1 Tata Diosqa Moisesman parlaspa, nerqa: 2 Niy tukuynin israelitasman: Qankunaqa juchamanta t'aqasqa may santos kaychej, imaraykuchus Noqa Señorniykichej Tata Diosqa may santomin kani. 3 Sapa ujpis jatumpaj qhawaychej mamaykichejta tataykichejtawan. Jinallataj waqaychaychej samarikuna p'unchayniykunata. Noqamin Señorniykichej Tata Diosqa kani. 4 Ama lantismanqa kutiriychejchu, amataj dioskunata metal unuyasqamanta ruwakuychejchu. Noqamin Señorniykichej Tata Diosqa kani. 5 Allinyakuy jaywanata Tata Diosman jaywaspaqa, chayta ruwaychej Diospa ñawpaqempi allimpaj qhawasqa kanaykichejpaj. 6 Chay qosqaykichej uywaqa chay p'unchaypacha mikhusqa kanan tiyan, manachayrí q'ayantin. Chaymanta minchhantimpaj puchojtaqa ninawan ruphachinkichej. 7 Sichus minchhantin mikhunkichej chayqa, chay jaywasqaqa ch'ichi, qhesachasqa kanqa. Diosqa chayta mana jap'ikonqachu. 8 Pichus mikhojqa juchachasqa kanqa. Chayrayku wañuchisqa kanqa, mana manchachikuspa Tata Diosman jaywasqa kajta millayta ruwasqanrayku. 9 Cosecha chayamojtenqa, ama tukuynintapunichu ruthunkichej; qhepaykichejpi trigo umas qhepakojkunataqa amaña chajmankichejchu. 10 Uvas huertaykichejmanta ama tukuy poqoyninta pallankichejchu, nitaj pampaman urmajkunatapis oqharinkichejñachu, imaraykuchus chaykunata wajchas pallakonqanku, jinallataj forasterospis. Noqamin Señorniykichej Tata Diosqa kani. 11 Ama suwaychejchu. Ama llullakuychejchu, nitaj ch'awkiyanakuychejchu. 12 Amamin sutiypi juraspa llullakunkichejchu, imaraykuchus jinamanta qankunaqa sutiyta qhesachawajchej. Noqamin Tata Diosqa kani. 13 Ama runa masiykichejta k'umuykachachispa llakichinkichejchu, nitaj paypata kajtapis suwankichejchu. Ama peonniykichejpa pagonta q'ayantinkama waqaychakunkichejchu. 14 Ama joq'ara kajpa contranta maldecinkichejchu. Ama ni ima misk'anata ciegoj ñawpaqenman churankichejchu, manachayrí Diosniykichejta manchachikunkichej. Noqamin Tata Diosqa kani. 15 Qan juez kaspaqa, cheqanta ruwanki, ama wajchaman sayakuspa, nitaj qhapajman sayakuspa. Cheqan justiciata qanqa ruwanki. 16 Ama runa masiykichejman qhasi manakaj cuentosta apankichejchu. Amallataj runa masiykichejta llullakusqaykichejwan wañuchiysinkichejchu. Noqamin Tata Diosqa kani. 17 Ama wawqeykichejta sonqoykichejpi chejnikunkichejchu. Runa masiykichejta k'amiychej, k'amina kajtenqa, juchallejtin ama qankunapis juchayoj kanaykichejpaj. 18 Ama runa masiykichejwan vengakunkichejchu nitaj phiñapayankichejchu. Astawanqa, payta munakuychej qankuna kikiykichejta jina. Noqamin Tata Diosqa kani. 19 Kamachisqasniyta kasukunkichej. Uywasniykichejta ama waj laya uywastawan tinkuchinkichejchu. Amallataj jallp'asniykichejpi chajrusqa mujusta tarpunkichejchu. Tukuy laya q'aytusmanta ruwasqa p'achasta ama churakunkichejchu. 20 Ichapis pipis uj kamachi warmiwan puñuykakapunman, chaytaj waj qhariwan parlapayasqaña kashajtin. Sichus chay warmi manaraj rantisqa, nitaj kacharisqaraj karqa chayqa, iskayninku jasut'isqa kananku tiyan, chaywampis mana wañunankukamachu, imaraykuchus chay warmeqa manaraj kacharipusqachu karqa. 21 Chay runaqa Tata Diosman jaywanan tiyan uj corderota yachashaspa juchallisqanrayku, chaytataj apanan tiyan Dioswan Tinkukuna Toldo punku yaykuyman. 22 Sacerdoteqa chay corderota Tata Diosman jaywajtin, chay runaj juchasnin pampachasqa kanqa. 23 Canaán jallp'aman yaykuspaqa, tukuy laya poqoj sach'asta churankichej. Chantá poqoykunanta ama p'itinkichejchu, nitaj mikhunkichejchu kinsa wata junt'ata. 24 Tawa watamantataj tukuy poqoynin Tata Diospaj t'aqasqa kanqa, agradecekunapaj jaywana jina. 25 Phishqa watamantataj mikhunkichej chay poqoykunata. Ajinamanta chay sach'asqa aswan sumajta poqopusonqachej. Noqamin kani Señorniykichej Tata Diosqa. 26 Ama ni ima aychata yawarnintinta mikhunkichejchu. Ama adivino kayta yachaykuychejchu, nitaj qhepaman imaschus kanantapis yachayta munaychejchu. 27 Chujchasniykichejtaqa ama muyullataqa k'utukunkichejchu, nitaj sunkhasniykichejpa puntasnintapis. 28 Ama wañusqaraykoqa cuerpoykichejta imawampis q'allurakunkichejchu, nitaj ima señalestapis cuerpoykichejpi ruwakunkichejchu. Noqamin Tata Diosqa kani. 29 Ama ususiykichejta millay kawsayman tanqaykuychejchu, nitaj khuchi warmiman tukojtapis qhawallankichejchu, llajtaykichejman chay millay kawsay ama junt'aykunampaj. 30 Samarikuna p'unchayniykunata waqaychaychej. Tiyakunay cheqatapis manchachikuywan qhawaychej. Noqamin Tata Diosqa kani. 31 Ama aysirisman qayllaychejchu, nitaj layqasmampis. Ama chaykunaman tapukuspa ch'ichichakuychejchu. Noqa Señorniykichej Tata Diosqa kani. 32 Machu runastaqa sayarikuspa napaykuychej, jinallataj jatumpaj qhawaychej. Diosniykichejtapis manchachikuychej. Noqamin Tata Diosqa kani. 33 Qankuna ukhupi tiyakoj forasterosta ama llakichispa k'umuykachachinkichejchu. 34 Paykunata qankuna kikiykichejta jina qhawaychej; paykunata munakuychej qankunata jinallataj, imaraykuchus qankunapis forasteros jinallataj Egipto jallp'api tiyakorqankichej. Noqamin Señorniykichej Tata Diosqa kani. 35 Maychus kajta ruwankichej, imallatapis midishaspa, pesashaspa, waj imasta vendeshaspapis. 36 Qankunaqa cheqan balanzasniyoj kankichej, jinallataj cheqan pesasniyoj, cheqan chimpusniyoj ima. Noqamin Señorniykichej Tata Diosqa kani, pichus qankunataqa Egiptomanta orqhomorqaykichej, chay. 37 Ajinaqa, tukuy kamachisqasniyta, imastachus nisqasniyta allinta ruwaspa cheqanta junt'aychej. Noqamin Tata Diosqa kani.
