LEVÍTICO 7

1Jucharayku jaywasqaqa Tata Diospaj t'aqasqa, may santomin. Kaykuna leyes kanku chay imasta ruwanamanta: 2Juchasrayku jaywanapaj apamusqa uywastaqa ñak'anqanku, maypichus uywasta ñak'anku q'olachinankupaj, chaypi. Chantá uywaj yawarninwan ch'ajchonqanku altar patata, tukuy muyuynintinta ima. 3Chaymantaqa tukuy uywaj wirasninta wirachanqa: Chupa wiranta, ch'unchula wiranta, 4iskaynin lurunista wirasnintinta, ch'illa wirasninta, k'iwicha qayllapi wirata, lurunisnintawan khuskata ima. 5Chaymantataj sacerdoteqa chay wirasta altar patapi q'olachenqa, Tata Diospaj jaywanata jina. Chayqa juchaspa cuentanmanta jaywana. 6Chay jaywasqa uywasmantaqa tukuy sacerdotes mikhuyta atenqanku Diospaj T'aqasqa Cheqapi, imaraykuchus chayqa may santomin. 7Mana yuyasqallamanta jucharayku jaywasqaqa kanqa yachashaspa jucharayku jaywasqa jina. Chay ruwanamanta leyesqa iskayninkupaj uj rejlla kanqa. Chay aychasqa kanqa juchasmanta jaywaj sacerdotepaj. 8Jinallataj sacerdote pichus uywata q'olachejqa chay uywaj qaranta jap'ikaponqa. 9Chaymantaqa kikillantaj jaywaj sacerdotepaj kanqa ch'aki mikhuykunamanta jaywasqaqa: Hornopi chayasqa, chaymantataj fierro mankapi, chayrí paylapi chayasqapis. 10Chaymantataj Aaronpa churisnenqa jap'ikonqanku tukuyninku uj rejta, chay chawa ch'aki mikhuykuna apamusqa jaywanasmanta, aceiteyoj kajmanta, mana aceiteyoj kajmantapis. 11Tata Dioswan allinyakuy jaywanaqa kay jina jaywasqa kanqa: 12Sichus pipis uj agradecekuy jaywanata Tata Diosman jaywayta munan chayqa, apamuchun mana levadurayoj t'antata, aceitewan ruwasqata, mana levadurayoj tortillatawan, aceitewan jawisqata, sumajnin kaj ñut'u jak'umanta aceitewan ruwasqa t'antatawan. 13Jinallataj allinyakunapaj agradecekuy uywatawan khuska apamullanqataj levadurayoj t'antasta jaywanampaj. 14Chay tukuynin jaywanamanta wakinta Tata Diosman jaywanqa. Chay jaywasqaqa sacerdotepaj kanqa, pichus allinyakuy uywaj yawarninta altarpi ch'ajchumojpaj. 15Allinyakunapaj agradecekuy uywaj aychantaqa chay p'unchaypacha mikhonqanku. Q'ayantimpajqa mana imapis puchonqachu. 16Sichus pipis payllamanta uj uywata apamun, chantapis: Noqa qosaj, nispa nisqanraykupis chayqa, chay kikin p'unchaypacha chay jaywasqaqa mikhusqa kanqa. Chaymanta puchojtataj q'ayantimpis mikhullanqanku. 17Sichus kinsa p'unchaykama chay puchoj aycha kanqaraj chayqa, q'olaykuchichunku tukuyninta. 18Sichus kinsa p'unchaymanta pipis chay puchoj aychata, allinyakuy jaywanamanta puchojta mikhonqa chayqa, Tata Diosman chay jaywasqaqa mana valenqachu, nitaj apamojpa cuentanman churasqachu kanqa. Chay aychaqa ch'ichipaj qhawasqa kanqa. Pichus chay aychata mikhojtaj chay juchamanta juchachasqa kanqa. 19Sichus ima ch'ichimampis chay aycha chayanman chayqa, amaña pipis chayta mikhuchunchu, manachayqa q'olachinallapajña kanan tiyan. Aychataqa llimphupaj qhawasqa kajkunalla mikhonqanku. 20Sichus pipis ch'ichipaj qhawasqa kashaspa, Tata Dioswan chay allinyakuy jaywasqamanta mikhonqa chayqa, wañuchisqa kanqa. 21Sichus pipis ch'ichipaj qhawasqa kajta llankhanman, kachun runajta, chayrí ch'ichipaj qhawasqa animalta, chantataj Tata Diosman chay allinyakuy jaywasqata mikhunman chayqa, wañuchisqa kanqa. 22Tata Diosqa Moisesman parlaspa, nerqa: 23Ajinata niy israelitasman: Ama mikhunkichejchu waka wirata, oveja wirata, nitaj cabra wirata. 24Wañusqa uywaspa wiranta, chayrí ima k'ita animalespa jap'isqasnin uywaspa wiranwanqa imatapis ruwayta atinkichej. Chaywampis amapuni mikhunkichejchu. 25Sichus pipis Tata Diosman jaywasqa uywaspa wiranta mikhonqa q'olachisqa kanan kashajtin chayqa, wañuchisqa kanqa. 26Maypichá tiyakunkichej, chaypeqa amapuni mikhunkichejchu ni ima phuruyojkunaj yawarninta, nitaj animalpatapis. 27Pichus ima animalpallatapis yawarninta mikhojqa wañuchisqa kanqa. 28Tata Diosqa Moisesman parlaspa, nillarqataj: 29Niy israelitasman pichus allinyakuy jaywanata apamojqa Tata Diospa ñawpaqenman wakinta apamunanta. 30Chaytataj kikin makisninwan apamonqa Tata Diosman q'olachisqa kanampaj. Wirasta, pechotawan apamuspa, Tata Diospa ñawpaqempi chay pechota ikhaspa rikuchenqa. 31Chantá chay wirasta sacerdoteqa altar patapi q'olachenqa. Chay uywaj pechontaj sacerdote Aaronpaj, miraynimpajwan kanqa. 32Chay allinyakuy uywaj piernan sacerdotemampuni qosqa kanqa. 33Chay paña piernaqa kanqa, mayqen sacerdotechá Tata Diosman jaywanqa allinyakuy uywaj wiranta, yawarnintawan, chaypaj. 34Allinyakuy jaywanasta israelitas qowasqankumantaqa Noqa t'aqani sumajnin kaj pecho aychanta, pierna aychantawan, sacerdote Aaronman, mirayninmanwan qonaypaj. Chaykunaqa paykunapajpuni wiñaypaj kanan tiyan, nispa nerqa Tata Diosqa. 35Tata Diosman jaywanasta q'olachisqa kanampaj qosqasninku chay aychamanta qonankupuni karqa Aaronman, mirayninmanwan, Tata Diosqa sacerdotesnimpaj paykunata rejsikorqa, chay p'unchaymantapacha. 36Chayta Tata Diosqa israelitasman kamacherqa, sacerdotespaj t'aqasqa kasqankumantapacha chay imasta qonankupaj. Chayqa kamachisqa karqa junt'anankupaj tukuy miraykuna wiñaypaj. 37Chay jinamanta jaywananku tiyan uywa wañuchisqa q'olachinata, ch'aki mikhuymanta jaywanata, mana yuyasqallamanta jucharayku jaywanata, yachashaspa jucharayku jaywanata, llimphuchakuy jaywanata, allinyakuy jaywanata ima. 38Chaykunataqa Tata Diospuni Sinaí Orqopi Moisesman kamacherqa, maypachachus Sinaí ch'in pampapi Tata Dios kamacherqa israelitas jaywanasta apamunankuta chaypacha.

will be added

X\