1 Sinaí Orqopi Tata Diosqa Moisesman kay jinata parlarqa: 2 Israelitasman kayta niy: Qankunaman ima jallp'atachus qosqaykichej, chayman yaykuspañaqa, jallp'ata samarichinkichej Tata Diospaj. 3 Chay jallp'aspi tarpunkichej sojta watata. Kikillantataj uva sach'asniykichejpa ramasnintapis k'utunkichej sojta watata, jinallataj poqoynintapis pallankichej sojta watata. 4 Qanchis kaj watapitajrí Tata Diospaj chay jallp'ata samarichinkichej. Chay watapi ama tarpunkichejchu chay jallp'api, nitaj uva sach'aspa ramasnintapis k'utunkichejchu. 5 Chantá nillataj ruthunkichejchu chay watapi poqoj k'ipa trigosta, nillataj huertaykichejmanta uvastapis pallankichejchu; chay jallp'aqa sumajta samarikunan tiyan. 6 Jallp'ata samachishankichej, chay wataqa imachus sapallanmanta poqojta mikhukullankichej qhari kamachisniykichejwan, warmi kamachisniykichejwan, peonesniykichejwan, qankunawan tiyakoj forasterowan ima. 7 Jinallataj uywasniykichejpaj, tukuy chay jallp'api kaj k'ita animalespajpis mikhunaqa kallanqataj. Imaschá chay jallp'aspi poqonqa, chay poqoykuna mikhunaykichejpaj kanqa. 8 Qanchis semana watasta yupanaykichej tiyan, jinamanta chay watasqa tukuynimpi tawa chunka jisq'onniyoj watas kanqa. 9 Qanchis kaj killapi chunka p'unchay kashajtin, carneroj wajrasninmanta putututa waqachinkichej tukuy chay jallp'aykichejpi, Tata Diosmanta perdonta tarina p'unchaypi. 10 Chay phishqa chunka wata kajqa Diospaj t'aqasqa kanqa. Chay watapi tukuyman uyarichinkichej chay jallp'api tukuy runasqa kacharichisqa kanankuta. Jallp'apis pejpatachus karqa, chayman kutichipusqallataj kanqa. Sapa ujpis kutipullanqa familianman. 11 Chay phishqa chunka kaj wataqa sutichasqa kanqa Kacharipuna Wata. Chay watapi ama tarpunkichejchu, nitaj ruthunkichejchu chay k'ipas poqojkunata. Nillataj uvastapis pallankichejchu, nitaj ramasninta k'uturankichejchu. 12 Chay wataqa Diospaj t'aqasqa santo wata kanqa, qankunapajtaj Kacharipuna Wata kanqa. Chajra sapallanmanta poqon, chayllata mikhunkichej. 13 Chay watapi watejmanta tukuyniykichej, jallp'asniykichej karqa, chayta jap'ikapunkichej. 14 Sichus jallp'ata vendenkichej, chayrí rantinkichej chayqa, ama ch'awkiyanakunkichejchu. 15 Kacharipuna chay watamanta mashkha watachus pasasqanman jina, jallp'ataqa runa masiykichejmanta rantinkichej. Jinallataj mashkha cosechasrajchus kanan kashan, chayman jina vendenkichej. 16 Aswan ashkha watas cosecha kajtinraj, astawan valenqa; pisi wataslla kajtinrí, pisillataj jallp'apis valenqa. Jallp'asqa vendekunan tiyan, mashkha cosechasrajchus kanan kashan, chayman jina. 17 Ni pipis ch'awkiyachunchu ni mayqen runa masintapis. Sapa ujpis Diosniykichejta manchachikuychej. Noqamin Señorniykichej Tata Diosqa kani. 18 Leyesniyta kasuychej, kamachisqasniytapis junt'aychej. Chay imastachus allinta ruwankichej chayqa, ni imamanta manchachikuspa tiyakunkichej chay jallp'api. 19 Jallp'aqa sumajta poqopusonqachej, qankunataj chayta mikhurinkichej sajsakunaykichejkama. Jinata ni imamanta manchachikuspa tiyakunkichej. 