1 Jesusqa kuterqa Jordán Mayumanta Espíritu Santowan junt'asqa, chay Espiritutaj Payta pusarqa ch'in pampaman. 2 Chaypeqa tawa chunka p'unchayninman Kuraj Supayqa Jesusta juchaman urmachiyta munarqa. Chay tawa chunka p'unchaypi mana imata mikhusqanraykutaj Jesusqa yarqhachikorqa. 3 Chantá Kuraj Supayqa nerqa Jesusta: Sichus Diospa Churin kanki chayqa, niy kay rumeqa t'antaman tukunanta, nispa. 4 Jesustajrí kuticherqa: Diosmanta Qhelqasqapi nin: Mana t'antallawanchu runaqa kawsanqa, nispa. 5 Chantá Kuraj Supayqa orqo pataman Jesusta pusaspa, uj ñawi ch'irmiypi rikucherqa tukuy kay pachapi reinosta, 6 nerqataj: Kay tukuy atiyta qosqayki, tukuy kapuynintawan, imaraykuchus noqaman qosqa karqa; chayrayku pimanchus munani, chayman qoyta atini. 7 Sichus ñawpaqeypi qonqoriykukuspa, yupaychawanki chayqa, kay tukuynin Qampata kanqa, nispa. 8 Jesustajrí kuticherqa: Diosmanta Qhelqasqapi nin: Señor Diosniykita yupaychanki, Pay sapallantataj sirvinki, nispa. 9 Chaymanta Kuraj Supayqa Jerusalén llajtaman Jesusta pusarqa, Templo patapi sayaykuchispataj, nerqa: Diospa Churinchus kanki chayqa, wijch'uykukuy pampaman. 10 Diosmanta Qhelqasqapi nin: Angelesninta kachamonqa waqaychasunankupaj, nispa. 11 Chantá nillantaj: Makisninkupi jap'isonqanku, ama chakiykita rumipi takakunaykipaj, nispa. 12 Jesustajrí kuticherqa: Diosmanta Qhelqasqapi nillantaj: Señor Diosniykita ama pruebata ruwankichu, nispa. 13 Chantá Kuraj Supayqa Jesusta chaypacha juchaman urmachiyta munaspa tukuytawan, pachampi saqespa, pisi tiempota chinkarerqa. 14 Jesús kuterqa Galileaman, Espíritu Santoj atiynintaj Paypi karqa. Tukuynejpi Payllamanta parlasharqanku. 15 Payqa yachachisharqa sinagogaspi, tukuytaj Jesusta mayta jatunchaj kanku. 16 Jesusqa Nazaret llajtanmanñataj rerqa, maypichus uywasqa karqa, chayman. Samarikuna p'unchaypi sinagogaman yaykuspa, usunkuman jina Diosmanta Qhelqasqata leej sayaykorqa. 17 Chaypaj Payman jaywarqanku profeta Isaiaspa libronta, kicharispataj, Pay tarerqa kay jina qhelqasqata: 18 Señorpa Espíritun Noqapi kashan; jawiwaspa ajllawarqa sumaj willanasta wajchasman willanaypaj; kachamuwarqataj willajta presos kacharisqa kanankupaj, ciegos qhawarinankupaj, ñak'arejkunataj samarichisqa kanankupaj, 19 Señorpa allin watanmantapis willanaypaj, nispa. 20 Chantá Jesusqa librota wisq'aspa, waqaychajman jaywaytawan, tiyaykorqa. Tukuy chay sinagogapi kajkunataj Payta qhawasharqanku. 21 Parlayta qallarispataj, paykunaman nerqa: Qhelqasqapi Diospa nisqan kunan p'unchaypi junt'akushan, kay uyariwasqaykichejman jina, nispa. 22 Ancha allimpuni Jesusqa tukuyninkuman rijch'arqa, chay jinata parlasqanmantataj t'ukuspa, tapunakorqanku: Manachu kayqa Josejpa churin? nispa. 23 Chantá Jesús nerqa: Niwankichejchari kay nisqata: Médico, Qan kikiykita jampikuy. Astawanqa, Capernaumpi chay ruwasqasniykita uyarisqaykuta kay llajtaykipipis ruwallaytaj ari, nispa. 