MARCOS 3

1Watejmanta Jesús yaykullarqataj sinagogaman, chaypitaj uj runa makin ch'akisqa kasharqa. 2Wakin runas chaypi kajkunamanta Jesusta wateqasharqanku, rikuyta munaspa samarikuna p'unchaypi sanoyachenqachus, chayrí manachus, Payta ch'ataykunankupaj. 3Jesustajrí makin ch'akisqa runata nerqa: Sayariy, kay ñawpajman jamuy, nispa. 4Chantá runasta taporqa: Atikunchu samarikuna p'unchaypi allin kajta ruway, chayrí sajra kajtachu? Runaj kawsayninta salvanachu, chayrí wañupojta saqenachu? nispa. Paykunatajrí ch'inlla karqanku. 5Chaymantá Jesusqa phiñakuspa, muyuynimpi kajkunata qhawarerqa, paykunamantataj llakikorqa rumi sonqos kasqankurayku. Chay onqosqa runatataj nerqa: Jaywariy makiykita, nispa. Paytaj makinta jaywarejtinkama, sano rikhurerqa. 6Chaymanta fariseosqa llojsiytawan, herodianoswan tantaykukuspa, yachachinakorqanku Jesusta wañuchinankupaj. 7Ajinamanta Jesús riporqa yachachisqasninwan Galilea Qocha kantuman; chaywampis ashkha runas Payta qhatillarqankutaj Galileamanta, Judeamantawan. 8Jamullarqankutaj Jerusalenmanta, Idumeamanta, Jordán Mayu chimpamanta, Tiromanta, chantá Sidonpa qayllasninmanta ima. Chay jina ashkha runas jamorqanku Jesusman, ruwasqasninmanta uyarisqankurayku. 9Chay chhika runasta rikuspataj, yachachisqasninman nerqa: Boteta wakichipuwaychej, runas k'iskikamuspa ama ñit'imunawankupaj, nispa. 10Jesús ashkha runastaña sanoyarachisqanrayku, tukuy onqosqas k'iskikamusharqanku Jesusta llankhaykunankupaj. 11Millay espirituspis Jesusta rikuytawan, ñawpaqenman choqakuspa, qhaparerqanku: Qanqa Diospa Churin kanki, nispa. 12Jesustajrí mayta kamacherqa ama sut'inchanankupaj pichus Pay kasqanta. 13Chantá Jesusqa orqoman wicharispa, wajyarqa, pikunatachá ajllayta munarqa, chaykunata, paykunataj Jesusman jamorqanku. 14Jesusqa chunka iskayniyoj runasta ajllarqa Paywan kanankupaj, chantá evangelionmanta willajta kachanampaj. 15Paykunamantaj atiyta qorqa onqosqasta sanoyachinankupaj, supaykunatataj qharqonankupaj. 16Kaykuna chay chunka iskayniyoj ajllasqasnin kanku: Simón, Pedro nisqa; 17Zebedeoj churisnin Santiago, wawqen Juanwan. Paykunatapis Boanerges, sutiwan sutichallarqataj. Chay niyta munan Qhon Qhompa Churisnin. Chaymanta kallarqankutaj: 18Andrés, Felipe, Bartolomé, Mateo, Tomás, Alfeoj churin Santiago, Tadeo, Simón cananita nisqa, 19Jesusta jap'ichej Judas Iscariote ima. 20Chantá Jesús uj wasiman yaykojtin, runas ujtawan tantakamullarqankutaj; chayrayku Jesuswan yachachisqasninwan mana mikhullaytapis aterqankuchu. 21Chayta yachaspataj, ayllusnin jamorqanku Jesusta pusakapunankupaj, nisharqankutaj: Mana yuyaynimpichu kashan, nispa. 22Leymanta yachachejkuna, Jerusalenmanta jamojkunapis nishallarqankutaj: Kuraj Supay Beelzebú kay runapi kashan; chayrayku paypa atiyninwan supaykunata qharqon, nispa. 23Jesustajrí runasta wajyaspa, rijch'anachinaswan nerqa: Imaynatataj Kuraj Supayqa Kuraj Supayllatataj qharqokunmanri? nispa. 24Jesús nillarqataj: Uj nacionchus iskayman t'aqasqa kanman chayqa, chay nacionqa manaña sayanmanchu. 25Uj familiachus phiñanakuspa, t'aqanakunkuman chayqa, chay familiaqa mana allimpi kayta atinmanchu. 26Ajinallatataj, sichus Kuraj Supaypa reinompis iskayman t'aqasqa kanman chayqa, manallataj sayayta atinmanchu, astawanqa chinkapunman. 27Mana pipis kallpasapa runaj wasinman yaykuyta atinchu kapuyninta qhechoj, manachus ñawpajta kallpasapa runata wataykunmanraj chayqa. Wataykusparajpuni, wasimpi kaj chhikata apakaponqa. 28Cheqatapuni niykichej: Runaspa tukuy juchanku pampachasqa kanqa, jinallataj ima sajrata rimasqankupis. 29Espíritu Santoj contranta rimajpatarí, mana jayk'ajpis juchan pampachasqachu kanqa; payqa wiñaypaj juchachasqa kanqa, nispa. 30Jesús chayta nerqa, imaraykuchus runas nisharqanku Jesús millay espirituyoj kasqanta. 31Chay qhepata Jesuspa maman, wawqesnin ima chayamorqanku. Jawallamanta kacharqanku Payta wajyajta. 32Jesuspa muyuynimpi tiyashajkunataj Payman nerqanku: Mamayki, wawqesniyki ima mask'ashasunku, nispa. 33Jesustajrí paykunaman kuticherqa: Pitaj mamay kasqari? Pikunataj wawqesniy kasqankuri? nispa. 34Chantá muyuynimpi tiyashajkunata qhawarispa, nerqa: Kaykunamari mamay, wawqesniypis kanku. 35Pichus Diospa munayninta ruwan, chaymá wawqeyqa, panaypis, mamaypis.

will be added

X\