1 Ujtawan, pisi p'unchaykunamanta, Capernaumman Jesús kutirejtin, yachakorqa wasinman chayampusqan. 2 Chaypacha ashkha runas tantakamorqanku; manaña punkullamampis chimpaykuna jinachu karqa. Chaypitaj Jesusqa Diosmanta willasharqa. 3 Ajinallamantaj tawa runas wantupi apamorqanku uj suchu runata. 4 Chaypi runas k'iski kajtinkutaj, mana ni imaynamanta aterqankuchu chay onqosqata Jesusman qayllaykuchiyta. Chayrayku wasej patanta jusk'orqanku, maypichus Jesús kasharqa, chaynejman. Chay jusk'u ruwasqankunejtataj, suchu runata urayk'ucherqanku phullumpi sirisqata. 5 Chay runaspa creesqankuta rikuspa, suchu runata Jesusqa nerqa: Wawáy, juchasniykeqa pampachasqaña, nispa. 6 Chaypi tiyasharqanku leymanta wakin yachachejkuna. Paykunaqa sonqonku ukhupi yuyasharqanku kay jinata: 7 Imaraykutaj kay runa chay jinata parlanri? Diospa contranta rimashan. Ni pi runa atinchu juchasta pampachaytaqa, manachayqa Dioslla, nispa. 8 Jesustajrí espiritumpi yacharqapacha imatachus sonqonkupi yuyasqankuta. Chayrayku paykunaman nerqa: Imaraykutaj chay jinata sonqoykichejpi yuyankichejri? 9 Imataj aswan atikojlla kanman suchu runaman ninaypaj: Juchasniyki pampachasqaña, nispa ninaychu; chayrí: Sayariy, phulluykita oqharispa ripuy, nispa ninaychu? 10 Kayta nini yachanaykichejpaj Runaj Churenqa kay pachapi atiyniyoj kasqanta juchasta pampachanampaj, nispa. Chantá suchu runata nerqa: 11 Qanta niyki: Sayariy; phulluykita oqharispa, ripuy wasiykiman, nispa. 12 Tukuy qhawashajtinkutaj, suchu runaqa ujllata sayarerqa, phullunta oqharispataj, riporqa. Chayta rikuspa, tukuy runas manchayta t'ukorqanku, Diosta jatunchaspataj nisharqanku: Mana jayk'ajpis jinataqa rikojchu kanchej, nispa. 13 Jesusqa ujtawan kuterqa Galilea Qocha kantuman. Chaypeqa Jesusman jamorqanku ashkha runas, paykunamantaj yachachiyta qallarerqa. 14 Chantá Jesús chaynejta rishaspa, rikorqa Alfeoj churin, Leví sutiyojta, tiyashajta impuesto cobrana wasipi. Jesustaj payman nerqa: Jamuy qhepayta, nispa. Levitaj sayarispa, Jesuswan rerqa. 15 Jinataj karqa Levijpa wasimpi Jesús mikhushajtin, impuestota ashkha cobrajkuna, juchasapaspis Jesuswan jinallataj yachachisqasninwan khuska mikhushallarqankutaj, ashkhas Payta qhatisqankurayku. 16 Leymanta wakin yachachejkuna, fariseos ima Jesusta chay juchasapaswan, impuestota cobrajkunawan khuska mikhushajta rikuspa, yachachisqasninman nerqanku: Imataj kayri? Yachachejniykichejqa impuestota cobrajkunawan, juchasapaswan khuska mikhushantaj, ujyashantaj, nispa. 17 Jesustajrí chayta uyarispa, nerqa: Walej kajkunaqa jampejta mana wajyanankuchu tiyan, manachayqa onqosqa kajkunalla. Mana cheqan runastachu wajyaj jamuni, manachayqa juchasapasta. 18 Uj kuti Juan Bautistaj yachachisqasnin, fariseospa yachachisqasnin ima ayunota ruwasharqanku. Ujkunataj Jesusman jamuspa, nerqanku: Juanpa yachachisqasnin, fariseospa yachachisqasnin ima ayunota ruwanku. Imaraykutaj Qampa yachachisqasniyki mana ayunota ruwankuchu? nispa. 19 Jesustaj paykunaman kuticherqa: Yuyankichejchu casamientoman wajyasqas ayunota ruwanankuta, chaypi casarakoj kashajtin? Casarakojwan kashaspaqa, mana ayunota ruwankumanchu. 20 Uj p'unchay kanqa, maypachachus casarakoj paykunamanta qhechusqa kanqa; chaypacharajmá ayunota ruwanqanku. 21 Jesús nillarqataj: Mana pipis t'irinmanchu mawk'a p'achaman mosoj trapotaqa, imaraykuchus mosoj trapoqa q'entispa, aswan jatunta llik'irparinman mawk'a p'achataqa. 22 Manallataj pipis mosoj vinota jich'anmanchu mawk'a qara botaman. Mosoj vinoqa poqoykuspa, qara botata phatachinman; jinapitaj vinoqa jich'akunman, qara botapis usunman. Chayrayku mosoj vinotaqa mosoj qara botamampuni jich'ana tiyan. 23 Uj samarikuna p'unchaypi Jesús risharqa trigo chajraspa chawpinta, yachachisqasnintaj qallarerqanku trigo umasta p'itirayta. 24 Chayta rikuspa, fariseosqa Jesusta nerqanku: Qhaway, imaraykutaj yachachisqasniyki samarikuna p'unchaypi mana ruwanata ruwanku? nispa. 25 Jesustajrí paykunaman nerqa: Manachu jayk'ajpis leerqankichej Davidqa, paywan kajkunawan yarqhachikuspa, imatachus ruwasqanta? 26 Chaypacha David yaykorqa Diospa wasinman, Abiatar kuraj kaj sacerdote kashajtin. Chaypi Diospaj t'aqasqa t'antata mikhorqa, paywan kajkunamampis mikhuchillarqataj. Chay t'antastaqa mana paykunachu mikhunanku karqa, manachayqa sacerdoteslla mikhoj kanku. 27 Jesús nillarqataj: Samarikuna p'unchayqa runarayku churasqa karqa, manataj runaqa samarikuna p'unchaypajchu ruwasqa karqa. 28 Chayrayku Runaj Churenqa samarikuna p'unchaypatapis Señornin.
