1 Uj p'unchay Jesusqa Templopi yachachisharqa runasman, evangeliomanta willaspa. Jinallapi chayamorqanku kuraj sacerdotes, leymanta yachachejkuna, kurajkunawan ima. 2 Chantá Jesusman nerqanku: Niwayku ari, ima atiywantaj kay imasta ruwanki? Chayrí, pitaj kay atiyta qosunki? nispa. 3 Jesustaj kuticherqa: Kunanqa, Noqapis ujta tapurillasqaykichejtaj. Niwaychej: 4 Pitaj Juanta bautizanampaj churarqa, Dioschu, chayrí runaschu? nispa. 5 Chaypacha paykunapura siminakuyta qallarerqanku: Dios churarqa, nispa nisunman chayqa, Payqa niwasun: Imaraykutaj chantá paypa nisqanta mana creerqankichejchu? nispa. 6 Juanta runas churanku, nispa nisunman chayrí, tukuy llajtantinñataj rumiswan ch'anqaykuwasunman, imaraykuchus paykunaqa yuyanku Juan profetapuni kasqanta, nispa. 7 Chantá kuticherqanku: Mana yachaykuchu, nispa. 8 Chaymantataj Jesús nerqa: Nillataj Noqapis niykichejmanchu ima atiywanchus kay tukuy imata ruwasqayta, nispa. 9 Jesusqa runasman parlayta qallarispa, kay rijch'anachinata willarqa: Uj kuti, uj runa jallp'ampi plantasqa uvasta. Llank'ajkunaman partidopi qospataj, ch'usasqa unaypaj. 10 Uvas pallay tiempotataj, kachamusqa ujnin kamachinta, patrompata kajta apanampaj llank'ajkunamanta; paykunatajrí chay kamachita maqaykuytawan, ch'usaj makillata kachapusqanku. 11 Chantá patronqa waj kamachintañataj kachamusqa. Chay kajtapis, alqochakuytawan, ujtawan maqaykuspa ch'usaj makillata kachapullasqankutaj. 12 Ujnin kaj kamachintañataj patronqa kachamusqa; chay kamachintapis llank'ajkunaqa qharqollasqankutaj, maqaykuspa yawar pukallata. 13 Chantá uvas huertayojqa nisqa: Imanasajtaj kunanri? Munasqa churiytañataj kachasaj; ichapis paytaqa manchachikonqanku, nispa. 14 Chaywampis llank'ajkunaqa yachachinakuspa, nisqanku: Kayqa herenciata jap'ej runa; payta wañurparichinachej, noqanchejpaj herencia qhepakunampaj, nispa. 15 Chantá, chajramanta jawaman orqhoytawan, payta wañurparichisqanku. Chaymanta, Jesusqa paykunata taporqa: Imananqataj chay llank'ajkunata uvas huertayojri? 16 Jamuspa, wañurachenqa chay llank'ajkunata, jallp'antataj waj llank'ajkunaman qonqa. Chayta uyarispa, runasqa nerqanku: Ama chaytaqa Dios munallachumpischu, nispa. 17 Jesustajrí qhawarispa, nerqa: Chantá ima niytataj munan kay qhelqasqari: Wasi ruwajkunaj qhesachasqanku rumeqa aswan sumaj wasis esquina rumiman tukupun, nispa? 18 Pillapis chay rumi pataman urmaykojqa t'unasqa kanqa; chantá pejpa patanmanchá chay rumi urmaykonqa, chayqa phirisqa kanqa, nispa. 19 Kuraj sacerdotes, leymanta yachachejkuna ima Jesusta chay kikimpi jap'iykuyta munarqanku, imaraykuchus reparakorqanku contrankuta nisqanta chay rijch'anachinawan; chaywampis, runasta manchachikorqanku. 20 Chantá Jesusta wateqaspa, allinman tukoj puraj uya runasta kacharqanku, jinamanta Jesusta ima parlasqallampipis jap'ispa, kamachejpa makinman jaywaykunankupaj. 21 Paykuna taporqanku: Yachachej Señor, yachayku allinta nisqaykita, cheqantataj yachachisqaykita. Qanqa mana runaj uyanta qhawarispallachu ruwanki, astawanqa Diospa ñanninta cheqata yachachinki. 