LEVÍTICO 3

1Sichus mayqempis Tata Diosman apamunman uywasninmanta wakata, chayrí torota allinyakuy jaywanata jina chayqa, chay uywaqa sumajnin kaj kachun, mana iman imanasqa. 2Chay jaywanata Tata Diosman apamojqa makinta churanqa chay uywaj umanman. Chaymantataj Dioswan Tinkukuna Toldo punkupi ñak'anqa. Sacerdotestaj chay uywaj yawarninwan ch'ajchonqanku chay altar patata, tukuy muyuynintinta ima. 3Pichus uj uywata apamojqa allinyakuy jaywanata jina Tata Diosman q'olachenqa kay imasta: Chay uywaj ch'unchula wirasninta, 4iskaynin lurunisninta wirasnintinta, ch'illa wirasninta, k'iwicha qayllapi wirata ima, lurunisnintawan khuskata orqhospa. 5Chaytaqa sacerdotes q'olachenqanku altarpi llant'a patapi uywa wañuchisqa q'olachinatawan khuska. Chay q'olachisqa jaywasqaqa ima munayta Tata Diospaj q'aparenqa. 6Sichus mayqempis Tata Diosman apamunman ovejasninmanta orqotapis, chinatapis allinyakuy jaywanata jina chayqa, chay uywaqa sumajnin kaj kachun, mana iman imanasqa. 7Sichus corderota jaywanapaj apamunman chayqa, Tata Diospa ñawpaqenman apamuchun. 8Chay jaywanata Tata Diosman apamojqa makinta churanqa chay uywaj umanman, Dioswan Tinkukuna Toldo punkupitaj ñak'anqa. Sacerdotestaj uywaj yawarninwan ch'ajchumonqanku chay altar patata, tukuy muyuyninta ima. 9Pichus uj uywata apamojqa allinyakuy jaywanata jina, Tata Diosman q'olachenqa kay imasta: Wiranta, chantapis chupanta wasa tullunmantapacha khuchusqata, ch'unchula wirasninta ima. 10Jinallataj q'olachenqa iskaynin lurunisninta wirasnintinta, ch'illa wirasninta, k'iwicha qayllapi wirata ima, lurunisnintawan khuskata orqhospa. 11Chantá sacerdoteqa chay tukuyta altar patapi q'olachenqa mikhuy jaywanata jina Tata Diospaj. 12Sichus uj cabrata jaywanapaj apamunman chayqa, Tata Diospa ñawpaqenman apamuchun. 13Chay jaywanata Tata Diosman apamojqa chay uywaj umanman makinta churaspa, Dioswan Tinkukuna Toldo punkupi ñak'anqa. Sacerdotestaj chay cabraj yawarninwan chay altar patata, tukuy muyuynintinta ima ch'ajchonqanku. 14Pichus uywata apamojqa Tata Diospaj q'olachenqa kay imasta: Chay ch'unchula wirasninta, 15jinallataj iskaynin lurunisninta wirasnintinta, ch'illa wirasnintinta, k'iwicha qayllapi wirata ima, lurunisnintawan khuskata orqhospa. 16Chayta sacerdoteqa altar patapi q'olachenqa Tata Diospaj mikhuy jaywanata jina. Chay q'olachisqa jaywasqaqa ima munayta Tata Diospaj q'aparenqa. Uywaj tukuy wirasnenqa Tata Diospaj kachun. 17Kayqa ley jina unaypaj churasqa kanqa sapa kuti ruwanapaj miraymanta miraykama. Maypichá tiyakunkichej, chaypi amapuni wirata nitaj yawartapis mikhunkichejchu.

will be added

X\