LEVÍTICO 10

1Aaronpa churisnin Nadabwan, Abiuwan, sapa ujninku juch'uy braserosta oqharikuspa, chaykunaman ninatawan inciensotawan churaykorqanku. Chay ninatataj Tata Diosman jaywarqanku, mayqentachus Tata Diosqa mana kamacherqachu larwachinankuta, chayta. 2Chaypacha Tata Diospa ñawpaqenmanta ujllata nina llojsimuspa, paykunata wañurparicherqa. Ajinamanta iskayninku Tata Diospa ñawpaqempi wañorqanku. 3Chantá Moisesqa Aaronman nerqa: Kaytamá Tata Diosqa niyta munarqa kay imasmanta parlaspa: Noqaman qayllamuwajkunamanqa may santo kasqayta rikuchisaj. Tukuynin israelitasman jatun kayniypa k'anchayninta rikuchillasajtaj, nispa. Aarontajrí ch'impacha qhepakorqa. 4Chantá Moisesqa Aaronpa tion Uzielpa churisnin Misaelta, Elzafantawan wajyaspa, nerqa: Jamuychej, orqhoychejtaj kay qankunaj ayllusniykichejta Dioswan Tinkukuna Toldoj ñawpaqenmanta, jaramanta jawaman, nispa. 5Paykunataj qayllaykuytawan, chay wañusqasta p'achasninkumanta jap'ispa, jaramanta jawaman aparqanku, Moisespa nisqanman jina. 6Chaymanta Moisesqa Aaronman, Eleazarman, Itamarmanwan nerqa: Ama q'ara umalla kaychejchu, nitaj p'achasniykichejtapis llik'ikuychejchu, wañusqarayku llakisqa kasqaykichejta rikuchispa, ama qankunapis wañunaykichejpaj, amataj qankunarayku Dios astawan sinch'i phiñakuyninta israelitasman rikuchinampaj. Chaywampis tukuynin ayllu masiykichej israelitasqa Tata Diosmin wañojkunata ninawan q'olachisqanmanta waqallachunku. 7Amataj karunchakuychejchu Dioswan Tinkukuna Toldomanta, ama qankunapis wañunaykichejpaj, imaraykuchus Tata Diospa jawina aceiteqa qankunapi kashan, nispa. Paykunataj Moisespa kamachisqanman jina ruwarqanku. 8Chantá Tata Diosqa Aaronman kay jinata parlallarqataj: 9Qan, chayrí churisniyki Dioswan Tinkukuna Toldoman yaykunaykichej kajtenqa, ama ujyankichejchu vinota, nitaj ima machachej ujyanastapis, ama wañunaykichejpaj. Kayqa uj ley tukuy mirayniykichejpaj kanqa wiñaypaj. 10Ajinamanta qankunaqa allinta reparayta atinkichej mayqenchus Diospaj t'aqasqa kajta, mana t'aqasqa kajtapis, llimphupaj qhawasqa kajta, chayrí ch'ichipaj qhawasqa kajtapis. 11Qankuna israelitasman yachachinaykichej tiyan Tata Diospa tukuy kamachisqasninta, mayqentachus Paymin Moisesnejta qosorqachej, chaykunata. 12Chantá Moisesqa Aaronman, iskaynin qhepakoj churisnin Eleazarman, Itamarmanwan kay jinata nerqa: Tata Diosman chay ch'aki mikhuy jaywanata qosqaykichejmanta puchojtaqa mana levadurayojta mikhuychej altarpa qayllampi. Chay jaywasqaqa Tata Diospaj t'aqasqa, may santomin. 13Chaytaqa mikhuychej Diospaj t'aqasqa cheqapi, imaraykuchus chayqa qanman, churisniykimanwan qosqamin Tata Diosman jaywasqa q'olachinasmantaqa. Ajinata Tata Diosqa kamachiwarqa. 14Pecho aychata, pierna aychatawan Tata Diosman ikhasqa jaywasqamanta qankunapaj kanqa, chaytataj mikhunkichej Diospaj t'aqasqa cheqapi, qan, churisniyki, ususisniyki ima. Chaykuna qankunapaj kanqa israelitaspa apamusqanku allinyakuy jaywanasmanta. 15Tata Diosman ikhasqa pierna aychata, pecho aychatawan, q'olachispa jaywanapaj wiratawan khuska, Tata Diospa ñawpaqenman apamonqanku. Chayqa qampaj, churisniykipajwan kanqa, Tata Diospa kamachisqanman jina. 16Chantá Moisesqa taporqa, chay chivomanta juchaspa cuentanmanta apamusqanku, chaymanta. Chay chivotataj q'olaykuchisqankuña. Chayta yachaspa, Moisés phiñakorqa Aaronpa iskaynin qhepakoj churisnin, Eleazarpaj, Itamarpajwan. Kay jinatataj nerqa: 17Imaraykutaj juchasrayku jaywasqata mana mikhorqankichejchu Diospaj T'aqasqa Cheqapiri? Chayqa Tata Diospaj t'aqasqa may santomin karqa. Chayta Tata Diosqa qankunaman qosorqachej, qankuna israelitaspa juchasninkuta apanaykichejpaj, chaywan paykunaj juchasninku Tata Diospa ñawpaqempi pampachasqa kanampaj. 18Chay chivoj yawarnin Dioswan Tinkukuna Toldo ukhuman mana apasqa kasqanrayku, qankuna Diospaj T'aqasqa Cheqapi mikhunaykichej karqa chay jaywasqa aychata, noqa kamachisqayman jina. 19Aarontajrí payman kuticherqa: Kunanqa paykuna Tata Diosman jaywarqanku juchasninkurayku q'olachina jaywanata, Tata Diosta yupaychanapaj q'olachinankutawan; qhaway, kay imas noqata pasawan. Sichus chay juchasrayku jaywasqa aychasta mikhuyman karqa chayqa, Tata Diospaj allillanchu kanman karqa? nispa. 20Moisesqa chayta uyarispa, sonqo junt'asqa qhepakorqa.

will be added

X\