22 Ima ninkitaj Qan: Allinchu kanman impuestota Cesarman pagana, chayrí manachu? 23 Jesustajrí sajra yuyayninkuta yachaspa, nerqa: 24 Rikuchiwaychej uj phisuta. Pejpa uyantaj, chantá pejpa sutintaj kay phisupi churasqa kashan? nispa. Paykunataj nerqanku: Cesarpata, nispa. 25 Chantá Jesús paykunaman nerqa: Jina kajtenqa, Cesarpata kajtaqa Cesarman qopuychej, Diospa kajtataj Diosman qopuychej, nispa. 26 Manataj imaynamantapis parlasqampi pantachiyta aterqankuchu runaspa ñawpaqempi, astawanqa kutichikusqanmanta t'ukuspa, ch'inyarqanku. 27 Chaymantaqa wakin saduceosñataj Jesuswan parlaj rerqanku. Saduceosqa mana creejchu kanku wañusqas kawsarimpunankuta. Chantá Jesusta taporqanku: 28 Yachachej Señor, noqanchejpajqa Moisés saqerqa qhelqasqata: Sichus pi runapis mana wawasniyoj wañun chayqa, wawqen casarakuchun chay viudawan, wañoj wawqempa miraynin rikhurinampaj, nispa. 29 Qanchis wawqes karqanku; ñawpaj kajqa casarakuspa, mana wawasniyoj wañuporqa. 30 Qhepa kaj casarakullarqataj chay viudawan. Paypis wañupullarqataj mana wawasniyoj. 31 Chantá kinsa kajñataj casarakorqa chay warmiwan. Ajinamanta qanchisnintin wañuporqanku, mana mayqenninkupis wawasta saqespa. 32 Tukuyninkoj qhepantataj chay warmipis wañupullarqataj. 33 Chantá, kawsarimuypeqa, mayqenninkoj warmintaj kanqa, qanchisnintin kawsarimpojtinkuri, imaraykuchus qanchisnintinwan casarakusqa, nispa. 34 Chantá Jesusqa paykunaman kuticherqa: Kay pachapi runasqa casarakunku, casarachinkutaj. 35 Wañusqakunamanta kawsarimpuspa janaj pachaman chayajkunaqa manaña casarakonqankuchu, nitaj casarachenqankuchu. 36 Manañataj wañonqankuchu, imaraykuchus paykunaqa ángeles jinallaña Diospa wawasnin kanqanku, wañusqasmanta kawsarimpusqankurayku. 37 Wañusqaspa kawsarimuyninmantaqa Moisesña yachacherqa khishkarara ch'awjra larwajpi Señorqa kasqanta Abrahampata Diosnin, Isaacpata, Jacobpata ima. 38 Diosqa mana wañusqaspa Diosninchu, manachayqa kawsajkunajta. Paypajqa tukuy kawsashanku, nispa nerqa Jesusqa. 39 Chantá leymanta yachachejkunamanta wakinkuna nerqanku: Yachachej Señor, ancha sumajta kutichinki, nispa. 40 Chaymantataj manaña imatapis taporqankuchu. 41 Chaypacha Jesusqa paykunaman nerqa: Imaraykutaj ninku Cristoqa Davidpa Churin kasqanta? 42 Davidpuni Salmos libropi nin: Señorqa Señorniyman nerqa: Tiyakuy pañaynejpi, 43 enemigosniykita chakisniyki uraman churanaykama, nispa. 44 Chantá, imaynatataj Cristoqa Davidpa Churin kanman, Davidllataj Señor nishajtinri? 45 Tukuy runas uyarishajtinku, Jesusqa yachachisqasninman nerqa: 46 Leymanta yachachejkunamanta qhawakuychej. Paykunaqa qhoysu p'achaswan purispa, plazaspi napaykuchikuyta munanku, sinagogaspipis aswan sumaj tiyanasta ajllarikunku. Jatun mikhuykunapipis ñawpajpipuni tiyayta munanku. 47 Chaywampis viudaspa kapuyninkuta oqokapunku, mana jina kasqankuta reparachikunankupajtaj unay unayta Diosmanta mañakoj tukunku. Chay runasqa aswan sinch'i ñak'ariywan castigasqa kanqanku.
