JUECES SUTIYOJ QHELQA 20

1Chaypacha tukuy israelitakuna Danmantapacha Beersebakama, jinataj Galaadkama uj runa jinalla Tata Diospa ñawpaqempi Mizpa llajtapi tantaykukorqanku . 2Diospa ayllun Israelmanta kurajkunaqa chaypi kasharqanku, jinallataj tawa pachaj waranqa soldadokunapis. 3Chanta Benjamín ayllumanta kajkunaqa tukuy ayllu israelitakunamanta Mizpapi tantasqa kashasqankuta yacharqanku. Chantá israelitakunaqa chay levitata tapurerqanku imaynapichus chay warminta wañuchisqankuta. 4Wañojpa qosan levitataj nerqa: –Warmiywan noqa chayarqani Benjamín aylloj jap'iynimpi Guibea llajtaman, chay ch'isi chaypi puñukunaykupaj. 5Chay ch'isipachataj chay llajtamanta runakunaqa, puñusharqayku, chay wasiman muyuykamorqanku wañuchiwayta munaspa, jinamantari mana munashajta wañuchinankukama warmiyta alqhochakorqanku. 6Chantá warmiypa ayanta khuchuspa, tukuy Israel aylluman aparacherqani, jinamanta tukuyniykichej yachanaykichejpaj kay p'enqayta ruwasqankumanta. 7Kunanqa niychis israelitakuna jina, imatachus ruwana kasqanta, nispa. 8Chantá uj runa jinalla tukuyninku sayarikuspa, nerqanku: –Ni mayqenninchej toldonchejman, chayrí wasinchejman kutiripusunchu. 9Suerteta choqasunchej yachanapaj pikunachus Guibeaman maqanakoj rinankupaj. 10Sapa chunka runakunamanta ujta t'aqaychej; paykunaqa mink'asqa kanqanku soldadokunaman mikhunata apanankupaj. Chay ujkunataj Guibeapi kajkunawan maqanakamonqanku chay millay juchata Israelpi ruwasqankurayku. 11Ajinata ari tukuy israelitakuna uj runa jinalla tantaykukorqanku chay llajtayojkunawan maqanakamunankupaj. 12Benjamín ayllojpa tukuy jap-iynimantaj willarachimorqanku: «¿Imajtintaj wakin chay millayta ruwarqankichejri? 13Apamuwayku Guibeapi kashanku, chay millay ruwajkunata wañuchinaykupaj; ajinamanta Israel ayllunmanta millay juchata chinkachinapaj, nispa.» Jinapis Benjaminmanta kajkunaqa mana israelitakuna kasorqankuchu. 14Benjaminmanta kajkunaqa tukuynejmanta Guibeapi tantakorqanku israelita masinkunawan maqanakunankupaj. 15Benjamín ayllumanta soldadokunaqa iskay chunka sojtayoj waranqa karqanku; Guibeapi qanchis pachaj ajllasqa runakunaqa wajlla karqanku. 16Paykuna ukhupi kallarqankutaj qanchis pachaj lloq'enchukuna; paykunaqa lloq'e makiwan warak'aspa mana pantajchu kanku. 17Chay jawa, chay ujkuna israelitakunapis tantakorqanku tawa pachaj waranqa, maqanakupi sumajta maqanakuyta yachajkuna. 18Israelitakunaqa Betelman rispa, Diosta tapukorqanku mayqen aylluchus Benjamín aylluwan ñawpajta maqanakoj rinanta. Tata Diostaj kutichispa, nerqa Judá aylluraj ñawpajta rinanta. 19Chantá israelitakunaqa tutamanta jatarikuspa, Guibea chimpapi jarakorqanku. 20Benjaminmanta kajkunajpa contrankupi rerqanku, Guibea chimpapi maqanakuman yaykunankupaj wakiykuchikorqanku . 21Jinallapi Benjaminmanta kajkunaqa llajtamanta llojsispa, chay p'unchaypi iskay chunka iskayniyoj waranqa israelitakunata wañucherqanku. 22Chayrayku israelitakunaqa Betelman watejmanta rispa Tata Diospa ñawpaqempi inti yaykunankama jik'un jik'un waqarikorqanku. 23Chanta Tata Diosta tapullarqankutaj: ¿Benjamin ayllu masinkunawan watejmanta maqanakoj kutillasqaykutajchu manachu? nispa.Tata Diostaj kamacherqa rinallankutataj. 24Q'ayantenqa paykuna kallpachakorqanku Benjaminmanta kajkunawan maqanakoj kutinankupaj, rerqankutaj maypichus chay ñawpaj maqanakorqanku, chayman. 25Ujtawan Benjaminmanta kajkunaqa Guibea llajtamanta llojsimuspa maqanakorqanku, chaypitaj chunka pusajniyoj waranqa israelita wañucherqanku. 26Chanta tukuy Israelitakuna soldadokuna piwan ima watej Betelman rillarqankutaj, Tata Diospa ñawpaqempi waqamunankupaj. Chaypitaj tukuy p'unchayta ayunarqanku, chantá Tata Diosman jaywarqanku uywa ñak'asqa q'olachinata, jinallataj allinyakuna jaywanatawan. 