LEVÍTICO 13

1Tata Diosqa Moisesman, Aaronmanwan parlaspa, nerqa: 2Maypachachus mayqempa cuerpompi ima punkiy rikhurinman, chayrí qhashqararas, chayrí yuraj llijtis, chayrí llijtis lepra jina chaypachaqa, rikuchikamonqa sacerdote Aaronman, chayrí kuraj kaj sacerdotej churisninman. 3Chay llijtisninta sacerdoteqa qhawanqa. Sichus chay llijti chaynejpi pelo yurajman kutin, chay llijtitaj astawan t'oqoykukun chayqa, lepra onqoypuni kanqa. Sichus sacerdote qhawaspa, chay runaj onqoyninta leprapuni kasqanta nin chayqa, chay runata ch'ichipaj qhawasqa kasqanta nenqa. 4Sichus uj runaj cuerpompi rikhurin uj yuraj llijti, manataj t'oqokun, nitaj pelosnimpis yurajyan chayqa, sacerdote chay onqosqata qanchis p'unchayta wisq'anqa. 5Chay qanchis p'unchaymanta sacerdoteqa ujtawan qhawallanqataj. Sichus chay onqoyqa kikillampuni kashan, manataj astawan jatunyan chayqa, uj qanchis p'unchaytawan wisq'allanqataj. 6Chay qanchis p'unchaymantaqa sacerdote ujtawan qhawallanqataj. Sichus chaykama chay onqoyqa thañisqaña, mana astawan jatunyan chayqa, sacerdote nenqa chay runaqa llimphupaj qhawasqa kasqanta; cuerpompi kashan, chayqa phusullu onqoylla kanqa. Chay onqosqaqa p'achasninta t'ajsakonqa; chaymantaraj llimphupaj qhawasqa kanqa. 7Sichus chay yuraj phusullu miraykullanmantaj chay runaj cuerpompi, sacerdote payta llimphupaj qhawasqanmantaña chayqa, ujtawan sacerdotewan qhawachikoj rillachuntaj. 8Sichus chay sacerdote qhawan chay runaj onqoynin astawan miraykusqanta tukuy cuerpompi chayqa, mana llimphupaj qhawasqa kananta nenqa, lepra onqoyniyoj kasqanrayku. 9Uj runapi lepra onqoy rikhurejtenqa, sacerdoteman pusanqanku. 10Chaypi sacerdote payta qhawanqa; sichus chay runaj punkisqan yuraj kanman, pelosnimpis chay cheqapi yurajllataj, chaynejpi aychantaj llijtiyasqa kanman chayqa, 11chay runaj onqoynenqa uj saphichasqa lepra. Sacerdoteqa chay runata nenqa mana llimphu kasqanta. Chantapis chay runataqa manaña wisq'anqachu, imaraykuchus ch'ichipaj qhawasqaña. 12Sichus lepra nisqa onqoyqa runaj tukuy cuerponman junt'aykun chakisninmanta umankama sacerdotej rikuyta atisqanman jina chayqa, 13chaypacha sacerdoteqa payta qhawanqa. Sichus lepra nisqa onqoyqa chay runaj tukuy cuerponman junt'aykun chayqa, sacerdote nenqa chay runa llimphu kasqanta, imaraykuchus chay onqoynenqa yurajman tukun; chay runaqa llimphupaj qhawasqaña. 14Chaymantaqa sichus llijtiyasqa aychan may cheqapipis rikhurinman chayqa, chay runaqa mana llimphupaj qhawasqa kanqa. 15Chaypacha sacerdote chay runaj llijtiyasqa aychanta qhawaspa, nenqa mana llimphu kasqanta. Chay llijti aychaqa mana llimphuchu, chayqa lepramin. 16Chantá sichus chay llijtiyasqa aycha yurajyallanqataj chayqa, chay onqosqaqa rinan tiyan sacerdoteman. 17Sacerdotetaj payta qhawanqa. Sichus llijtiyasqa aychaqa yurajyasqaña chayqa, sacerdote nenqa chay runa llimphuña kasqanta, aychan llimphuña kasqanrayku. 18Sichus mayqen runa ima llijti onqoymantapis sanoyanman chayqa, 19sitajchus chay sanoyasqa cheqa yurajta punkinman, chayrí yuraj pukaman, chhoqopachataj rikhurinman chayqa, sacerdotewan qhawachikamuchun. 20Sichus sacerdote qhawaspa rikun chay cheqaqa t'oqoyaykusqanta, pelosnimpis yurajman tukusqanta chayqa, chaypacha nenqa chay runaqa mana llimphu kasqanta, imaraykuchus chay llijtenqa lepra onqoy. 