20 Ichapis qankunaqa tapunakunkichej: Imatataj mikhusun chay qanchis kaj watapi mana tarpuspari, nitaj cosechatapis oqharispari? nispa. 21 Noqamin bendicionniyta apachimusqaykichej sojta kaj watapi. Chay watapi poqopusonqachej kinsa watas junt'ata mikhunaykichejpaj. 22 Samarikuna wata pasajtimpis, mikhushankichejraj rezago mikhuykunata, pusaj kaj watapi ujtawan tarpunaykichejkama. Chay watapi tarpusqaykichej poqonankama jisq'on watakama rezago mikhuykunata mikhunkichejraj. 23 Chay jallp'astaqa ama wiñaypaj vendenkichejchu, imaraykuchus Noqajtamin jallp'aqa. Qankunaqa forasteros, Noqaj wajyarisqay jinalla kankichej. 24 Chayrayku ima jallp'apis makiykichejman chayajtaqa saqenaykichej tiyan ñawpa dueñon watejmanta rantikapunanta. 25 Sichus mayqen aylluyki pisichikuspa jallp'anta vendesunkiman chayqa, mayqenchá aswan qaylla ayllun kaj jamuspa, chay vendesusqan jallp'ata watejmanta rantipuyta atin. 26 Pejpatachus mana ayllun kajtin, chay vendesqan jallp'anta watejmanta rantikapuyta munan chayqa, payllataj qolqeta tantakunan tiyan watejmanta rantikapunampaj. 27 Mayk'ajchus vendekorqa chaymantapacha watasta yupaspa, chayman jina kutichenqa qolqeta, pimanchus venderqa, chayman, watejmantataj chay jallp'ata rantikaponqa. 28 Sichus mana qolqeta tariyta atenqa chayqa, pichus rantikojpa makimpi chay jallp'aqa qhepakonqa Kacharipuna Watakama. Chaymantaraj chay jallp'ata ñawpa dueño jap'ikaponqa. 29 Sichus pipis wasinta perqawan muyuykusqa llajtapi vendenman chayqa, vendesqanmanta watankamalla atin watejmanta rantikapuyta. 30 Sichus chay vendej mana chay watapi watejmanta rantikapuyta atin chayqa, chay waseqa pichus rantikojpa makimpi qhepakonqa. Miraynintimpaj wiñaypaj kanqa, manataj kutichipuyta atenqachu chay Kacharipuna Watapipis. 31 Mana perqawan muyuykusqa juch'uy llajtaspi waseqa campo wasi jinalla qhawasqa kanqa. Atenqanku watejmanta rantikapuyta, jinallataj Kacharipuna Watapeqa kutichipusqa kayta atenqa. 32 Chaywampis levitasqa llajtasninku ukhupi wasisninkuta watejmanta rantikapuyta atillanku ima watapipis. 33 Pillapis levitasmanta uj wasita rantikojqa kutichipunan tiyan chay wasita Kacharipuna Watapi, ripunantaj tiyan, maypichus tiyakorqa, chayman, imaraykuchus levitaspataqa chaylla kapun israelitaspa llajtasninkoj chawpimpi tiyakunankupaj. 34 Levitaspata llajtasninkoj qayllampi campo michinasninkoqa mana vendena atikunchu, chay jallp'asninkoqa wiñaypaj paykunapaj kasqanrayku. 35 Sichus mayqen llajta masillaykipis wajchayaykuspa, qanman jamusunkiman chayqa, qan yanapanayki tiyan forasterota jina, wasiykipitaj qanwan tiyakonqa. 36 Manusqaykimantapis ama qolqe interesta mañankichu, manachayqa Diosniykita manchachikuspa saqey chay llajta masiykita qankuna ukhupi tiyakojta. 