MALAQUÍAS 4

1Tukuy Atiyniyoj Tata Diosqa nin: Horno jina larwaj p'unchay qayllamushan, chay p'unchaypitaj tukuy jatunchakojkuna, tukuynin sajra ruwajkunataj ichhu jina ruphanqanku. Chay jamoj p'unchaypi ninaqa paykunata tukuyninkuta q'olanqa, nitaj imapis chaypacha paykunamanta puchonqachu. 2Qankuna Noqata manchachikojkunapajrí, cheqan kayniy inti jina lliphipirenqa, k'anchaynimpi salvacionta apamuspa. Qankunaqa kusiywan phinkirinkichej, imaynatachus torillos corralmanta llojsispa sink'urinku, ajinata. 3Wakichishani, chay p'unchaypi qankunaqa sajra runasta sarurparinkichej jallp'ata jina. 4Horeb Orqo nisqapi kamachiy Moisesman kamachisqasniyta qorqani, qankunataj chaykunamanta yuyarikuychej. Chay kamachisqasneyqa tukuy israelitaspaj karqanku. 5Sumajta uyariwaychej: Elías profetata kachamusqaykichej, Tata Diospa p'unchaynin manaraj chayamushajtin, mayqenchus uj jatun p'unchay kanqa, ancha manchachikunataj, chay p'unchay. 6Paytaj tataspa sonqonkuta wawasninkuwan allinyachenqa, wawaspa sonqonkutapis tatasninkuwan. Mana jinata ruwajtinkoqa, Noqa jamuspa, tukuy nacionta castigasaj, tukuyninta chinkachinaykama.

will be added

X\