LAMENTACIONES 5

1Kay jina mana allin imas qhatiriwasqaykumanta yuyarikuy ari, Tata Dios. Rikuy ari, imaynatachus k'umuykachachiwasqaykuta. 2Tukuy imasniykuta waj runas jap'ikapunku. Wasisniykoqa waj runaspa makisninkuman chayan. 3Mana tatayoj wajcha wawas jina rikhuriyku, mamasniykutaj viudas jina qhepakunku. 4Yakuykuta qolqewan rantikuyku. Llant'allaykutataj qolqewan rantikuyku. 5Pikunachus ñak'arichiwayku, chaykunaqa pataykupi kanku. Sinch'i sayk'usqaña kayku, manataj samarikojta saqewaykuchu. 6T'antata mikhunaykurayku egipciosman, asiriosman ima k'umuykorqayku. 7Tatasniykoqa juchallikorqanku, wañurapunkutaj. Chay castigotaj noqaykuman chayamuwayku. 8Wata runaspa kamachinan kayku. Ni pipis kanchu chaykunaj makisninkumanta libranawaykupaj. 9Wañuywan kawsaywan t'antatapis tariyku, ch'impi sayaj suwaspa qhawashasqallan. 10Qaraykoqa horno jina k'ajarin, yarqhaywan ch'ayñasqaykupi. 11Sionpi warmistaqa mana munashajta honranta t'akarqanku. Judá llajtapi sipaskunatapis abusallarqankutaj. 12Kurajkunataqa makisninkumanta warkhuykorqanku. Machu runastapis mana jatumpaj qhawarqankuchu. 13Aswan kallpayoj wayna runastaqa molinota muyuchichimorqanku. Wakin pisi kallpayoj waynastaj llant'a q'episwan atiykuchikorqanku. 14Punkuspi tiyakoj machu runaspis manaña rikukunchu. Waynakunaj takisqankupis manaña uyarikunchu. 15Sonqoykupi kusikoyqa manaña kanchu; tusuypis llakiyman tukupun. 16Umaykumanta pilloqa urmapun. Imanallasqaykuchus kunanqa. Ay noqaykumanta, imaraykuchus juchallikuyku. 17Chayrayku sonqoykupi manchay llakiy tiyan; ñawisniykoqa chharpuyaykuwayku. 18Sión orqoqa ch'impacha kashan; atojkunallaña chaypeqa purishanku. 19Qantajrí, Tata Dios, wiñaypajpuni kanki. Kamachiyniykeqa uj miraymanta uj miraykama kanqa. 20Imaraykutaj chay jinatapuni qonqakapuwaykuri? Imaraykutaj kay chhika unaytaña saqerpariwaykuri? 21Wajyakapuwayku ari, Tata Dios, noqaykutaj Qanman jampusqayku. Kay p'unchayniykuta mosojyachiy ari, ñawpajta karqa, ajinata. 22Qanqa qhesachasqatachu qhesachawayku? Qanqa anchatañapunitaj noqaykupaj phiñakunki ari.

will be added

X\