1 Tata Diosqa Moisesman parlaspa, nerqa: 2 Israelitasman niy kay jinata: Kay p'unchaykunapi Tata Diospaj fiestata ruwankichej; chaypacha qankunaqa tantakunkichej Tata Diosta yupaychanaykichejpaj. 3 Sojta p'unchayta trabajankichej, qanchis kaj p'unchaypitaj mana ima trabajotapis ruwankichejchu. Chay p'unchayqa qankunapaj uj jatun p'unchay kanqa Diospa sutimpi tantakunaykichejpaj. Maypichá tiyakunkichej, chaypi chay p'unchayqa kanqa samarikunaykichejpaj, Tata Diosta jatunchanaykichejpajtaj. 4 Tata Diosmanta yuyarikuna p'unchaykunaqa, mayqen p'unchaykunapichus qankuna Diospa sutimpi tantakunkichej, kaykuna kanku: Tata Diosmanta yuyarikuspa, 5 Pascua fiestata ruwankichej wata qallariy killapi chunka tawayoj p'unchay ch'isiyaykushajtin. 6 Chay kikin killapi chunka phishqayoj p'unchay kashajtin, mana levadurayoj t'anta fiestata ruwallankichejtaj, Tata Diosmanta yuyarikuspa. Chaymantataj qanchis p'unchayta mikhunkichej mana levadurayoj t'antata. 7 Ñawpaj kaj p'unchaypi Tata Diospa sutimpi tantakunkichej, amataj chay p'unchaypi ruwaychejchu ni ima ruwanata. 8 Chay qanchis p'unchaykunapi Tata Diospaj jaywanasta q'olachinkichej, qanchis kaj p'unchaypitaj Tata Diospa sutimpi tantakullankichejtaj. Chay p'unchaypi ama ni ima trabajota ruwankichejchu. 9 Tata Diosqa Moisesman parlaspa, nerqa: 10 Israelitasman kayta niy: Ima jallp'atachus qosqaykichej, chayman chayaspa, chay jallp'api ñawpaj kaj poqochisqaykichej trigosta ruthuspa, sacerdoteman ñawpaj kaj marq'ata apamunkichej. 11 Samarikuna p'unchaypa q'ayantin sacerdoteqa chay trigo marq'ata ikhaspa, Tata Diosman rikuchenqa, ajinamanta qankuna allin ñawiwan qhawasqa kanaykichejpaj. 12 Ima p'unchaychus Tata Diosman chay trigo marq'ata ikhaspa rikuchinkichej, chay p'unchayllapitaj uj watayoj sumajnin kaj corderota jaywankichej Tata Diosta yupaychanapaj q'olachisqa kanampaj. 13 Chantá apamullankichejtaj sumajnin kaj ñut'u jak'uta tawa kilos khuskanniyojta aceitewan puñasqata, Tata Diospaj q'olachisqa kanampaj. Chay q'olachisqataj ima munayta Tata Diospaj q'aparenqa. Chantapis apamullankichejtaj uj litro vinota ch'ajchuykunapaj. 14 Ima p'unchaychus poqochisqasniykichejmanta Tata Diosman jaywanata apamunaykichejkamaqa, amaraj mikhunkichejchu t'antata, trigo jank'ata, nitaj llullu trigotapis. Kay kamachisqaqa wiñaypaj kanqa mirayniykichejpaj, maypichá tiyakunkichej, chaypi. 15 Ima p'unchaychus chay trigo marq'ata Tata Diosman jaywanata jina ikhaspa rikuchinkichej, chay qhepan samarikuna p'unchaymantapacha yupankichej qanchis semanasta. 16 Samarikuna p'unchaypa q'ayantinmanta yupankichej phishqa chunka p'unchaykunata. Chaypacha Tata Diosman jaywankichej trigoj mosoj poqoyninta. 17 Jinaqa apamullankichejtaj wasiykichejmanta iskay t'antasta, ñut'u jak'umanta levadurayoj ruwasqasta. Sapa ujnintaj tawa kilos jak'umanta kanqa. Chayqa kanqa Tata Diospaj ñawpaj kaj poqoymanta sumajnin kaj ikhasqa jaywana. 18 T'antatawan khuska apamunkichej qanchis corderosta uj watayojtakama mana imanku imanasqata, uj torillota, iskay carnerostawan. Chantaqa apamullankichejtaj ch'aki mikhuykunamanta jaywanata, vinotawan. Chay q'olachinaqa Tata Diospaj ima munayta q'aparenqa. 19 Juchasrayku q'olachina jaywanapajqa uj chivota apamunkichej, allinyakuy jaywanata jaywanapajtaj iskay corderosta apamunkichej uj watayojtakama. 20 Sacerdoteqa Tata Diosman ikhaspa rikuchenqa ñawpaj poqoykunamanta ruwasqa t'antasta, iskay corderostawan. Tata Diospaj chay imas t'aqasqaqa sacerdotespaj kanqa. 