LEVÍTICO 26

1Ama ruwakunkichejchu ima lantitapis, ni imaman rijch'akojta. Nacionniykichejpeqa ama yupaychana rumista sayachinkichejchu. Amallataj rumispipis warawasta ruwankichejchu chaykunaman qonqorikunaykichejpaj, imaraykuchus Noqamin kani Señorniykichej Tata Diosqa. 2Samarikuna p'unchayniykunata waqaychaychej; maypichus tiyakunay, chaytapis jatumpaj qhawaychej. Noqamin Tata Diosqa kani. 3Sichus leyesniyman jina kawsankichej, allintataj waqaychankichej kamachisqasniyta, chaykunatataj kasunkichej chayqa, 4jallp'aykichejman parachimusaj maychus tiempompi. Chajrasniykichejqa sumajta poqonqa, poqoy sach'asniykichejpis sumajta poqollanqataj. 5Trigo oqharisqaykichejqa uva pallanaykichej tiempokama kanqa. Uvasniykichejtaj kapusonqachej tarpuy tiempokama. T'antata mikhunkichej sajsakunaykichejkama. Ni imamanta manchachikuspa, allinta tiyakunkichej, chay jallp'api. 6Qankunaman qosqaykichej allin kawsayta chay jallp'api; puñukunkichejpis sumajta, ni imata manchachikuspa. Noqa chay jallp'ata jark'asaj sajra k'ita animalesmanta, jinallataj wañuchinakuy ch'ajwasmanta. 7Qankunaqa enemigosniykichejta ayqechinkichej, paykunataj ñawpaqeykichejpi espadawan t'ojsisqa wañuranqanku. 8Qankunamanta phishqalla pachaj runasta ayqechinkichej, jinallataj pachajlla chunka waranqa runasta ayqechinkichej. Jinamanta qankunaj ñawpaqeykichejpi enemigosniykichejqa espadawan t'ojsisqa wañuranqanku. 9Qankunata allin ñawiwan qhawaspa, ashkhata mirachisqaykichej. Chantapis tratoyta qankunawan mana p'akisajchu. 10Rezago trigota mikhunkichej, mosoj trigotataj waqaychanaykichejpaj rezagota jawaman orqhonkichej. 11Noqa qankunaj chawpiykichejpi tiyakusaj, manataj qhesachasqaykichejchu. 12Noqa qankunaj chawpiykichejpi purisajpuni; Diosniykichej kasaj, qankunataj Noqaj aylluy kankichej. 13Noqamin kani Señorniykichej Tata Diosqa, pichus Egiptomanta orqhomorqaykichej, manaña paykunaj wata runasnin kanaykichejpaj, chay. Noqa yugoykichejta p'akerqani. Umaykichejta patata oqharichispa puricherqaykichej. 14Sichus qankuna mana kasuwankichejchu, nitaj kamachisqasniytapis junt'ankichejchu, 15manachayqa qhesachankichej, mana allimpaj qhawaspa kamachisqasniyta, nisqasniytapis, ajinamanta mana junt'aspa tukuy kamachisqasniyta, tratoytapis p'akinkichej chayqa, 16Noqapis qankunawan kay jinata ruwasaj: Mancha manchalla kawsayta apachimusqaykichej, wañuchej onqoyta, k'aja onqoyta, ñawi onqoyta, llawch'iyay onqoytawan. Qhasillata tarpunkichej, imaraykuchus enemigosniykichej chay poqochisqaykichejta mikhukaponqanku. 17Noqapis qankunaj contraykichejpi kasaj, enemigosniykichejtaj atipasonqachej. Qankunata chejnisojkuna chakinku uraman churasonqachej, qankunataj mana pej qhatiykachasqallan ayqekunkichej. 18Sichus chay tukuywampis manapuni kasuwankichej chayqa, qanchis kutita castigasqaykichej juchasniykichejrayku. 19Wapu wapu kayniykichejta p'enqaypi rikhurichisaj, manataj parachimusajchu; jinamanta jallp'asniykichejpis mana poqonqankuchu. 20Qhasillata kallpaykichejta tukuchinkichej, imaraykuchus jallp'apeqa manapuni imapis poqonqachu, ni campo sach'aspis poqonqankuchu. 21Sichus contrallaypipuni kankichej, manapunitaj kasuwankichej chayqa, uj qanchis kutitawan castigasqaykichej juchasniykichejman jina. 22Qankunaj jallp'asniykichejman apachimusaj phiña k'ita animalesta wawasniykichejta mikhunankupaj, uywasniykichejtapis tukuchinankupaj. Jinamanta qankunapis pisiyankichej, ñankunaykichejpis ch'impacha kanqanku. 23Chay tukuywampis sichus manapuni kasuwaspa, Noqaj contrallaypuni kankichej chayqa, 24Noqapis qankunaj contraykichejpi kasaj. Uj qanchis kutitawantaj castigasqaykichej juchasniykichejman jina. 25Qankunaj pataykichejman wañuchinakuta apachimusaj, tratonchejta p'akisqaykichejmanta vengakunaypaj. Qankunaqa llajtasniykichejman pakakoj ayqekunkichej. Noqataj chayman onqoykunata apachimusqaykichej, jinamanta qankunaqa enemigosniykichejpa makisninkuman urmankichej. 