21Sichus chay nanasqan cheqapi rikun pelosnin manaña yurajyasqanta, nitaj aychampis t'oqoyaykusqanta, manachayqa chinkapusqantaña chayqa, sacerdoteqa chay onqosqata qanchis p'unchayta wisq'anqa. 22Sichus chay llijteqa astawan wiñanman chayqa, sacerdote nenqa chay runa mana llimphu kasqanta; nenqataj chay llijtenqa lepra onqoy kasqanta. 23Chantá sichus chay nanasqan mana wiñan chayqa, nanasqampa t'irillan kashan chayqa, sacerdote chay runata nenqa llimphu kasqanta. 24Sichus mayqempis ninapi ruphachikunman, chay ruphasqa aychan cheqapitaj rikhurinman yuraj puka llijti, chayrí yuraj llijti chayqa, 25sacerdote chayta qhawanqa. Sichus chay nanasqa cheqapi pelosqa yurajman tukunman, aychampis ruphasqa t'irimpi astawan t'oqoyanman chayqa, lepra onqoy chay ruphasqampi qallarikun. Chantá sacerdoteqa nenqa chay runaqa mana llimphu kasqanta lepra onqoyniyoj kasqanrayku. 26Chantá sichus sacerdoteqa chayta qhawarispa, mana rikunman chay nanasqa cheqapi yurajyasqa pelosta, nitaj astawan t'oqoyasqanta, manachayqa astawan chinkapushasqanta chayqa, sacerdoteqa chay runata qanchis p'unchayta wisq'anqa. 27Chay qanchis p'unchaymanta sacerdoteqa ujtawan chay runata qhawanqa. Sichus chay onqoy astawan jatunyarqa chayqa, sacerdote chay runata nenqa mana llimphu kasqanta, lepra llijti onqoyniyoj kasqanrayku. 28Sichus chay nanasqa mana astawan jatunyanchu, chinkapushantaj chayqa, chay punkisqaqa ruphasqallamanta. Ajinaqa sacerdote chay runata nenqa llimphu kasqanta; chay punkisqaqa ruphasqamanta t'irilla. 29Sichus uj qharejta, chayrí warmejta umampi, chayrí k'akimpi uj llijti onqoy rikhurinman chayqa, 30chayta sacerdote qhawanqa. Sichus chay llijti t'oqoyashan, pelostaj q'elluyaspa pisiyashan chayqa, sacerdote chay runata nenqa mana llimphu kasqanta, tijlla onqoyniyoj kasqanrayku umampi, chayrí k'akimpi. 31Sichus sacerdoteqa chay tijlla onqoyta qhawashaspa rikunman mana astawan t'oqosqa kasqanta, nitaj chaynejpi yana pelos kasqanta chayqa, sacerdote chay runata qanchis p'unchayta wisq'anqa. 32Qanchis kaj p'unchaypi sacerdoteqa ujtawan qhawanqa chay llijtita. Sichus chay tijlla onqoy mana astawan jatunyan, nitaj astawan t'oqoyan, nitaj pelospis chaynejpi q'elluyan chayqa, 33sacerdote chay runata nenqa sunkhasninta, chujchasnintapis ruthukunanta; chay maynejpichus tijllayarqa, chaynejllata mana ruthukonqachu. Chaymantataj sacerdoteqa qanchis p'unchaytawan wisq'anqa. 34Chay qanchis p'unchaymantataj sacerdoteqa ujtawan qhawallanqataj, chay tijllayasqa karqa, chaynejta. Sichus chay onqoy mana astawan jatunyanman, nitaj astawan t'oqoyanman chayqa, sacerdote nenqa chay runa llimphuña kasqanta. Chaymantataj chay runaqa p'achasninta t'ajsanqa, llimphupajtaj qhawasqa kanqa. 35Sichus chay tijlla onqoy astawan chay runapi jatunyan, sacerdote llimphu nisqanmanta chayqa, 36sacerdoteqa ujtawan qhawanqa chay onqosqa runata. Sichus chay tijlla onqoy astawan jatunyan chayqa, sacerdote amaña q'ellu pelosta mask'achunchu. Chay runaqa ch'ichipaj qhawasqa kanqa. 37Chantá sichus sacerdoteqa yuyanman chay tijlla onqoy chinkasqanta, chaynejpitaj yana pelos rikhurisqanta rikonqa chayqa, chay niyta munan chay onqoyqa chinkasqantaña. Sacerdoteqa nenqa chay runa llimphuña kasqanta. 