28Paykunataj kuticherqanku: Wakinkunaqa ninku Juan Bautista kasqaykita, wajkunataj Elías kasqaykita, wakinkunataj mayqen profetachá, ninku. 29Chantá Jesús tapullarqataj: Qankunarí pi kasqaytataj ninkichej? nispa. Pedrotaj kuticherqa: Qanqa Cristo kanki, nispa. 30Jinapi Jesusqa yachachisqasninta mayta kamacherqa amapuni pimampis ni imata Paymanta ninankuta. 31Chaymanta yachachisqasninman yachachiyta qallarerqa Runaj Churin maytapuni ñak'arinanta, jinataj kuraj runas, kuraj sacerdotes, leymanta yachachejkuna ima Payta qhesachanankuta. Jesusqa willallarqataj Payta wañuchinankuta, kinsa p'unchaymantataj kawsarimpunanta. 32Ajina sut'ita paykunaman willarqa. Pedrotajrí Jesusta wajnejman pusaspa, k'amerqa. 33Chantá Jesusqa yachachisqasninman kutirispa, Pedrota k'amerqa: Riy kaymanta, Satanás. Qanqa mana Diospa imasnimpichu yuyashanki, manachayqa runaspa imasnillampi, nispa. 34Chaymantá runasta, yachachisqasnintawan wajyaspa, nerqa: Pichus qhepayta jamuyta munajqa pay kikinta qhesachakuspa, cruznin oqharisqa, qhepayta jamuchun. 35Pichus kawsayninta salvayta munajqa kawsayninta chinkachenqa. Noqarayku, evangelioraykutaj kawsayninta chinkachejtajrí kawsayninta salvanqa. 36Ima allintaj runapaj kanman, sichus kay pachaj tukuy kapuyninta ganakapunman, almantaj chinkapunman chayqa? 37Imatataj runaqa qonman almanrayku? 38Sichus pipis kunan tiempo khuchichakoj juchasapa runas ukhupi Noqamanta, nisqasniymantawan p'enqakun chayqa, chay runamantapis Runaj Churenqa p'enqakullanqataj, Dios Tatampa jatun kaynimpa k'anchaynimpi, ajllasqa angelesninwan ima jamuynimpi.

will be added

X\