MALAQUÍAS 1

1Kay willayta Israel aylluman Tata Dios willarqa Malaquías profetanejta. 2Tata Diosqa nin: Noqa qankunata munakuykichej, nispa. Qankunatajrí niwankichej: Imaynapi yachayku Qan munakuwasqaykuta? nispa. Chantá Tata Diosqa kutichin: Esauqa Jacobpa wawqen karqa; chaywampis Noqa Jacobta munakorqani, 3Esautataj chejnerqani. Esaujpata jallp'an ashkha orqosniyoj karqa; chaytaqa ch'in lomasman tukucherqani, jallp'asnintataj k'ita animalesllaña kawsanankupaj jina. 4Esaujpa miraynin Edom llajtayojkunachus ninkuman: Phirisqa karqanchej; chaywampis watejmanta llajtanchejta sayachinallataj, nispa chayqa, Tukuy Atiyniyoj Tata Diosqa kutichinman: Watejmanta llajtankuta ruwankuman chaypis, ujtawan phirillasajtaj. Chay llajtankutaqa sutichanqanku: Sajra Ruwaj Nación, chayrí Wiñaypaj Tata Diospa Phiñakunan Nación, nispa. 5Qankunataj chayta ñawisniykichejwan rikunkichej. Chantá ninkichej: Israel nacionmantapis aswan jaqaynejkamaraj Tata Diosqa jatunchasqa kashan, nispa. 6Tukuy Atiyniyoj Tata Diosqa sacerdotesta nin: Wawasqa tatasninkuta jatumpaj qhawanku, uywasqaspis patronesninkuta jatumpaj qhawallankutaj. Sichus Noqa Tataykichej kani chayqa, sacerdotes, imaraykutaj mana jatumpaj qhawawankichejchu? Sitajchus qankunajta Señorniykichej kani chayqa, imaraykutaj mana manchachikuwankichejchuri? Astawampis qankuna Noqata pisipaj qhawawaspa, ninkichejraj: Imaynapitaj Qanta pisipaj qhawawaykuri? nispa. 7Qankunaqa altarniyman mana llimphupaj qhawasqa t'antata apamunkichej, chantá ninkichejraj: Imapi Qanta phiñachiyku? nispa. Qankunaqa sonqoyta nanachiwankichej, altarneyqa pisipaj qhawanalla kasqanta yuyaspa. 8Onqosqa uywasta, ciegosta, chakin p'akisqasta ima apamuwasqaykichejqa allillanchu? Riychej ari, qankunata kamachej runasman jaywamuychej chay onqosqa uywasta, chantá yachankichej, paykuna kusiywanchus chay jaywasqaykichej uywasta jap'ikonqanku manachus, chayta. 9Kunanqa ari, Diosmanta mañakuychej khuyasunaykichejta. Chaywampis, sichus chay laya ofrendata jaywankichej chayqa, ama yuyaychejchu Diosqa uyarinasuykichejta, nispa nin Tukuy Atiyniyoj Tata Diosqa. Chantá Tata Diosqa nillantaj: 10Noqa munayman mayqellampis qankunamanta Templo punkuta wisq'aykunanta, ama ujtawan qhasi manakajpaj altarniypi nina jap'ichisqa kanampaj. Qankunawanqa sonqoy mana junt'asqachu kashan, ofrendasniykichejtapis mana jap'isajñachu. 11Tukuy kay pachapi sutiyta jatumpaj qhawanku; tukuynejpi inciensota Noqapaj q'oshñichinku, ofrendastapis maychus qonawankuta qowanku, imaraykuchus suteyqa may jatunmin tukuy nacionespi, nispa nin Tukuy Atiyniyoj Tata Diosqa. 12Qankunatajrí sonqoyta nanachiwankichej, imaraykuchus altarneyqa pisipaj qhawanalla kasqanta ninkichej, jinallataj chaypi mikhuna kajtapis. 13Qankuna ninkichej: Kay yupaychanaswanqa sayk'usqasña kayku, nispa. Chayta nispa, pisipaj qhawawankichej. Chantá yuyankichejraj kusikunayta, maypachachus Noqaman apamuwankichej suwasqa uywata, chakin p'akisqata, chayrí onqosqatapis chaypacha, nispa nin Tukuy Atiyniyoj Tata Diosqa. 14Maldecisqa kachun pichus ni iman imanasqa uywata qonawanta nishaspa, onqosqa kajta jaywawajqa, imaraykuchus Noqaqa jatun Reymin kani, tukuy nacionespa manchachikunankutaj, nispa nin Tukuy Atiyniyoj Tata Diosqa.

will be added

X\