1 Iskay p'unchayllaña Pascua fiestapaj karqa, jinallataj mana levadurayoj t'antata mikhuna fiestapaj, kuraj kaj sacerdotes, leymanta yachachejkuna ima mask'asharqanku imaynamantachus Jesusta pakayllamanta jap'ichispa wañuchinankuta. 2 Jinapis nisharqanku: Ama fiesta p'unchaypeqa jap'ichinachu, imaraykuchus runas oqharikuspa ch'ajwankuman, nispa. 3 Betania llajtapi lepra onqoyniyoj Simonpa wasimpi Jesús kasharqa. Chaypi Pay mikhushajtintaj, uj warmi yaykumorqa alabastro nisqa rumimanta yuru aparisqa. Yuroqa nardo perfumewan junt'a karqa, may valorniyoj. Warmitaj yurituta p'akirparispa, perfumeta Jesuspa umanman jich'aykorqa. 4 Wakinkunatajrí sonqonkupi phiñakuspa, nerqanku: Imapajtaj kay jinata perfumeta usuchinri? 5 Kinsa pachaj kuraj denario qolqepi vendekunman karqa, chay qolqetaj wajchasman qosqa kanman karqa, nispa. Warmipajqa mayta rimarqanku. 6 Jesustajrí paykunaman nerqa: Saqeychej, imaraykutaj payta k'amishankichejri? Kay warmeqa allinta Noqapaj ruwapuwan. 7 Wajchasqa qankunawan kallanqankupuni; munaspaqa mayk'ajllapis atinkichej paykunata yanapayta. Noqarí manaña unaytachu qankunawan kasaj. 8 Kay warmeqa atisqanta ruwan; perfumewan cuerpoyta jawin, ajinamantataj ñawpaykun, p'ampakunaypaj wakichiwaspa. 9 Cheqatapuni niykichej: Mayllapipis evangelio willakojtin, kay warmej ruwasqampis willakullanqataj paymanta runas yuyarikunankupaj. 10 Chaypacha chunka iskayniyojmanta ujnin, Judas Iscariote sutiyojqa rerqa kuraj sacerdoteswan parlamoj, Jesusta jap'ichinampaj. 11 Paykunaqa chayta uyarispa, kusikorqanku. Chantá qolqeta qonankupaj parlarqanku, Judastaj qhawasharqa imaynamantachus Jesusta jap'ichinanta. 12 Mana levadurayoj t'anta mikhuna Pascua fiesta p'unchaypa qallariynin karqa, maypachachus Pascua corderota wañuchinku, chay. Chantá yachachisqasnin Jesusman nerqanku: Maymantaj risqayku wakichej Pascuata mikhunaykipaj? nispa. 13 Chantá Jesusqa iskay yachachisqasninta kacharqa: Riychej llajtaman; chaypi tinkukunkichej p'uñupi yakuta apashaj runawan, paytataj qhatiychej. 14 Maymanchá yaykonqa, chay wasiyojta niychej: Yachachej Señorniyku nisunki: Maypitaj cuarto kashan yachachisqasniywan Pascuata mikhunaypaj? nispa. 15 Wasiyojtaj, alto patapi rikuchisonqachej uj jatun cuartota, k'uchunchasqataña; chaypi tukuy imata wakichiychej Pascuata mikhunanchejpaj, nispa. 16 Chay yachachisqasqa rerqanku, llajtaman yaykuspataj, tukuy imata Jesuspa nisqanman jina tarerqanku, chay wasipitaj wakicherqanku Pascua mikhunata. 17 Chantá ch'isiyaykuyta chay wasiman Jesús chayarqa, chunka iskayniyoj apostolesninwan. 18 Mikhushajtinkutaj, paykunaman nerqa: Cheqatapuni niykichej: Qankunamanta ujniykichej, pichus Noqawan mikhushan, chay jap'ichiwanqa, nispa. 19 Chaymanta yachachisqasnin llakikuspa, Jesusta tapuyta qallarerqanku, ujmanta uj: Noqachu kani? nispa. 20 Jinapi Jesús paykunaman kuticherqa: Qankuna chunka iskayniyojmanta ujniykichej, pichus Noqawan chuwapi t'antata chhapuspa mikhushan, chay kanqa. 21 Runaj Churenqa, Paymanta qhelqasqaman jina wañuymampuni rishan. Ay, jaqay runamanta, pinejtachus Runaj Churin jap'ichisqa kanqa, chaymanta. Allin kanman karqa chay runapaj ama nacekunan, nispa. 22 Paykuna mikhushajtinku, Jesús t'antata oqharispa, Diosman graciasta qorqa. Chantá t'antata partispa, apostolesninman jaywarqa, nerqataj: Jap'iychej, kaymin cuerpoyqa, nispa. 