1 Uj samarikuna p'unchaypi, Jesusqa trigo chajraj chawpinta rishajtin, yachachisqasnin trigo umasta p'itiytawan, makisninkuwan khakuspa mikhorqanku. 2 Fariseostajrí paykunata taporqanku: Imaraykutaj mana ruwanata samarikuna p'unchaypi ruwankichej? nispa. 3 Jesús kuticherqa: Manachu leerqankichej imatachus David, chantá paywan kajkunapis yarqhachikuspa ruwasqankuta? 4 Davidqa Diospa wasinman yaykuytawan, Diospaj t'aqasqa t'antata oqharispa, mikhorqa, paywan kajkunamampis jaywarqa, yachashaspa sacerdotesllapaj kasqanta, nispa. 5 Jesús nillarqataj: Runaj Churenqa samarikuna p'unchaypa Señornin, nispa. 6 Waj samarikuna p'unchaypi sinagogaman yaykuspa Jesús yachachishajtin, chaypi kasharqa uj runa paña makin ch'akisqa. 7 Chaypacha leymanta yachachejkunawan, fariseoswan wateqasharqanku Jesusta, samarikuna p'unchaypi sanoyachejtin ch'ataykunankupaj. 8 Jesustajrí imatachus yuyasqankuta yachaspa, nerqa makin ch'akisqa runaman: Sayariy; kay chawpiman jamuy, nispa. Runataj sayarqa ñawpaqenkupi. 9 Chantá Jesús runasman nerqa: Ujta tapurisqaykichej: Samarikuna p'unchaypeqa allin kajtachu ruwana, chayrí sajratachu? Mayqentaj aswan walejri; runataqa wañuymanta salvanachu, chayrí wañojta saqenallachu? nispa taporqa Jesusqa. 10 Muyuyninta qhawarispataj, nerqa runaman: Jaywariy makiykita, nispa. Jaywarejtinkama, paypa makin sanoyaporqa. 11 Kurajkunarí phiñarikuspa, paykunapura parlanakorqanku imatachus Jesusta ruwanankuta. 12 Chantá Jesusqa rerqa uj orqoman Dios Tatamanta mañakoj; sut'iyanankama mañakorqa. 13 Sut'iyamojtintaj, yachachisqasninta wajyaspa, paykunamanta ajllarqa chunka iskayniyojta, nerqataj apóstoles kanankuta. 14 Paykunaqa kaykuna karqanku: Simón, pitachus Pedrota suticharqa, chay, Simonpa wawqen Andreswan; Santiago, Juanwan; Felipe, Bartolomewan; 15 Mateo, Tomaswan; Alfeoj churin Santiago, Simón, Zelote nisqawan; 16 Santiagoj wawqen Judas, chantá Judas Iscariote, pichus Jesusta jap'ichinan karqa, chaywan ima. 17 Jesusqa paykunawan orqomanta urayk'amuspa, uj pampaman chayarqa. Chaypi Payta suyasharqanku ashkha yachachisqasnin, ashkha runastaj tukuy Judeamanta, Jerusalén llajtamanta, qocha kantupi Tiro llajtasmanta, Sidón llajtasmanta ima. 18 Paykunaqa jamusqanku Jesusta uyarinankupaj, onqoyninkumantapis sanoyasqa kanankupaj. Sajra espirituswan ñak'arejkunapis kacharichisqallataj karqanku. 19 Tukuyninkutaj Payta llankhariyta munarqanku, imaraykuchus tukuyta sanoyachej ateyqa Paymanta llojsimoj. 20 Chantá Jesús yachachisqasninta qhawarispa, nerqa: Kusikuyniyojmin kankichej qankuna wajchas, imaraykuchus qankunajtamin Diospa janaj pacha reinonqa. 21 Kusikuyniyojmin kankichej kunan yarqhachikojkunaqa, imaraykuchus sajsachisqa kankichej. Kusikuyniyojmin kankichej kunan waqajkunaqa, imaraykuchus kusirikunkichej. 22 Kusikuyniyojmin kankichej runas chejnisojtiykichej, qharqosojtiykichej, rimasojtiykichej, sajra runasta jina qhesachasojtiykichej Runaj Churinrayku. 23 Chaypacha kusikunkichej jatun kusiywan, imaraykuchus t'inkaykichejqa janaj pachapi jatun kanqa. Jinallatataj ñawpa runaspis profetasta ñak'arichej kanku. 24 Ay qankunamanta qhapajkuna, imaraykuchus sonqochasqaña kankichej. 25 Ay qankunamanta sajsasqas, imaraykuchus qhepaman yarqhachikunkichej. Ay qankunamanta kunan asikojkuna, imaraykuchus qhepaman llakikunkichej, waqankichejtaj. 26 Ay, tukuy runas qankunamanta allinta parlajtinku. Jinallatataj ñawpa runas ruwaj kanku llulla profetaswan. 