1 Tata Diosqa Moisesman parlaspa, nerqa: 2 Israelitasman niy: Sichus pipis mana yuyasqallamanta Tata Diospa mayqen kamachisqasninta p'akispa juchallikunman, mana ruwana kajta ruwaspa chayqa, kay jina ruwasqa kanqa. 3 Aceitewan jawisqa sacerdotechus juchallikun, chay juchantaj runasman chayan chayqa, payqa Tata Diosman apamuchun uj torillota sumajnin kajta, mana iman imanasqata, chay juchampa cuentanmanta jaywasqa kanampaj. 4 Chay torillotaqa apamonqa Tata Diospa ñawpaqenman, Dioswan Tinkukuna Toldo punkuman. Chaypi torilloj umanman makinta churaykuspa, ñak'anqa Tata Diospa ñawpaqempi. 5 Chaymantaqa aceitewan jawisqa sacerdoteqa torilloj yawarninmanta uj chhikata apanqa Dioswan Tinkukuna Toldo ukhuman. 6 Chaypitaj sacerdoteqa dedonta yawarman chhapurispa, qanchis kutita ch'ajchonqa Tata Diospa ñawpaqempi cortina cheqanejman. 7 Chantaqa sumaj q'apashaj incienso altarpa wajrasninman yawarwan jawiykonqa, Tata Diospa ñawpaqempi Dioswan Tinkuna Toldopi. Tukuynin puchoj yawartataj q'olachina altarpa uranman jich'aykonqa Dioswan Tinkukuna Toldo punkupi. 8 Chantá orqhonqa juchaspa cuentanmanta wañuchisqa torilloj tukuy ch'unchula wirasninta, 9 iskaynin lurunisninta wirasnintinta, ch'illa wirasninta, k'iwicha qayllapi wirata ima, lurunisnintawan khuskata. 10 Chay imasta orqhonqa imaynatachus allinyakuy jaywana torillomanta orqhokun, ajinata. Chaymantataj tukuy chayta sacerdoteqa altar patapi q'olachenqa. 11 Chaymantataj torilloj qaranta, tukuy aychasninta, umanta, chakisninta, ch'unchulasninta, wanunta ima, 12 torilloj tukuy iman kaj chhikata jaramanta jawaman uj llimphu cheqaman orqhonqa, maypichus ushphata jich'anku, chayman. Chaypitaj ushpha qotu pataman llant'ata churaykuspa, sacerdoteqa ninawan q'olaykuchenqa. 13 Sichus tukuynin israelitas mana yuyasqallamanta juchallikunkuman, nitaj reparakunkuman chayqa, sitajchus Tata Diospa ujnin kamachisqanta p'akispa, juchallikunkuman jinamanta juchachasqa rikhurispa chayqa, 14 juchayoj kasqankuta reparakuytawanqa, uj torillota apamuchunku juchankoj cuentanmanta jaywasqa kanampaj. Chayta apamuchunku Dioswan Tinkukuna Toldo punkuman. 15 Chaypitaj Israelpa kurajninkuna makisninkuta churanqanku torilloj umanman Tata Diospa ñawpaqempi, chay kikimpitaj ñak'anqanku. 16 Chaymantaqa aceitewan jawisqa sacerdoteqa torilloj yawarninmanta uj chhikata Dioswan Tinkukuna Toldo ukhuman apanqa. 17 Chaypitaj sacerdoteqa dedonta yawarman chhapurispa, qanchis kutita Tata Diospa ñawpaqempi ch'ajchonqa cortina cheqanejman. 18 Yawarwantaj, Tata Diospa ñawpaqempi kashan, chay altarpa wajrasninman jawenqa Dioswan Tinkukuna Toldo ukhupi. Tukuynin puchoj yawartataj q'olachina altarpa uranman jich'anqa, Dioswan Tinkukuna Toldo punkupi. 19 Chaymantaqa torilloj wiranta orqhoytawan, tukuyninta altar patapi q'olachenqa. 