LEVÍTICO 18

1Tata Diosqa Moisesman parlaspa, nerqa: 2Niy israelitasman Noqa Señorniykichej Tata Dios kasqayta. 3Egiptopi maypichus qankuna tiyakorqankichej, imastachus paykuna ruwanku, chay imasta ama ruwankichejchu. Mayqenmanchus pusasqaykichej, chay Canaán sutiyoj jallp'aj ususnintapis amallataj ruwankichejchu, nitaj kamachisqasninkutapis junt'ankichejchu. 4Noqaj kamachisqasniyta junt'ankichej, nisqasniytapis kasunkichej, chaykunaman jinataj kawsankichej. Noqaqa Señorniykichej Tata Dios kani. 5Nisqasniyta, kamachisqasniytapis kasunkichej. Pillapis chaykunata junt'ajqa kawsanqa. Noqamin Tata Diosqa kani. 6Ni pi qharipis renqachu familianmanta kaj warmiwan puñuykakapoj. Noqamin Tata Diosqa kani. 7Tataykita ama p'enqaypi rikhurichinkichu mamaykiwan puñuykakapuspa. Payqa mamaykimin; mana chaytaqa ruwayta atinkichu. 8Ama tataykitaqa p'enqaypi rikhurichinkichu warminwan puñuykakapuspa. 9Ama panaykiwan puñuykapunkichu, ni tataykimanta panayki kajtin, nitaj mamaykimanta panayki kajtimpis. Tataykej wasimpipis nacechun, wajpipis nacechun, amapuni paywan puñuykapunkichu. 10Ama warmi allchhiykiwan puñuykapunkichu, ususiykejtapis kachun, chayrí churiykejtapis kachun. Amapuni paywan puñuykapunkichu. 11Ama tataykej ususinwan puñuykapunkichu, imaraykuchus payqa tataykej ususin, chayrayku qampataqa panayki, waj mamayoj kajtimpis. Amapuni paywan puñuykapunkichu. 12Ama tataykej pananwan puñuykapunkichu, imaraykuchus payqa tiayki. 13Ama mamaykej ñañanwan puñuykapunkichu, imaraykuchus payqa tiayki. 14Ama tioykita p'enqaypi rikhurichinkichu warminwan puñuykapuspa, imaraykuchus payqa tiayki. 15Ama ñojch'aykiwan puñuykapunkichu; payqa churiykej warmin, chayrayku ama paywan puñuykapunkichu. 16Ama wawqeykita p'enqaypi rikhurichinkichu warminwan puñuykapuspa. 17Ama uj warmiwan, ususintinwan puñuykapunkichu, nitaj ususi allchhinwan, chay warmej churimpatapis kachun, chayrí ususimpatapis kachun. Amapuni paywan puñuykapunkichu. Chayqa ancha millaymin, imaraykuchus paykunaqa yawar masis kanku. 18Ama uj warmiwanqa ñañantinwan ujllapi casarakunkichu, nitaj paywan puñuykapunkichu warmiyki kawsashajtenqa, ama paykunapura chejninakunankupaj. 19Ama warmiwan puñuykapunkichu killampi yawarniyoj kashajtin. 20Ama runa masiykej warminwan puñuykapunkichu, ajinamanta paywan qhenchachakuspa. 21Amapuni Moloc nisqa lantiman wawasniykita mayqentapis jaywankichu wañunampaj, ama chay jinamanta Diosniykej sutimpa honranta t'akanaykipaj. Noqamin Tata Diosqa kani. 22Ama pi qhariwampis puñuykapunkichu, warmiwampis puñushawaj jina; chayqa millay juchamin. 23Ama ima uywawampis warmiwan jina kankichu ama chay jinamanta ch'ichichakunaykipaj; nillataj warmispis ajinata ruwachunkuchu. Chayqa millay juchamin. 24Ama chay imasta ruwaspa millayta juchachakunkichejchu. Chay imaswan kay nacionesmanta runas juchachakorqanku, mayqenkunatachus kunan qankunaj ñawpaqeykichejmanta qharqosaj, chaykuna. 25Ajinamanta chay jallp'aqa millay ch'ichichasqa qhepakorqa. Noqatajrí chay juchasninkumanta cuentata mañarqani. Chay jallp'aspis qharqomorqa chaypi tiyakoj runasta. 26Qankunaqa israelitas, jinallataj qankunawan tiyakoj forasterospis kay kamachisqasniyta, imastachus nisqasniytapis kasunkichej. Qankunaqa ama ni mayqen chay millay juchasta ruwankichejchu. 27Chay tukuy millay juchasta ruwarqanku qankunamanta ñawpajta kay jallp'api tiyakojkuna; chayrayku jallp'aqa millay ch'ichichasqa qhepakorqa. 28Pajtataj qankunatañataj chay jallp'aqa qharqosunkichejman chay millay juchasrayku, imaynatachus qankunamanta ñawpajta kaj runasta qharqorqa, jinataqa. 29Pillapis chay jatuchaj millay juchasta qankuna ukhumanta ruwajqa wañuchisqa kanqa. 30Chayrayku Noqaj nisqayta junt'ankichej. Ama qankunaqa urmankichejchu, qankunamanta ñawpajta karqanku, chay runaspa millay ruwasqasninkuta ruwaspaqa. Nillataj chaykunawan ch'ichichakunkichejchu. Noqaqa Señorniykichej Tata Dios kani.

will be added

X\