23 Copata oqharispataj, Diosman graciasta qorqa, paykunamantaj jaywarqa. Chantá tukuyninku copamanta ujyarqanku. 24 Jesustaj paykunaman nerqa: Kaymin yawarneyqa, mosoj tratomanta yawar, mayqenchus ashkha runasrayku jich'asqa kanqa, chay. 25 Cheqatapuni niykichej: Manaña ujtawan uva sach'aj poqoyninmanta ujyasajchu, Diospa reinompi mosoj vinota ujyanaykama. 26 Uj salmota takiytawan, Olivos Orqoman rerqanku. 27 Chaypacha Jesús paykunaman nerqa: Kunan tukuyniykichej Noqamanta p'enqakuspa saqerpariwankichej. Qhelqasqa kashan: Michejta wañuchisaj, ovejastaj ch'eqerakonqanku, nispa. 28 Wañusqamanta kawsarimpuspataj, ñawpaqeykichejta Galileaman risaj, nispa. 29 Chantá Pedroqa Jesusta nerqa: Tukuyninku saqesojtinkupis, noqaqa manapuni jayk'ajpis saqerparisqaykichu, nispa. 30 Jesustajrí Pedroman nerqa: Cheqatapuni niyki: Kunan tutapacha, manaraj gallo iskay kutita waqashajtin, qan kinsa kutita ninki Noqata mana rejsiwasqaykita, nispa. 31 Pedrotajrí astawan atipakuspa, kuticherqa: Qanwan wañunay kashajtimpis, manapuni nisajchu: Paytaqa mana rejsinichu, nispa. Jinapi tukuy apostolesnimpis kikillantataj nerqanku. 32 Jesuswan, apostolesninwan chayarqanku uj cheqaman, Getsemaní nisqaman. Jesustaj paykunaman nerqa: Kaypi tiyarikuychej Noqa Dios Tatamanta mañakamunaykama, nispa. 33 Chantá Pedrota, Santiagota, Juantawan aswan jaqaynejman pusarqa, chaypitaj sonqo nanayta, llakiywan ñak'ariyta qallarerqa. 34 Paykunamantaj nerqa: Almayqa ancha llakisqa kashan wañuykama. Kaypi suyawaychej ama puñuspa, nispa. 35 Jinapi Jesusqa tumpatawan ñawpajman riytawan, pampaman k'umuykuspa Diosmanta mañakorqa, atikojtenqa chay ñak'arinan hora imaynallamantapis qhechukunampaj. 36 Mañakuspataj, Jesús nerqa: Abba Tatáy, tukuy ima Qampajqa atikun; Noqamanta karunchay, ñak'arinay kashan, chayta. Chaywampis ama Noqaj munaynillayqa kachunchu, astawanqa Qampa munayniyki ruwasqa kachun, nispa. 37 Chantá Jesús kutirimuspa, paykunata puñushajta tariparqa, Pedrotataj nerqa: Simón, puñushankichu? Manachu uj horallatapis qhawayta aterqanki? 38 Qhawakuychej ama puñuspa. Diosmanta mañakuychej ama juchaman urmanaykichejpaj. Cheqatapuni espiritoqa wakichisqa kashan kasunapaj, aycha cuerpotajrí pisi kallpayoj, nispa. 39 Chantá Jesús ujtawan rispa, Diosmanta mañakorqa ñawpajta jina. 40 Ujtawan kutimuspataj, puñurashajllatataj paykunata tariparqa, imaraykuchus paykunaqa k'aywisharqanku puñuywan atichikuspa; manataj imata kutichiyta aterqankuchu. 41 Kinsa kaj kutimuynimpitaj, Jesusqa paykunaman nerqa: Kunanqa puñullaychejña, samarikuychejtaj. Jinallaña kachun; ñapis hora junt'akunña. Runaj Churenqa juchasapaspa makimpiña kashan. 42 Jatariychej, jaku. Jap'ichiwajqa qayllapiña, nispa. 43 Jesús parlashajtillanraj, Judas chayaykamorqa; payqa chunka iskayniyojmanta ujnin kaj karqa. Paywantaj ashkha runas jamorqanku espadasniyoj, k'aspisniyoj ima. Chaykunata kachamusqanku kuraj sacerdotes, leymanta yachachejkuna, kurajkuna ima. 44 Judasqa yachachinakusqaña imaynatachus Jesusta jap'ichinampaj: Pitachari noqa much'aykusaj, chay kanqa. Payta jap'ispa, presota apaychej, nispa. 45 Judastaj chayaykamuytawan, Jesusman qayllaykuspa, nerqa: Yachachej Señorníy, nispa, much'aykorqataj. 46 Runastaj Jesusta jap'iytawan, presocharqanku. 47 Chaypi kajkunamanta ujnenqa espadanta sik'ikuspa, kuraj kaj sacerdotej kamachimpa ninrinta qholurparerqa. 