26Maypachachus mikhunaykichejta pisiyachisaj chaypachaqa, chunka warmis uj hornollapi t'antata chayachenqanku. Qankunaman pisimanta pisi t'anta qosqa kanqa, manataj sajsakunkichejchu. 27Sitajchus ajina kashajtimpis, manapuni kasukunkichejchu, manachayqa contrallaypipuni kankichej chayqa, 28Noqapis qankunaj contrallaykichejpipuni kasaj, mayta phiñakuspataj qanchis kutitawan castigasqaykichej juchasniykichejrayku. 29Jinamanta qankunaqa mikhukapunkichej qhari wawasniykichejta, warmi wawasniykichejtapis. 30Noqataj thuñirasaj lomas patapi lantista yupaychana wasisniykichejta, incienso altaresniykichejtapis. Qankunaj ayasniykichejta chay mana kawsayniyoj lantisniykichej pataman tawqasaj. Ajinamanta chejnisqaykichej. 31Llajtasniykichejta raqayllataña saqesaj, yupaychana wasisniykichejtapis pampachallasajtaj. Sumaj q'apashaj jaywawasqaykichejwampis manaña misk'ichikusajchu. 32Llajtasniykichejta ch'inman tukuchisaj, chaymantaj tiyakoj jamonqanku enemigosniykichej. Paykunataj t'ukushaj qhepakonqanku. 33Qankunaman wañuchinaku maqanakuta apachimusaj, waj nacionesmantaj ch'eqerachisqaykichej. Jallp'asniykichej ch'inman tukonqa, llajtasniykichejtaj mancharina raqayman tukonqanku. 34Chaypacha jallp'asniykichej samarikonqanku, qankuna enemigosniykichejpa jallp'asninkupi kawsamunaykichejkama. Ajinamanta jallp'aqa chay p'unchaykunapi samarikonqa. 35Ch'in kashaspa, jallp'aqa samarikonqa, qankuna chaypi tiyakushajtiykichej mana samarikusqanmanta. 36Pikunachus enemigoj llajtampi kawsankichejraj, chaykunaman sinch'ita manchachisqaykichej, ayqenkichejtaj sach'a laqheta urmajta uyarispalla. Ajinata ayqenkichej pipis espadawan qhatishasunkichejman jina. Jinamanta qankunaqa mana pi imanashajtillan urmankichej. 37Qankunapuralla takanakuspa urmarankichej, wañuchinaku ch'ajwamantapis ayqeshawajchej jina, mana ni pipis qankunata qhatiykachashajtillan. Ni mayqenniykichej enemigoykichejman sayaykuyta atinkichejchu. 38Ajinamanta qankunaqa runaj llajtampi tukukunkichej; enemigosniykichejpa jallp'anku oqoykusonqachej. 39Chantá pikunachus kawsashankichejraj enemigosniykichejpa jallp'asninkupi, qankunaqa juchasniykichejrayku umphuyankichej. Tatasniykichejwan khuska wañunkichej paykunaj juchasninkurayku. 40Chaypacha juchasniykichejta willakunkichej, tatasniykichejpatapis, imaynatachus wasanchawasqaykichejta, chantataj Noqaj contrayta churanakuwasqaykichejta ima. 41Noqapis qankunaj contraykichejta oqharikuspa, enemigosniykichejpa llajtanman wijch'usqaykichej. Sichus ajina kashajtiykichej, sonqosniykichej llamp'uyanman juchayoj kasqaykichejta reparakuspa chayqa, 42chaymantaraj yuyarikusaj trato ruwasqaymanta Jacobwan, Isaacwan, Abrahamwan ima. Jinallataj yuyarikusaj ima jallp'atachus qosqaymantapis. 43Jinamanta chay jallp'aqa qankunamanta samarikonqa, qankuna chaypi mana tiyakunaykichejkama. Qankunaqa juchasniykichejrayku ñak'arinaykichej tiyan, kamachisqasniyta, qhesachasqaykichejrayku, leyesniytataj chejnisqaykichejrayku. 44Chay tukuywampis enemigoj llajtampi tiyakushajtiykichejpis, Noqaqa mana qhesachasqaykichejchu, nitaj chejnisqaykichejchu, tukuchisqa kanaykichejkama ñawpa tatasniykichejwan tratota ruwasqayta p'akispa, imaraykuchus Noqamin kani Señorniykichej Tata Diosqa. 45Chantapis yuyarikullasajtaj ima tratotachus Egiptomanta orqhomushaspa ruwasqayta ñawpa tatasniykichejwan tukuy naciones rikushajtinku, Israelpa Diosnin kanaypaj. Noqamin Tata Diosqa kani. 46Chaykunamin kanku Tata Diospa leyesnin, imatachus kamachisqasnin, yachachiyninkuna ima, mayqenkunatachus Moisesnejta Tata Diosqa israelitasman qorqa Sinaí Orqopi, chaykuna.

will be added

X\