LEVÍTICO 9

1Pusaj kaj p'unchaypi Moisesqa Aaronta, churisnintawan wajyarqa, israelitaspa kurajninkukunatawan. 2Aaronmantaj nerqa: Juchasrayku wañuchispa q'olachisqa kanampaj apamuy uj torillota, uj sumajnin kaj mana iman imanasqa corderotawan apamuy q'olachisqa kanampaj. Chaykunata Tata Diosman jayway. 3Israelitasman niy uj chivota apamunankuta juchasrayku wañuchisqa q'olachinapaj, jinallatataj uj watayoj torillota, uj watayoj corderota, mana iman imanasqasta Tata Diospaj q'olachisqa kanankupaj. 4Jinallataj apamuchunku uj torota, uj corderotawan Tata Diospa ñawpaqempi wañuchispa q'olachinankupaj uj allinyakuy jaywanata jina. Apamullachunkutaj aceitewan puñasqa ch'aki mikhuy jaywanata, imaraykuchus Tata Diosqa kunan qankunaman rikhurenqa, nispa nerqa Moisesqa. 5Israelitasqa Moisespa tukuy chay kamachisqanta apamorqanku Dioswan Tinkukuna Toldo punkuman. Chaymantataj tukuynin israelitas qayllaykuspa, Tata Diospa ñawpaqempi sayarqanku. 6Chantá Moisesqa nerqa: Ajinata kamachin Tata Diosqa qankuna ruwanaykichejta, Paytaj rikhurisonqachej jatun kaynimpa k'anchayninwan, nispa. 7Chaymantá Moisesqa Aaronman nillarqataj: Altarman qayllamuspa, Tata Diosman juchaykirayku uywata wañuchispa q'olachiy, chay uj uywatawan, juchasniykej cuentanmanta, israelitaspa juchasninkoj cuentanmantawan kanampaj. Jaywallaytaj israelitaspa jaywanankuta juchasninku pampachasqa kanampaj, Tata Diospa kamachisqanman jina. 8Chantá Aaronqa altarman qayllaykuspa, ñak'arqa juchanmanta chay torillo apamusqanta. 9Chay ratopacha Aaronpa churisnin payman yawarta jaywarqanku, Aarontaj dedonta yawarman chhapurispa, jawirarqa altarpa wajrasninta, puchoj yawartataj altarpa uranman jich'arqa. 10Chaymantá altar patapi q'olacherqa juchasrayku apamusqa uywaj wirasninta, lurunisninta, k'iwicha qayllapi wirasnintawan, Tata Diosqa Moisesman kamachisqanman jina. 11Uywaj aychanta, qarantawantaj jaramanta jawaman orqhospa, q'olachimorqa. 12Chay qhepata Aaronqa q'olachisqa kanampaj apamusqanku, chay uywata wañuchillarqataj. Churisnin chay yawarta payman jaywarqanku, Aarontaj chay yawarwan altarpa patanta, muyuynintawan ch'ajchorqa. 13Jinataj chay uywaj umanta, khuchurasqa aychasnintawan jaywajtinku, Aarón chaykunata altar patapi q'olaykucherqa. 14Chaymantataj yakuwan mayllarqa uywaj ch'unchulasninta, pierna aychasnintawan, tukuynintataj altar patapi q'olacherqa. 15Aaronqa Tata Diosman jaywallarqataj israelitaspa jaywanasninkuta. Juchankumanta apamusqanku chivota Aaronqa jap'erqa, ñak'aspataj Tata Diosman q'olacherqa juchaspa cuentanmanta, imaynatachus ñawpajta jaywarqa, ajinata. 16Tata Diosta yupaychanapaj chay q'olachina uywata jaywaspaqa, Aarón ruwarqa imaynatachus ruwana kasqanman jina. 17Chantá chay ch'aki mikhuy jaywanamantañataj uj maki junt'ata jap'ispa, q'olacherqa altar patapi tutamanta q'olachisqa uywawan khuskata. 18Chantá Aaronqa ñak'allarqataj israelitaspa allinyakuy apamusqanku torota, corderotawan. Churisnenqa payman yawarta jaywarqanku, paytaj chay yawarwan ch'ajchumorqa altarta, tukuy muyuynintawan. 19Chantá jaywallarqankutaj toroj wirasninta, corderoj wirasninta, chupanta, ch'unchulaj wirasninta, lurunisninta, k'iwicha qayllapi wiranta ima. 20Chay wirastataj pecho aychaj patanman churaykorqanku. Chaymantá Aaronqa chay wirasta altar patapi q'olaykucherqa. 21Jinataj Aaronqa pecho aychasta, iskaynin paña pierna aychastawan oqharispa, Tata Diosman ikhaspa rikucherqa, Moisespa kamachisqanman jina. 22Chantá Aaronqa makisninta oqharispa, israelitasta bendecerqa. Chaymantataj juchasrayku jaywanasta q'olachisqanmanta, allinyakuy jaywanata jaywaytawan, altar chaymanta ithirikorqa. 23Chantá Moiseswan Aaronwan yaykorqanku Dioswan Tinkukuna Toldoman. Chaymanta llojsimuspataj, israelitasta bendecerqanku. Jinallapi Tata Diospa jatun kaynimpa k'anchaynenqa tukuyninkuman rikhurerqa. 24Chantá Tata Diospa ñawpaqenmanta nina larway ujllata llojsimuspa, q'olarqa altar patapi kasharqa, chay jaywasqa uywa aychasta, wirastawan. Chayta rikuspa, tukuynin israelitas kusiywan qhaparerqanku, k'umuykorqankutaj pampakama.

will be added

X\