48 Jesustaj runasman nerqa: Suwata jinachu jap'iwaj jamunkichej espadasniyoj, k'aspisniyoj ima? 49 Templopi sapa p'unchay yachachishajteyqa, mana jap'iwarqankichejchu; kunantajrí Diosmanta Qhelqasqaj nisqan junt'akunampaj jap'iwankichej. 50 Chantá Jesusta saqerparispa, tukuynin yachachisqasnin ayqerikaporqanku. 51 Uj waynataj Jesusta qhatisharqa, sabanawan qhatasqa. Paytapis jap'illarqankutaj. 52 Jap'ejkunaj makinkupi sabanata saqerparispataj, q'alalla waynaqa ayqerikaporqa. 53 Chaymanta Jesusta pusarqanku kuraj kaj sacerdoteman. Chaymantaj tantakamorqanku kuraj kaj sacerdotes, kurajkuna, leymanta yachachejkuna ima. 54 Pedroqa karullamanta Jesusta qhatispa, yaykorqa kuraj kaj sacerdotej ukhu pationman. Chaypitaj payqa nina qayllapi chukuspa, kamachiswan q'oñikusharqa. 55 Kuraj kaj sacerdoteswan, juntamanta tukuy kajkunawan mask'arqanku llulla testigosta, Jesusta ch'ataykunankupaj, chaymantataj wañuchinankupaj. Chaywampis ni imata tarerqankuchu. 56 Ashkhas llullakuspa Paypa contranta parlarqanku, chay parlasqankutajrí mana kikinchu karqa. 57 Chantá wakin sayarispa, Jesuspa contranta nerqanku: 58 Noqayku Jesusta uyarerqayku nejta: Noqa urmachisaj runaj makinwan ruwasqa kay Templota, chaymantataj kinsa p'unchaypi watejmanta sayarichisaj mana runaj makinwan ruwasqata, nispa. 59 Chaywampis, paykunaj tumpasqankupis manallataj kikinchu karqa. 60 Chaypacha kuraj kaj sacerdote chawpinkumanta sayarispa, Jesusta taporqa: Manachu imatapis kutichikunki? Imasmanta kaykuna ch'atasunku? nispa. 61 Jesustajrí ch'inlla karqa, mana imata kutichikuspa. Watejmanta kuraj kaj sacerdoteqa Jesusta tapullarqataj: Qanchu Cristo kanki, yupaychasqa Diospa Churin? nispa. 62 Jesustaj kuticherqa: Arí, Noqa kani. Qankunataj rikunkichej Runaj Churinta Tukuy Atiyniyoj Diospa pañampi tiyashajta, cieloj phuyuspitaj jamushajta, nispa. 63 Chayta uyariytawankama, kuraj kaj sacerdoteqa p'achasninta llik'irakuspa, nerqa: Imapajñataj munanchej testigosta? 64 Qankuna uyarinkichejña imaynatachus Diospa contrampi sajrata rimasqanta. Kunanqa, ima ninkichejtaj? nispa. Tukuyninkutaj Jesusta wañuchisqa kanampaj juchacharqanku. 65 Chantá wakinkuna qallarerqanku Jesusman thoqaykuyta, ñawisninta qhataykuspataj, sajmarqanku, nerqankutaj: Sut'inchawayku pichus sajmasusqanta, nispa. Templota qhawaj soldadospis Jesusta laq'arqanku. 66 Pedroqa ukhu patiopi kashajtin, jamorqa kuraj kaj sacerdotej ujnin sipas kamachin. 67 Paytaj Pedrota nina qayllapi q'oñikushajta rikuspa, qhawariytawan nerqa: Qampis Jesús nazarenowan purej kanki, nispa. 68 Pedrotajrí nerqa: Mana jinachu. Mana Payta rejsinichu, nitaj yachanichu imamantachus parlasqaykita, nispa. Chantá jawaman llojserqa; ajinallamantaj gallo waqarqa. 69 Chay sipas kamacheqa Pedrota ujtawan rikuspa, chaypi kajkunaman nerqa: Kay runaqa paykunamanta, nispa. 70 Pedrotajrí ujtawan nerqa: Mana jinachu, nispa. Uj chhikanmantawan chaypi kajkunapis Pedrota uyancharqanku: Cheqamanta qampis paykunamanta kanki, imaraykuchus Galileamanta kanki, nispa. 71 Jinapi Pedroqa maldecispa, jurayta qallarerqa: Mana chay runata rejsinichu, pimantachus parlashankichejpis, nispa. 72 Chantá ujtawan gallo waqallarqataj, Pedrotaj chayta uyarispa, Jesuspa kay nisqanmanta yuyarikorqa: Manaraj iskay kutita gallo waqashajtin, qanqa kinsa kutita ninki mana rejsiwasqaykita, nispa. Chayta yuyarikuspataj, Pedroqa waqarqa.