20 Chay torillowanqa ruwakonqa, imaynatachus juchaspa cuentanmanta kaj torillowan ruwarqanku, ajina. Sacerdoteqa ajinamanta chay torillota jaywanqa paykunaj juchasninkumanta, juchasninkutaj pampachasqa kanqa. 21 Chaymantataj chay wañuchisqa torillota jaramanta jawaman orqhospa, q'olachimonqa, imaynatachus chay ñawpaj kaj torillowan ruwarqa, ajinata. Chay torilloqa q'olachisqa kanan tiyan tukuy israelitaspa juchasninkoj cuentanmanta. 22 Sichus mayqen kamachej runa mana yuyasqallamanta juchallikunman, Señornin Tata Diospa ujnin kamachisqanta p'akispa chayqa, juchachasqa kanqa. 23 Juchayoj kasqanta reparakuytawan, apamuchun juchampa cuentanmanta uj chivota, sumajnin kajta, mana iman imanasqata. 24 Chay chivoj umanman makinta churaytawantaj, ñak'achun Tata Diospa ñawpaqempi, may cheqapichus q'olachisqa kanampaj uywasta ñak'anku, chaypi. Chayqa juchaspa cuentanmanta jaywana. 25 Chaymantataj sacerdoteqa juchaspa cuentanmanta ñak'asqa uywaj yawarninman dedonta chhapuspa, chay q'olachina altarpa wajrasninta jawenqa. Chay tukuynin puchoj yawartataj jich'anqa q'olachina altarpa uranman. 26 Chantá chivoj tukuynin wirasninta altar patapi q'olachenqa, imaynatachus allinyakuy uywa wañuchisqa wirawan ruwakun, ajina. Sacerdoteqa ajinamanta chayta jaywanqa kamachejpa juchasninmanta, juchasnintaj pampachasqa kanqa. 27 Sichus mayqen runallapis mana yuyasqallamanta juchallikunman, Diospa ujnin kamachisqanta p'akispa chayqa, juchachasqa kanqa. 28 Juchayoj kasqanta reparakuytawan, apamuchun juchampa cuentanmanta uj cabrata, sumajnin kajta, mana iman imanasqata. 29 Chay cabraj umanman makinta churaytawantaj, cabrata ñak'achun, may cheqapichus q'olachisqa kanampaj uywasta ñak'anku, chaypi. 30 Chaymantataj sacerdoteqa dedonta juchaspa cuentanmanta ñak'asqa uywaj yawarninman chhapuspa, q'olachina altarpa wajrasninta jawenqa. Chay tukuynin puchoj yawartataj altarpa uranman jich'anqa. 31 Chaymantaqa cabraj tukuy wirasninta wirachanqa, imaynatachus ruwanku allinyakuy uywa wañuchisqa wirata jina. Sacerdoteqa ajinamanta chayta jaywanqa chay runaj juchasninmanta. Juchasnintaj pampachasqa kanqa. Chay q'olachisqa jaywasqaqa ima munayta Tata Diospaj q'aparenqa. 32 Sichus mayqempis juchampa cuentanmanta apamunman uj ovejata chayqa, apamuchun sumajnin kaj ovejata, mana ima imanasqata. 33 Chay ovejaj umanman makinta churaspa, ovejata ñak'anqa, may cheqapichus q'olachisqa kanampaj uywasta ñak'anku, chaypi. Chayqa juchaspa cuentanmanta jaywana. 34 Chaymantataj sacerdoteqa dedonta juchaspa cuentanmanta ñak'asqa ovejaj yawarninman chhapuspa, q'olachina altarpa wajrasninta jawenqa. Jinaytawantaj, chay tukuynin puchoj yawarta altarpa uranman jich'anqa. 35 Chaymantataj ovejaj tukuy wirasninta wirachanqa, imaynatachus ruwanku allinyakuy uywa wañuchisqa wirata jina. Sacerdoteqa chay wirasta altar patapi q'olachenqa, Tata Diosman uywa wañuchisqa q'olachinatawan khuska. Ajinamanta sacerdoteqa chayta jaywanqa chay runaj juchasninmanta. Juchasnintaj pampachasqa kanqa.