27Jaqay tiempospeqa Diospa trato ruwasqan arcaqa Betelpi kasharqa, 28sacerdotenkutaj Finees karqa; payqa Eleazarpa churin karqa, Aaronpa allchhintaj. Israelitakunaqa Tata Diosta tapukorqanku: ¿Benjamín ayllu masiykuwan watejmanta maqanakoj riyta atiykumanchu, chayrí atipasqa jinachu qhepakusqayku? nispa. Tata Diostaj paykunata nerqa: Maqanakoj rillaychej; q'aya Noqa yanapasqaykichej atipanaykichejpaj, nispa. 29Chaypacha israelitakunamanta wakin soldadokunaqa Guibea qayllampi pakaykukorqanku. 30Chaykamataj wakin israelitakunaqa rerqanku kinsa kaj p'unchayniman Benjaminwan maqanakoj, maqanakunankupaj Guibea llajtaj chimpampi sayakorqanku, chay ñawpaj kutipi jina. 31Uj kutitawan Benjaminmanta kajkunaqa llajtamanta llojsiytawan, israelitakunawan maqanakuspa, llajtankumanta karunchakorqanku, . Chay kuti kinsa chunka israelitakunata wañucherqanku Betelman chantá Gabaaman rina ñankunapi, chay pampakunampi ima. 32Benjaminmanta kajkunaqa ñawpaj kutinpi jina yuyarqanku israelitakunaqa paykunamanta ayqeshasqankuta. Israelitakunarí, llajtamanta karunchakusharqanku chay llajtayojkuna qhatiykunankupaj ñankunakama. 33Jinallamanta israelitakunaqa maqanakoj llojsimorqanku. Chanta sayaykorqanku Baal-tamarpi; jinallataj q'omer pampapi pakasqa kasharqanku Guibea llajtaj muyuynimpi, chaykunapis llojsimullarqankutaj. 34Tukuynin israelitakunamanta sumaj wakichisqa maqanakoj soldadokunaqa chunka waranqa jina Guibea llajtata jap'ej yaykorqanku. Maqanakoyqa sinch'i karqa, Benjaminmanta kajkunataj mana yacharqankuchu atipachikushasqankutaña. 35Tata Diosqa israelitakunata Benjaminmanta kajkunata maqanakupi atipanankupaj yanaparqa. Chay p'unchaypi israelitakunaqa Benjamín ayllumanta kajkunata iskay chunka phishqayoj waranqa pachajniyojta wañucherqanku . 36Chaypacha Benjaminmanta kajkunaqa yachakorkorqanku atipaykuchikusqankuta. Israelitakunaqa ayqerikusqanku Benjaminmanta kajkunaqa maqanakushaspa, Guibea qayllapi pakaykukorqanku, chaykunaman atienekusqankurayku. 37Chay runakunaqa ujllata Guibeaman llajtaman yaykuykuspa, tukuy qhepakojkunata wañuracherqanku. 38Llajta qayllapi pakasqa kasharqanku chaykunawan, karupi kasharqanku chay israelitakunawanqa yachachinaykukusqanku, maypachachus llajtapi nina q'oshñita rikuspa chaypacha, yachanankupaj llajtata jap'isqankutaña. 39Chantá ayqej israelitakunaqa q'oshñita rikuytawan kutirikamunanku karqa Benjaminmanta kajkunawan maqanakunankupaj. Benjaminmanta kajkunaqa kinsa chunka israelitakunata wañurachispa, ñawpaj kutipi jina yuyarqanku atipaykullasqankutaña. 40Chanta llajtamanta q'oshñi jatarejqa, Benjaminmanta kajkunaqa qhepata qhawarikuspa, rikorqanku q'oshñita pataman oqharikushajta. 41Chaypacha israelitakunaqa maqanakoj kutirikamorqanku, Benjaminmanta kajkunataj mancharisqa t'ukushaj qhepakurqanku, llajtankuta ruphaykusajta rikuspa. 42Israelitakunamanta ayqeyta qallarerqanku ch'in pampaman rej ñanninta, manataj ayqeyta aterqankuchu, imaraykuchus llajtamanta llojsimojkuna soldadokunañataj paykunata wañuracherqanku. 43Benjaminmanta kajkunaqa israelitakunawan muyuykusqa rikhurerqanku, israelitakunataj qhatiykuspa, Menuhamantapacha Guibeaj inti llojsimuynejkama thustiykorqanku. 44Benjamín ayllumanta kaj soldadokunaqa, ajinata wañorqanku maqanakupi chunka pusajniyoj waranqa . 45Chay wakintaj kutirispa, ch'in pampanejta, Rimón chhanka chaynejman ayqekorqanku. Phishqa waranqa jina wañurachisqa karqanku ñankunapi. Israelitakunaqa Gidomkama paykunata qhatiykuspa, iskay waranqatawan jina wañucherqanku. 46Chay p'unchaypi Benjaminmanta sumaj soldadokunaqa iskay chunka phishqayoj waranqa wañurqanku. 47Jinapis sojta pachaj jinaraj Benjaminmanta kajkunaqa ch'in pampanejman ayqekuspa, Rimón chhankapi tawa killata qpakakorqanku. 48Israelitakunaqa Benjaminmanta puchoj runakunata, tukuy llajtakunaman chayasqankupitaj wañuracherqanku; ajinallatataj tukuy uywata tarisqankutapis wañurachillarqankutaj, tukuy llajtakunatapis ruphaykuchillarqankutaj.

will be added

X\