1 Jesusqa yachachisqasninman nerqa: Juchaman urmachinas kallanqapuni; chaywampis ay, imapichus paranqa wajkunata juchaman urmachej runaqa? 2 Aswan allin kanman paypajqa, molino rumita kunkanman warkhuykuspa, jatun qochaman wijch'uykunanku, kay juch'uykunamanta ujninta urmachinanmanta nisqaqa. 3 Qankuna kikiykichejta qhawarikuychej. Wawqeyki qampa contraykita juchallikojtenqa, k'amiy; mana walejta ruwasqanta reparakojtintaj, perdonapuy. 4 Qanchis kutitachus uj p'unchaypi contraykita juchallikuspa, sichus qanchis kutita kutimun: Perdonaway, nispa chayqa, perdonapuy. 5 Apostolesqa Señorta nerqanku: Astawan creeyta yanapawayku, nispa. 6 Señortaj kuticherqa: Creeyniykichejchus uj mostaza muju jinallapis kanman chayqa, atiwajchej kay sach'ata niyta: Sik'ikuy, jatun qochapitaj saphichakuy, nispa, kasusunkichejmantaj. 7 Pitaj qankunamanta, kamachin campopi llank'asqanmanta, kutimojtin, chayrí uywasta qhawasqanmanta, niwajchej: Yaykumuy; mikhunaykipaj tiyaykukuy, nispa? 8 Manachu astawanqa niwajchej: Wakichikuy wayk'unaykipaj, jaywawaytaj mikhunata, ujyanata ima sajsakunaykama; chaymantaraj qanqa mikhunki, ujyankitaj, nispa? 9 Patronqa mana agradecekunchu kamachin ajinata kasusqanmanta. 10 Ajinallatataj qankunapis Diospa kamachisqanta ruwayta tukuytawankama, ninaykichej: Mana walej kamachis kanchej; ruwanallanchejta ruwanchej, nispa. 11 Jesusqa Jerusalenman rishaspa, pasarqa Samarianejta, Galileanejta ima. 12 Uj ranchoman qayllaykushajtintaj, chunka runas lepra onqoyniyoj Paywan tinkukoj llojsimorqanku. Paykunataj karullapi sayaykuspa, 13 qhaparerqanku: Yachachej Jesús, khuyariwayku ari, nispa. 14 Paykunata rikuspa, Jesusqa nerqa: Riychej, sacerdotesman rikuchikamuychej, nispa. Paykunataj rishaspallaraj, chay lepra onqoymanta sanoyachisqa rikhurerqanku. 15 Paykunamanta ujnin kajtaj lepra onqoymanta sano rikhurispa, kutirimorqa, Diostataj jatunmanta jatunchasharqa. 16 Jinapi Jesuspa ñawpaqenman wijch'uykukuspa, graciasta qorqa. Chay runataj samaritano karqa. 17 Chantá Jesús taporqa: Manachu chunka karqanku sanoyachisqasqa? Maypitaj chay jisq'on kashankuri? 18 Manachu pipis kutimorqa Diosta jatunchaj, manachayri kay forasterollachu? nispa. 19 Chaymantataj Jesusqa chay runaman nerqa: Sayariy, ripuy; creesqaykirayku sanoyasqa kanki, nispa. 20 Fariseosqa Jesusta taporqanku: Mayk'ajtaj Diospa reinon chayamonqa? nispa. Jesustaj kuticherqa: Diospa reinonqa mana reparayllata jamonqa. 21 Nitaj runasqa nenqankuchu: Kaypi kashan, nispa; chayrí: Jaqaypi kashan, nispa. Diospa reinonqa qankuna ukhupiña kashan, nispa nerqa Jesusqa. 22 Chantá Jesús yachachisqasninman nerqa: Tiempo chayamonqa, chaypachataj qankuna Diospa Churimpa ujnin p'unchaynillantapis rikuyta munaspapis, mana rikunkichejchu. 23 Chaypacha wakin runas nisonqachej: Kayqa, kaypi kashan; jaqayqa, jaqaypi kashan, nispa. Ama ari riychejchu, nitaj qhatiychejchu. 24 Imaynatachus lliuj lliujqa, cieloj uj k'uchunmanta uj k'uchunkama k'ancharin, ajinallataj kanqa Runaj Churimpa jamunan p'unchaypi. 25 Ñawpajtaqa Runaj Churin anchataraj ñak'arinan tiyan, qhesachasqataj kanqa kunan tiempo runasnejta. 26 Imaynatachus Noejpa tiempompi karqa, ajinallataj Runaj Churimpa jamuynimpipis kanqa: 27 Mikhusharqanku, ujyasharqanku, casarakusharqanku, ususisninkutapis casarachisharqanku, Noeqa arcaman yaykunankama. Jatun parataj chayamuspa, tukuyninkuta chinkacherqa. 28 Jinallataj karqa Lotpa tiempompipis. Mikhusharqanku, ujyasharqanku, rantisharqanku, qhatusharqanku, tarpusharqanku, wasistapis ruwasharqanku. 29 Sodoma llajtamanta Lot llojsimojtinkamataj, cielomanta azufreyoj nina para paramorqa, tukuyninkutataj tukucherqa. 30 Ajinallataj kanqa, Runaj Churin rikhurimonqa, chay p'unchaypi. 31 Chaypacha, pichus wasi patapi kashajqa ama urayk'amuchunchu imallatapis wasinmanta orqhokapoj. Jinallatataj, pichus chajrapi kajpis ama wasinman kutimuchunchu. 32 Lotpa warminmanta yuyarikuychej. 33 Kawsayninta waqaychayta munajqa chinkachenqa, chinkachejtajrí kawsayninta waqaychanqa. 34 Chayrayku niykichej: Chay ch'iseqa iskay ukhu uj puñunallapi kashajtinku, ujnin kaj oqharisqa kanqa, ujnin kajtaj saqerparisqa. 35 Iskay warmispis khuska jak'ushajtinku, ujnin oqharisqa kanqa, ujnintaj saqerparisqa. 36 Iskay qharis chajrapi kashanqanku; ujnin oqharisqa kanqa, ujnintaj saqerparisqa, nispa nerqa Jesusqa. 37 Chantá yachachisqasnin chayta uyarispa, nerqanku: Maypitaj chay tukuy kanqa, Señor? nispa. Paytaj kuticherqa: Maypichus wañusqa kashan, chayman suwintus tantakonqanku, nispa.
