JUECES SUTIYOJ QHELQA 4

1Ehud wañupusqanmanta qhepata, israelitakunaqa Tata Diospa contranta watejmanta juchallillarqankutaj. 2Chantá, Tata Diosqa cananeo kamachej Jabinmanñataj israelitakunata jaywaykorqa. Payqa Hazor llajtapi kamacherqa. Soldadonkunampa kamachejnintaj Sísara karqa; payqa Haroset-goimpi tiyakorqa. 3Jabinpata jisq'on pachaj fierromanta carretankuna karqa. Payqa iskay chunka watataña israelitakunata sinch'i ñak'aricherqa, chayraykutaj paykunaqa Tata Dios yanapananta mañakorqanku. 4Chay pacha israelitakunata kamachisharqa uj warmi Diosmanta willaj, Lapidotpa warmin, Débora sutiyoj. 5Deboraqa uj palma sach'a urapi tiyakuyman yachasqa karqa; chay sach'aqa Efraínpa orqonpi karqa, Ramá llajta Betel llajtawan tinkuypi. Chay sach'atataj “Déboraj Palma Sach'an” nej kanku; israelitakunaqa payman rej kanku, justiciata mask'aspa. 6Uj p'unchay Deboraqa wajyacherqa Quedesmanta Abinoampa churin Baracta, Neftalí ayllumanta. Paymantaj nerqa: –Israelpa Tata Diosqa kamachisunki kay jinata: “Tabor Orqoman rispa, chaypi tantamuy chunka waranqa runakunata Neftalí ayllumanta, jinataj Zabulón ayllumantawan. 7Noqa kachamusaj Jabinpa saldadokunata kamachej Sisarata, soldadokunatawan, carretakunatawan ima, Cisón Wayq'okama qankunawan maqanakunankupaj. Noqataj chaypi paykunata atipachisqaykichej,” nispa. 8Baracqa kuticherqa: –Qan noqawan rejtiykeqa, risaj; mana rejtiykitaj, nillataj risajchu, nispa. 9Deborataj nerqa: –Qanwan risaj. Chaywampis kay maqanakupi mana qanchu jatunchasqa kanki, imaraykuchus Tata Diosqa uj warmi nejta Sisarata wañuchenqa, nispa. Jinataj Deboraqa Baracwan khuska Quedesman rerqa. 10Chaypitaj Baracqa runakunata wajyarqa Zabulón ayllumanta, Neftalí ayllumantawan, tantaykorqataj chunka waranqa runakunata paywan rinankupaj. Deborapis paywan khusqa rerqa. 11Quedes qayllapi, Zaanaim encina sach'a chaynejpi, tiyakusharqa quenita Heberqa. Payqa chay waj quenitakunamanta t'aqakampusqa. Quenitakunaqa Moisespa suegron Hobabpa mirayninmanta karqanku. 12Jinapi Tabor Orqoman Barac wicharisqanta yachaytawankama, 13Sisaraqa tantaykorqa jisq'on pachaj fierromanta maqanakunapaj carretakunanta, tukuy soldadokunantawan, paykunawantaj rerqa Haroset-goimmanta Quisón wayq'okama. 14Chantá Deboraqa Baracman nerqa: –Rillayña; Tata Diosqa kunan Sisarata atipachisonqa, imaraykuchus Tata Diosqa soldadokunaykej ñawpaqenkuta rishan, nispa. Chaypacha pacha Baracqa Tabor Orqomanta chunka waranqa soldadokunawan urayk'amorqa. 15Maqanakuman yaykojtinkukama, Tata Diosqa pawiracherqa Sísaraj soldadonkunata, jinallataj carretakunapi kajkunatapis, Baracpa soldadonkunaqa tukuyninkuta wañurachirqanku. Sisarapis carretanmanta urayk'uspa, chakipi ayqekorqa. 16Chaykama Baracqa Sísaraj carretakunanta, soldadonkunatawan qhatiykorqa Haroset-goimkama. Chay p'unchaypiSísaraj soldadonkumanta ni uj kawsasaj karqachu. 17Hasormanta jatun kamachej Jabín, chaypachaqa quenita Heberpa ayllunwan k'achata kawsakushasqanku. Chantá Sisaraqa ayqekushaspa, Heberpa warmin Jaelpa toldonman chayakorqa. 18Jaelqa taripamoj llojsispa, nerqa: –Qayllakamuy, wiraqochíy, ama manchachikuychu, nispa. Sísara toldoman yaykojtin, Jaelqa uj qhatanawan pakaykorqa. 19Chantá Sisaraqa mayta ch'akichikusqanraykutaj yakuta mañarikorqa. Jaeltaj leche jallch'ana qara p'uñuta kicharispa, qorqa ujyanampaj. Chaymantataj watejmanta payta qhataykullarqataj. 20Chaypacha Sisaraqa Jaelta nerqa: –Toldoyki punkupi tiyay; pillapis jamuspa: ¿Pi kaypi kashan? nijtenqa: Mana pipis kanchu ninki, nispa. 21Sisaraqa sinch'i allin sayk'usqa kaspa, sinch'ita puñurparerqa. Jaeltajrí uj k'ullu masota oqharikamuspa, toldomanta uj estakata jap'iytawan, ch'insitullamanta Sisaraman chimpaykorqa. Jinataj ch'ipoqonman takaykuspa umanta pampakama pasarpacherqa. Ajinata wañorqa Sisaraqa. 22Baracqa Sisarata mask'aspa chayamojtintaj, Jaelqa taripamuspa, nerqa: –Jamuy, rikuchisqayki, pitachus mask'ashanki, chayta, nispa. Baractaj toldoman yaykuspa, rikorqa Sisarata pampapi wañusqa wijch'urayashajta, estacawan ch'ipoqompi takasqata. 23Ajinata Tata Diosqa cananeo jatun kamachej Jabinta k'umuykucherqa tukuy israelitakunajpa ñawpaqenkupi. 24Chaymantapacha israelitakunaqa astawan kallpachakuspa, Jabintaqa tukuynejmanta muyukorqanku, chinkachinankukama.

will be added

X\