21 Chay kikin p'unchayllataj qankunapis Tata Diospa sutimpi tantakunkichej, amataj ima trabajota ruwankichejchu. Chay kamachisqaqa tukuy mirayniykichejpaj wiñaypaj kanqa, maypichá tiyakunkichej, chaypi. 22 Maypachachus cosecha chayamojtin, ama tukuyninta oqharinkichejchu, nitaj t'akakoj umastapis chajmankichejchu. Chaykunataqa saqenkichej wajchas, forasteros ima chajmakunankupaj. Noqamin Señorniykichej Tata Diosqa kani. 23 Tata Diosqa Moisesman parlaspa, nerqa: 24 Israelitasman kayta niy: Qanchis kaj killapi ñawpaj kaj p'unchaypi samarikuna p'unchayta ruwankichej. Tukuyniykichej Tata Diospa sutimpi tantakunkichej cornetaspa waqaynimpi. 25 Chay p'unchaypi uj sumaj jaywanata Tata Diospaj q'olachinkichej, amataj ima trabajotapis chay p'unchaypi ruwankichejchu. 26 Tata Diosqa Moisesman parlaspa, nerqa: 27 Chay kikin qanchis kaj killapi chunka kaj p'unchaynimpi perdonta tarina p'unchay kanqa. Chaypacha Tata Diospa sutimpi tantakuspa, ayunota ruwankichej, jaywanatataj Tata Diospaj q'olachinkichej. 28 Chay p'unchaypeqa amapuni ima trabajotapis ruwankichejchu, imaraykuchus chay p'unchaypeqa Señorniykichej Tata Diosmanta perdonta tarinkichej. 29 Pichus chay p'unchaypi mana ayunajqa, pipis kachun, wañuchisqa kanqa. 30 Pichus chay p'unchaypi ima trabajotapis ruwajqa, pipis kachun wañuchisqallataj kanqa. 31 Chaypi amapuni ima trabajotapis ruwankichejchu. Kay kamachisqaqa wiñaypaj tukuy mirayniykichejpaj kanqa, maypichá tiyakunkichej, chaypi. 32 Chayqa qankunapaj kanqa uj samarikuna p'unchay, ayunota ruwanaykichejpaj, chay p'unchayta waqaychanaykichejpajtaj, chay killapi jisq'on p'unchay ch'isiyaykuymanta q'ayantin ch'isiyaykuykama. 33 Tata Diosqa Moisesman parlaspa, nillarqataj: 34 Israelitasman kay jinata niy: Chay kikin qanchis kaj killapi chunka phishqayoj p'unchay kashajtin, qanchis p'unchay junt'ata Ch'ujllas fiestata ruwankichej Tata Diosta yupaychaspa. 35 Qallarikuy p'unchaypi Tata Diospa sutimpi tantakunkichej, amataj ima trabajotapis ruwankichejchu. 36 Qanchis p'unchay junt'ata jaywanasta Tata Diospaj q'olachinkichej. Pusaj kaj p'unchaypitaj Tata Diospa sutimpi tantakuspa, Paypaj jaywanasta q'olachinkichej. Chay p'unchayqa fiesta p'unchay; chayrayku ama ima trabajotapis ruwankichejchu. 37 Chaykuna kanku Tata Diospaj t'aqasqa p'unchaykuna, mayqenkunapichus qankuna Tata Diospa sutimpi tantakuspa, q'olachinasta, jaywanasta, ch'aki mikhuy jaywanasta, vinotawan Tata Diosman jaywankichej. Chaykunata jaywankichej p'unchayninman jina. 38 Chaywampis jaywallankichejpunitaj Tata Diospa samarikuna p'unchaykunanmanta q'olachinastapis, jaywanastapis, qosaj nisqaykichej jaywanastapis, mana pejpa nisqan jaywanastapis. 39 Qanchis kaj killapi chunka phishqayoj kaj p'unchaypi cosechasniykichejta oqharisqaykichejmantaña, Tata Diospa sutimpi fiestata ruwankichej qanchis p'unchay junt'ata. Samarikunkichej ñawpaj kaj p'unchaypi, jinallataj pusaj kaj p'unchaypipis. 40 Ñawpaj kaj p'unchaypi tantankichej sumaj kaj sach'aspa poqoykunankuta, palma ramasta, thansarara sach'aspa ramasninkuta, mayu saucesta ima. Ajinata qanchis p'unchay junt'ata kusikunkichej Señorniykichej Tata Diospa ñawpaqempi. 41 Chay fiestataqa sapa wata ruwankichej qanchis kaj killapi qanchis p'unchayta Tata Diospa sutimpi. 42 Chay qanchis p'unchay junt'ata tukuy israelita tatasniyojpuni kajkuna chay ch'ujllas ukhupi kankichej. 43 Ajinamanta tukuy mirayniykichej yachanqanku Noqa Egiptomanta israelitasta orqhomushaspa, paykunata ch'ujllas ukhupi tiyachisqayta. Noqamin qankunaj Señorniykichej Tata Dios kani. 44 Ajinata Moisesqa israelitasman willarqa Tata Diosta yupaychanapaj fiestasmanta.