37 Ama qolqeta manusqaykimantapis interesta mañankichu, nitaj aswan ashkhapipis mikhuykunata payman vendenkichu. 38 Noqamin kani Señorniykichej Tata Diosqa, pichus Egiptomanta orqhomorqaykichej Canaán jallp'ata qosunaykichejpaj, Diosniykichejtaj kanaypaj, chay. 39 Sichus mayqen llajta masiyki qanwan tiyakushaspa astawan pisichikapunman, qanmantaj vendekusunkiman chayqa, ama wata runata jina sinch'ita trabajachinkichu. 40 Payqa peonniyki jina kanqa, chayrí forastero jina. Jinamanta qampaj trabajapusonqa Kacharipuna Wata chayamunankama. 41 Chay watataj wasiykimanta llojsiponqa tukuy wawasninwan. Kutiponqa ayllusninman, tatanmanta herenciatataj ujtawan jap'ikaponqa. 42 Tukuy israelitasqa Noqaj kamachisniy kanku, pikunatachus Egiptomanta orqhomorqani, chaykuna. Chayrayku paykunaqa mana wata runas jina vendesqachu kanqanku. 43 Chantapis ama sajra runa jina paykunata ñak'arichinkichu; manachayqa Diosniykita manchachikunki. 44 Sichus munankichej warmi, chayrí qhari wata runasniyoj kayta chayqa, muyuyniykichejpi kaj nacionesmanta rantikuychej. 45 Chantapis atillankichejtaj rantikuyta qankunawan tiyakoj forasteros kajkunamanta, llajtaykichejpi kashajtinku, chay nacekoj wawasninkuta. Chaykunata qankunaqa rantikuyta atinkichej qankunajtapuni kanankupaj. 46 Chaykunatataj wawasniykichejman saqenkichej uj herencia jina kanankupaj wañupojtiykichej. Paykunata qankunaqa wata runasta jina jap'ikunkichej wiñaypaj. Chaywampis ama ni mayqenniykichej, israelita masiykichejta sinch'ita trabajachispa, ñak'arichinkichejchu. 47 Sichus mayqen forastero qankuna ukhupi qhapajyanman, qayllampi israelita masiykichejtaj wajchayaspa, forasteroman vendekunman, chayrí forasteroj mirayninman chayqa, 48 vendesqa kasqanmantaña mayqen wawqempis rantispa, orqhokapuyta atin, 49 chayrí uj tion, uj qaylla ayllun, chayrí mayqen karu ayllunraj kaj. Manachayqa, qolqen kajtin, pay kikinmanta atenqa pagakuyta. 50 Ima watapichus vendesqa kasqanmantapacha allinta yupanqanku rantejninwan khuska Kacharipuna Watakama. Chay runaj precionqa kanan tiyan mashkha watarajchus trabajanampaj kasqanman jina, chantá mashkha watatañachus trabajasqanman jina, uj peón mashkhatachus ganan, chayman jina. 51 Sichus ashkha watasraj trabajanampaj kashan chayqa, chay watasman jina qolqeta kutichinan tiyan, mashkhapichus vendesqa kasqanman jina. 52 Sichus pisi watasllaña kashan Kacharipuna Watapaj chayqa, mashkha qolqerajchus qonan kashan chayta, chay mashkha watawanrajchus kanan kashan, chayman jina pagachun. 53 Qhawanan tiyan uj watapaj mink'asqa peonta jina. Ama saqenkichejchu ñak'arichispa sinch'ita trabajachinanta. 54 Sichus chay wataspi mana pipis pagaspa orqhokapun chayqa, Kacharipuna Watallapiña wawasninwan khuska llojsiponqa. 55 Israelitasqa kamachisniy kanku, Noqajta kamachisniypuni, pikunatachus Egiptomanta orqhomorqani, chay. Noqamin kani paykunaj Diosninku.