24 Nillarqataj: Cheqatapuni niykichej: Mana mayqen profetapis allimpaj qhawasqachu kikin llajtampeqa. 25 Cheqatapuni nillaykichejtaj: Ashkha viudas karqanku Israel naciompi Eliaspa tiempompi; chaypachaqa kinsa wata sojta killayojta mana pararqachu, chaynejtataj anchapuni yarqhay karqa tukuynejpi. 26 Diostajrí Eliastaqa mana ni mayqen israelita viudamanchu kacharqa, manachayqa Sidonpi kaj Sarepta llajtapi tiyakoj viudallaman. 27 Jinallataj Israelpeqa profeta Eliseoj tiempompi karqanku leprawan ashkha onqosqas; chaywampis mana ni mayqen llimphuchasqachu karqa, manachayqa Siriamanta Naamanlla, nispa nerqa Jesusqa. 28 Chay tukuy imasta uyarispa, sinagogapi tukuy kajkuna phiñarikorqanku. 29 Sayarispataj, llajtamanta Jesusta qharqorqanku, pusarqankutaj orqo pataman, maypichus llajtanku karqa chaynejman, qaqaman tanqaykunankupaj. 30 Jesustajrí paykunaj chawpinkuta llojsispa, riporqa. 31 Chaymanta Jesusqa rerqa Galileapi Capernaum llajtaman. Chaypitaj runasman yachacherqa samarikuna p'unchaypi. 32 Runasqa mayta t'ukorqanku yachachisqanmanta, imaraykuchus parlasqanqa atiyniyoj karqa. 33 Chaypacha sinagogapi millay supayniyoj uj runa sinch'ita qhaparispa, nerqa: 34 Saqewayku ari. Ima nispa noqaykuwan jap'inakoj jamunki, Nazaretmanta Jesús? Noqaykuta tukuchejchu jamunki? Noqa yachani pichus kasqaykita: Qanqa Diospa santo kaj ajllakusqan kanki, nispa. 35 Chantá Jesusqa chay supayta sinch'ita k'amerqa: Ch'in kay, llojsiy chay runamanta, nispa. Chay supaytaj paykunaj ñawpaqenkupi runata urmachispa, llojsiytawan riporqa, mana astawan imanaspa. 36 T'ukuspataj, tukuyninku parlanakorqanku: Imataj kayri? Kay runaqa atiywan, kallpawantaj supaykunatapis qharqon, kasunkutaj, nispa. 37 Chayrayku Jesusqa may mentasqa karqa tukuy chaynejpi. 38 Sinagogamanta llojsimuspa, Jesusqa yaykorqa Simonpa wasinman. Chaypacha Simonpa suegran sinch'i k'aja onqoywan kasharqa. Chaypi kajkunataj Jesusta mañakorqanku payta sanoyachinampaj. 39 Chantá Pedroj suegranman qayllaykuspa, Jesusqa k'amerqa k'aja onqoyninta, paytaj sanoyaporqa. Chay ratopacha jatarimuytawan, paykunaman sirverqa. 40 Inti yaykuykushajtinña, runasqa imaymana onqoyniyojkunata Jesusman pusamorqanku, Paytaj sapa ujta makinwan llankhaykuspa, sanoyacherqa. 41 Jinallatataj supaykuna llojsirarqanku ashkha onqosqasmanta, qhaparerqankutaj: Qanqa Diospa Churin kanki, nispa. Paytajrí supaykunata k'amispa, ch'inyacherqa, imaraykuchus yacharqanku Pay Cristo kasqanta. 42 Sut'iyayta llajtamanta llojsispa, Jesusqa rerqa ch'innejman. Runastaj tarinankukama Payta mask'arqanku, jark'ayta munaspa ama ripunampaj. 43 Paytajrí nerqa: Wajkunamampis Diospa reinonmanta evangeliota willamunallaytaj tiyan, imaraykuchus chaypaj kachamusqa kani, nispa. 44 Ajinata Jesusqa Judea sinagogaspi willaraj.