38Maypachachus uj qharejta, chayrí uj warmejta cuerpompi yuraj qhashqararas rikhurin chaypacha, 39sacerdote chayta qhawanqa. Sichus chay runaj ukhumpi rikhurinman yuraj oqeyasqa tijllas chayqa, chaykunaqa qhashqaslla. Jina kajtenqa, chay runaqa llimphulla. 40Sichus mayqen runajta chujchasnin t'akakun, p'ajlataj rikhurinman chayqa, chay runaqa llimphulla. 41Sichus frenten patallamanta chujchasnin t'akakunman, jinamantataj p'ajla frente rikhurinman chayqa, chay runapis llimphulla kashan. 42Chantá sichus chay p'ajlampi pukayasqa yuraj llijtis rikhurinman, umampa qhepannejpi, chayrí ñawpajninnejpi chayqa, lepra onqoypuni rikhurishan. 43Chaymantataj sacerdote chay runata qhawanqa. Sichus chay runaj p'ajlampi llijti punkisqasnin yuraj pukayasqa kanman lepra onqoyman rijch'akoj chayqa, chay runaj cuerpompi lepra onqoy rikhurin. 44Chay runaqa leprawan onqosqa kashan, imaraykuchus umampi llijti rikhurin. Sacerdoteqa chay runata nenqa mana llimphu kasqanta. 45Pichus ajina llijti lepra onqoyniyojqa llik'isqa p'achasta churakuchun, ch'aska umallataj purichun, siminta qhataykukuspataj, qhaparichun: Leprayoj kani, leprayoj kani, nispa. 46Chay lepra onqoyniyoj kashaspaqa, ch'ichipaj qhawasqa kanqa. Chantapis sapallan tiyakunan tiyan jaramanta jawapi. 47Sichus ima p'achapi, millmamanta, chayrí linomanta ruwasqapi qhorwariyay rikhurinman, 48ima awasqapi, linomanta, millmamanta, chayrí qaraspi, qaramanta ima ruwasqapipis, 49sitajchus chay imaspi qhorwariyayqa q'omeryasqa, chayrí pukayasqa kanman chayqa, chay qhorwariyayqa lepra qhorwariyay kashan. Chaytaqa apaspa, sacerdoteman rikuchimuchun. 50Chay qhorwariyayta sacerdoteqa qhawaytawan, qanchis p'unchayta jallch'anqa. 51Qanchis p'unchaymantataj chay qhorwariyasqata ujtawan qhawallanqataj. Sichus chay qhorwariyasqaqa p'achapi, awasqapi, qaraspi, qaramanta ima ruwasqapipis jatunyanman chayqa, chay qhorwariyayqa millay leprapuni kashan, chay imastaj ch'ichipaj qhawasqa kanqanku. 52Ajinaqa chay imapichus qhorwariyay rikhurenqa, chay tukuynin ruphachisqa kachun, millay lepra kasqanrayku. 53Sichus sacerdote rikun chay qhorwariyayqa mana astawan jatunyasqanta chayqa, 54pay kamachenqa chay imasta mayllanankuta, jinaspataj qanchis p'unchaytawan jallch'anankuta. 55Chay qhorwariyasqata mayllasqamantaña sacerdoteqa ujtawan qhawarenqa. Sichus mana chinkanman chayqa, chay qhorwariyayqa ch'ichipaj qhawasqa kanqa. Chay imapichus qhorwariyasqa karqa, mana jatunyanman chayqa, ruphachisqa kachun ismusqa kasqanrayku, jawanmanta ukhunmantapis kachun. 56Sichus chay qhorwariyasqata mayllasqamantaña sacerdoteqa qhawarispa rikunman qhorwariyay chinkapushasqantaña chayqa, chay cheqanejta sacerdoteqa k'utonqa, p'achamantapis, qaramantapis, awasqamantapis kachun. 57Sichus rikhurillanqapuni chay qhorwariyayqa p'achapi, awasqapi, chayrí qaramanta ruwasqapi chayqa, chay imapichus watejmanta qhorwariyay rikhurerqa, chay ruphachisqa kachun. 58Sichus mayllajtinku, chay qhorwariyay chinkanman p'achamanta, awasqamanta, chayrí qaramanta, ima ruwasqallamantapis chayqa, ujtawan t'ajsachunku, llimphupajtaj qhawasqa kanqa. 59Chaykuna kanku imaynatachus ruwanamanta kamachisqasqa, chay qhorwariyasqamanta, millmamanta ruwasqa p'achaspi, linomanta ruwasqa p'achaspi, awasqaspi, qarasmanta imachus ruwasqapipis, ajinamanta chay imas llimphupaj qhawasqachus, chayrí ch'ichipaj qhawasqachus kananta ninankupaj.

will be added

X\