1 Jesús yachachisqasninwan Jerusalenman qayllashaspa, Olivos Orqoj chimpampi Betfagé llajtawan Betania llajtawan tinkuyman chayarqanku. Chaymanta Jesusqa iskay yachachisqasninta kachaspa, 2 nerqa: Riychej jaqay chimpa ranchoman, yaykuspataj uj uña burrota tarinkichej watasqata; chay burromanqa manaraj pipis lloq'anchu. Phaskaraspataj, kayman aysamuychej. 3 Sichus pipis tapusunkichej: Imapajtaj chay burrota phaskarashankichej? nispa, chayqa, qankuna kutichiychej: Señorqa kay burrota necesitan. Chantá askamalla qhatichimpusonqapacha, nispa. 4 Paykunaqa ranchoman rispa, uña burrota ñan patapi tarerqanku, wasi punkupi watasqata, phaskararqankutaj. 5 Chaypi kajkunamanta wakintaj taporqanku: Imapajtaj chay burrota phaskarashankichej? nispa. 6 Paykunataj kuticherqanku Jesuspa kamachisqanman jina, runastaj saqellarqankuña apajta. 7 Jinapi chay burrota Jesusman aysamorqanku, p'achasninkuwan caronaykojtinkutaj, Jesusqa burroman lloq'aykorqa. 8 Chantá ashkha runas p'achasninkuta ñanman mast'asharqanku, wajkunataj sach'asmanta ramasta p'akiramuspa, mast'allata ñanman churashallarqankutaj. 9 Jesuspa ñawpaqenta rejkuna, qhepanta jamojkuna ima qhaparisharqanku: Jatunchasqa kachun Señorpa sutimpi jamojqa. 10 Bendecisqa kachun ñawpa tatanchej Davidpa jamoj reinon. Jatunchasqa kachun janaj pachapipis, nispa. 11 Jesusqa Jerusalenman chayaspa, Temploman yaykorqa; muyuynimpi tukuy imata qhawaspataj, ch'isiyaykuyña kajtin, chunka iskayniyoj apostolesninwan Betaniaman rerqa. 12 Q'ayantin Betaniamanta kutirimushajtinku, Jesús yarqhachikorqa. 13 Karumantataj rikorqa uj higo sach'ata, q'omer laqhesniyojta. Poqoyta tariyta munaspa, higo sach'aman qayllaykorqa, manataj poqoyta tarerqachu, manachayqa laqhesllata, imaraykuchus manaraj higos tiempochu karqa. 14 Chantá Jesús higo sach'aman nerqa: Ama jayk'aj pipis poqoyniykita mikhuchunchu, nispa. Yachachisqasnintaj chay nisqanta uyarerqanku. 15 Chaymantaqa Jerusalenman chayamorqanku. Chantá Jesusqa Temploman yaykuspa, rantejkunata, vendejkunatawan jawaman qharqoyta qallarerqa. Qolqe chhalajkunaj mesasninkuta tijrararqa, jinallatataj paloma qhatojkunaj tiyanasninkutapis. 16 Manataj pitapis saqerqachu Templonejta imallatapis apaykachajta. 17 Chantá Jesusqa runasman yachachiyta qallarerqa: Manachu Diosmanta Qhelqasqapi nin: Waseyqa Diosmanta mañakuna wasi nisqa kanqa tukuy runaspaj, nispa? Qankunarí suwa thapaman tukuchisqankichej. 18 Jesuspa chay nisqanta uyarispa, leymanta yachachejkuna, kuraj sacerdotes ima mask'arqanku imaynamantachus Jesusta wañuchinankuta, imaraykuchus Payta manchachikorqanku, tukuy runas yachachisqanta t'ukuspa uyarisqankurayku. 19 Ch'isiyaykuytataj Jesús, yachachisqasnin ima llajtamanta riporqanku. 20 Q'ayantenqa tutamanta ñanta rishaspa, maldecisqa karqa, chay higo sach'ata rikorqanku saphinmantapacha ch'akisqata. 21 Pedrotaj Jesuspa nisqanta yuyarikuspa, nerqa: Yachachej Señor, qhawariy, maldecisqayki higo sach'aqa ch'akipusqa, nispa. 22 Jesustaj kuticherqa: Diospi tukuy sonqo creeychej. 23 Cheqatapuni niykichej: Sichus pipis kay orqota ninman: Jatariy, jatun qochaman wijch'uykukuy, nispa, sonqompitaj mana iskayrayaspa creen chayqa, paypa nisqan ruwasqa kanqa. 24 Chayrayku Noqa niykichej: Diosmanta imatapis mañakuspaqa, jap'inaykichejta creeychej, jap'inkichejtaj. 25 Diosmanta mañakushaspa, sichus pillawampis mana allimpi kawajchej chayqa, payta perdonapuychej; ajinamanta, janaj pachapi kaj Tataykichejpis juchasniykichejta pampachanqa. 26 Manachus runa masiykichejta perdonawajchej chayqa, nillataj janaj pachapi kaj Tataykichejpis juchasniykichejta pampachanqachu. 27 Ajinamanta Jerusalenman kutirimorqanku. Chantá Jesús Templopi purishajtin, Payman chimpamorqanku kuraj sacerdotes, leymanta yachachejkuna, kurajkuna ima. 28 Paykunataj Jesusta taporqanku: Ima atiywan kay tukuy imasta ruwankiri? Pitaj kay atiyta qosorqa kay imasta ruwanaykipaj? nispa. 29 Jesustaj paykunaman kuticherqa: Noqapis ujta tapullasqaykichejtaj; sichus chayman kutichiwankichej chayqa, Noqapis willasqaykichej ima atiywanchus kay imasta ruwasqayta. 30 Niwaychej: Pitaj Juanta bautizanampaj churarqa, Dioschu, chayrí runaschu? nispa. 31 Paykuna ukhutaj ninakusharqanku: Dios churarqa nisun chayqa, Pay niwasun: Imaraykutaj chantá mana paypa nisqanta creerqankichejchu? nispa. 32 Juanta runas churanku, nispa nejtinchejrí, runastañataj manchachikunchej, imaraykuchus tukuy yuyanku Juanqa profetapuni kasqanta. 33 Ajinamanta Jesusman kuticherqanku: Mana yachaykuchu, nispa. Chaymantataj Jesús paykunaman nerqa: Noqapis manallataj niykichejmanchu ima atiywanchus kay imasta ruwasqayta, nispa.