27 Qankuna uyariwajkunamanqa niykichej: Munakuychej enemigosniykichejta; allin kajta ruwaychej qankunata chejnejkunapaj. 28 Allinta parlaychej qankunata maldecejkunapaj, Diosmantataj mañapuychej qhasimanta qankunata tumpajkunapaj. 29 Pipis uj lado uyaykipi laq'asojtenqa, uj ladotawan rikuchiy; pipis sacoykita qhechusojtenqa, camisaykitawan qopuy. 30 Mañakusojmanqa qoy; qampata kajta apakapojmantapis ama mañakapuyñachu. 31 Imaynatachus munankichej runas qankunapaj ruwanankuta, ajinallatataj qankunapis paykunapaj ruwaychej. 32 Sichus munakunkichej qankunata munakojkunallata chayqa, ima allinta ruwankichejri? Chaytaqa juchasapaspis ruwallankutaj. 33 Allinta ruwajkunallapaj allinta ruwajtiykichejqa, ima aswan allintaj ruwasqaykichejri? 34 Kutichipusunaykichejta suyaspallachus mañarinkichej chayqa, ima allintataj ruwankichejri? Juchasapaspis mañarinakullankutaj, imaraykuchus purajmanta mask'anku imallatapis jap'iyta munaspa. 35 Enemigosniykichejta munakuychej, allinta ruwaspa, mañariychejtaj ama imata paykunamanta suyaspa. Jinamanta t'inkaykichejqa jatun kanqa, qankunataj janaj pachapi kaj Diospa wawasnin kankichej. Payqa khuyan mana yuyarikojkunata, sajra sonqoyojkunata ima. 36 Qankunapis khuyakojkuna kaychej ari, imaynatachus Tataykichejpis khuyakoj, ajina. 37 Ama pitapis juchachaychejchu ama juchachasqa kanaykichejpaj, nitaj juzgaychejchu ama juzgasqa kanaykichejpaj. Perdonaychej, qankunapis perdonasqa kanaykichejpaj. 38 Qoriychej wajkunaman, qankunamampis qorillasonqachejtaj, jap'inkichejtaj wayaqaykichej phullchirishajta, mat'i winasqata, thalaykurisqata. Ima chimpuwanchá midinkichej, chayllawantaj qankunamampis midisonqachej, nispa nerqa Jesusqa. 39 Jesús nillarqataj uj rijch'anachinata: Atinmanchu uj ciegoqa waj ciegota pusaykachayta? Manachu iskayninku t'oqoman urmaykonqanku? 40 Yachakojqa mana yachachejninta atipanchu; chaywampis sumajta yachaqakuspaqa, yachachejnin jina kanqa. 41 Imaraykutaj wawqeykej ñawimpi q'opata qhawanki, qampa ñawiykipitaj kurkuta mana rikukunkichu? 42 Imaynatataj wawqeykita niwaj: Wawqéy, saqeway ñawiykimanta chay q'opata orqhojta, nispa, qampa ñawiykipitaj kurkuta mana rikukuspari? Puraj uya. Ñawiykimantaraj ñawpajta kurkuta orqhokuy, chantá allinta qhawarispa, atinki orqhoyta wawqeykej ñawinmanta q'opata. 43 Mana kanchu sumaj sach'a mana walejta poqoj, nitaj kanchu mana walej sach'a sumajta poqoj. 44 Sapa sach'aqa poqoynimpi rejsikun. Higostaqa mana khishkasmantachu pallanku, nillataj uvastapis thaqosmantachu. 45 Sumaj runaqa llimphu sonqonmanta allinta parlan. Sajra runatajrí, sajra sonqonmanta sajrallatataj parlan. Imawanchus sonqon junt'a kasqanman jina simenqa parlan. 46 Imaraykutaj: Señor, Señor, nispa nillawankichej, manataj nisqayta ruwankichejchu? 47 Pichus Noqaman jamuspa, nisqasniyta uyarin, ruwantaj chayqa, nisqaykichej chay runaqa pimanchus rijch'akusqanta. 48 Chay runaqa rijch'akun wasita ruwakojman, pichus ñawpajta sumaj ukhuta allasqa chhankata taripanankama, chaypitaj rumi cimientota churasqa, chayman. Yaku chayamojtintaj, mayoqa manchayta junt'aykuspa wasiman wajtakamusqa, manataj waseqa imanakusqachu, imaraykuchus chhanka patapi ruwasqa kasqa. 49 Sichus pipis nisqayta uyarishaspa mana ruwan chayqa, payqa rijch'akun t'iyu patapi wasita ruwakojman. Mayoqa chayamuspa, wasiman wajtakamusqa, urmachisqataj. Chay thuñikuynenqa manchay kasqa, nispa nerqa Jesusqa.
