LEVÍTICO 20

1Tata Diosqa Moisesman parlaspa, nerqa: 2Israelitasman niy kay jinata: Sichus mayqen israelitallapis, chayrí qankuna ukhupi tiyakoj forasteropis wawanta Moloc diosman jaywanqa chayqa, paypa llajta masisnenqa rumiswan ch'anqaykuspa, payta wañuchenqanku. 3Noqa chay runaj contrampi kasaj, chinkachisajtaj ayllusnin chawpimanta, tiyakunayta jinallataj santo sutiytapis ch'ichichasqanmanta wawanta Molocman jaywaspa. 4Sichus chay llajtayojkuna chay runata mana wañuchispa, qhawallankuman chay jinata ruwajta chayqa, 5Noqamin sayaykusaj chay runaj contranta, familiampatawan, jinamanta chinkachisaj ayllun ukhumanta, pikunachus qhenchachakorqanku Molocta qhatispa, chaykunatawan. 6Sichus pipis aysirisman, layqasmanwan rinman, chayta ruwaspataj qhenchachakunman chayqa, Noqa paypa contranta sayaykuspa, chinkachisaj ayllun chawpimanta. 7Tukuyniykichej juchamanta t'aqakuspa, may santos kaychej, imaraykuchus Noqamin Señorniykichej Tata Dios kani. 8Kamachisqasniyta kasuspa, junt'aychej. Noqamin Tata Diosqa kani, pichus qankunata Noqapaj t'aqakuykichej, chay. 9Pillapis tatanta, chayrí mamanta maldecejqa wañuchisqa kanan tiyan. Tatanta, chayrí mamanta maldecisqanrayku wañunampajqa paylla juchayoj kanqa. 10Sichus pipis runa masimpa warminwan puñuykapunman chayqa, chay khuchichaj qhari, jinallataj chay warmipis wañuchisqapuni kanqanku. 11Sichus mayqellampis tatanta p'enqaypi rikhurichinman warminwan puñuykapuspa chayqa, chay qhari, jinallataj chay warmipis wañuchisqa kanqanku. Chay wañuyninkumantaqa paykunalla juchayoj kanqanku. 12Sichus pillapis ñojch'anwan puñuykapunman chayqa, iskayninku wañuchisqa kanqanku. Wañuyninkumantaqa paykunalla juchayoj kanqanku, imaraykuchus chayqa jatun millay jucha. 13Sichus uj qhareqa, qhari masinwan puñuykapunman warmiwan jina chayqa, iskayninku wañuchisqa kanqanku, imaraykuchus jatun millay juchata ruwanku. Paykunalla wañuyninkumanta juchayoj kanqanku. 14Sichus uj qhari uj warmiwan mamantinwan casaraykunman chayqa, jatun millay juchata ruwan. Kinsantin kawsashaj ruphachisqa kanqanku, ama qankuna ukhupi chay jina jucha kanampaj. 15Sichus uj qhari ima uywallawampis warmiwan jina ruwanman chayqa, wañuchisqa kanqa; jinallataj chay uywatapis wañuchinkichej. 16Sichus uj warmi ima uywawampis uj qhariwan jina ruwanman chayqa, iskayninku wañuchisqa kanqanku. Paykunalla juchayoj kanqanku wañuyninkumanta. 17Sichus pipis pananta warmimpaj jap'ikuspa, paywan puñuykapunman, mamanmanta, chayrí tatanmanta panan kajtimpis chayqa, tukuy llajta masisnin rikushajtinku, iskayninku wañuchisqa kanqanku, imaraykuchus kikin pananwan kananqa millay p'enqay. Chayta ruwajkunalla juchayoj kanqanku wañuyninkumanta. 18Sichus pipis warmiwan puñuykapunman killampi yawarniyoj kashajtin, jinamanta yawarninta sut'iman rikhurichispa, chantá chay warmipis rikuchinman yawarninta chayqa, iskayninku wañuchisqa kanqanku. 19Ama puñuykapunkichu mamaykej ñañanwan, nitaj tataykej pananwan, imaraykuchus aylluyki ukhupi p'enqayta ruwawaj. Iskayninku juchayoj kanqanku chay jinata ruwasqankumanta. 20Sichus mayqempis tatampa wawqempa warminwan puñuykapunman chayqa, tionta p'enqaypi rikhurichin. Chaymantaqa iskayninku juchayoj kanqanku, wañonqankutaj iskayninku mana wawasniyoj. 21Sichus pipis wawqempa warminwan casaraykunman chayqa, wawqenta p'enqaypi rikhurichenqa. Chayrayku iskayninku mana wawasniyoj wañonqanku. 22Tukuy kamachisqasniyta, imastachus nisqasniytawan kasuychej, junt'aychejtaj. Ajinamanta chay jallp'aqa mana wijch'usonqachejchu, maymanchus tiyakunaykichejpaj chayachisqaykichej, chay. 23Qankunaqa chay runaspa ususninkuta ama ruwankichejchu, mayqenkunatachus qankunaj ñawpaqeykichejmanta qharqosaj, chaykunajta. Paykuna chay tukuy imasta ruwarqanku, chayrayku Noqaqa paykunamanta millachikaporqani. 24Noqa niykichej dueños kanaykichejta chay runaspa llajtankumanta; Noqa kikiy chay jallp'api qankunata mojonachisqaykichej, maypichus lechewan misk'iwan yaku jina purishan, chaypi. Noqamin Señorniykichej Tata Diosqa kani, pichus tukuy nacionesmanta qankunata t'aqarqaykichej, chay. 25Chayrayku qankunapis sumajta reparanaykichej tiyan mayqenchus ch'ichipaj qhawasqa, jinallataj llimphupaj qhawasqa animalesta, chantá phurusniyoj kajkunatapis. Ama ch'ichichakunkichejchu ni ima animalwampis, nitaj phurusniyoj kajkunawampis, nillataj pampapi qhatatakuspa purej ch'ichipaj qhawasqa animaleswampis, mayqenkunatachus Noqa t'aqani ch'ichipaj qhawasqa kanankupaj, chaykunawan. 26Qankunaqa Noqa jina juchamanta t'aqasqa santos kanaykichej tiyan, imaraykuchus Noqa Tata Diosqa may santopuni kani. Noqa qankunata ajllakorqaykichej tukuy ayllusmanta Noqajta kanaykichejpaj. 27Sichus pipis aysiri kanman, chayrí layqa kanman chayqa, rumiswan ch'anqasqa wañuchisqa kanqa. Chay wañunampajtaj paylla juchayoj kanqa.

will be added

X\