JUECES SUTIYOJ QHELQA 2

1Tata Diospa angelnenqa Gilgalmanta Boquim nisqa cheqaman rispa, israelitakunaman nerqa: «Noqaqa Egipto suyumanta orqhomorqaykichej; jinaspataj pusamurqaykichej ñawpa tataykichejkuman qonayta nerqani chay jallp'akama. Paykunamantaj nerqani: “Mana jayk'ajpis qankunawan tratoyta p'akisajchu, 2qankunaqa amapuni chay llajtayojkunawan waj tratota ruwankichejchu, manachayqa altarninkuta phirinkichej” nispa. Qankunarí mana kasuwarqankichejchu. ¿Imaraykutaj jinata ruwarqankichejri? 3Chayrayku kunan niykichej: Chay runakunata ñawpaqeykichejmanta mana wijch'usajchu; aswanpis paykuna, jinallataj diosninkupis jayt'akuspa urmaychejpaj jina kanqanku,» nispa. 4Tata Diospa angelnin parlayta tukojtinkama, tukuynin israelitakuna sinch'imanta waqayta qallarerqanku. 5Chayrayku chay cheqata suticharqanku Boquim, nispa. Chayllapitaj Tata Diosman uywa ñak'asqa q'olachinakunata jaywarqanku. 6Josué israelitakunata kacharapojtinkama, paykunaqa sapa ujninku rerqanku jallp'ankuta jap'ikapoj. 7Israelitakunaqa Tata Diosta kasukuspa kawsakorqanku, Josué chanta kurajkuna ima kawsanankukama. Pikunachus t'ukuna imakunata israelitakunapaj Tata Dios ruwasqanta rikusqanku, chaykuna. 8Chantá Josueqa wañuporqa pachaj chunka watasniyoj kashaspa. 9Payta p'amparqanku paypa jallp'ampi Timnat-serah nisqapi; chayqa kashan Efraínpa aylluj jap'iynimpi, Gaas Orqomanta wichaynejpi. 10Jinallatataj Josuejpa mit'anmanta kaj israelitakunapis wañupullarqankutaj. Ajinamanta qhepa wiñajkunaqa Tata Diosmanta chanta israelitakunapaj imatachus ruwapusqanmanta mana yacharqankuchu. 11Chaymantataj israelitakunaqa, Tata Diospa mana munasqan millaykunata ruwarqanku. Baalman rijch'akoj tukuy laya lantikunata yupaychayta qallarerqanku. 12Paykunaqa karunchakorqanku ñawpa tatankoj Tata Diosmanta, pichus Egiptomanta paykunata orqhomorqa, chaymanta. Chaypi tiyakojkunaj diosninkuta yupaychayta qallarerqanku, Tata Diosta sinch'ita phiñachispa. 13Tata Diosmanta karunchakorqanku Baalta yupaychaspa, Astartej tukuy laya lantinkunata ima. 14Chayrayku Tata Diosqa israelitakunaj contrankuta sinch'ita phiñakuspa, tukuy kapuyninkuta suwakunawan qhechucherqa, chay muyuynikumanta kaj enemigonkuwantaj paykunata atipaykucherqa, nitaj paykunaqa kutichikuyta aterqankuchu. 15Sapa kuti maqanakuman purirejtinku, Tata Diosqa contrankupi sayaykorqa; manapuni allinchu paykunata qhatirerqa, Tata Dios ñawpajmantaña juraspa nisqanman jina. Jinamanta Tata Diosqa israelitakunata sinch'i llakiyman churarqa. 16Chaypacha Tata Diosqa juezkunata churarqa, suwakunajpa makinkumanta kacharichinankupaj. 17Chaywampis israelitakunaqa manapuni kasorqankuchu chay juezkunataqa, manachayqa Tata Diosta wasanchaspa, waj dioskunata yupaycharqanku. Ñawpa tatanku Tata Diospa kamachisqanta kasukuspa kawsakorqanku, paykunarí manaraj imapi Tata Diosta wasancharqanku. 18Tata Diosqa sapa kuti uj juezta churaj, chanta yanapallajpuni. Chay juez kawsashajtin, Tata Diosqa israelitakunata enemigonkumanta kacharichejpuni, sinch'i ñak'ariypi waqasqankuta uyarispa, khuyajkuspataj. 19Juezninku wañupojtintajrí, watejmanta paykunaqa juchallillajtaj kanku, ñawpa tatankumanta astawanraj waj dioskunata qhatispa chanta yupaychaspa ima. Manapuni t'aqakorqankuchu millayta ruwaspa kawsanamanta nitaj mana uyarikoj kanamanta. 20Chayraykumin Tata Diosqa Israelpa contrampi sinch'ita phiñakuspa, nerqa: «Kay runakunaqa ñawpa tatankuwan tratota ruwasqayta p'akinku, manataj kasuwayta munankuchu. 21Chayrayku Josué wañupusqanmanta llajtayojkuna qhepakorqankuraj, chaykunataqa mana ñawpaqenkumanta wijch'usajchu,» nispa. 22Chay imakunawan Tata Diosqa yachayta munasharqa, israelitakunaqa Tata Diosta kasukuspa purinkumanchus manachus, chayta, imaynatachus ñawpa tatankuna purerqanku, ajinata. 23Chayrayku Tata Diosqa mana wijch'orqachu chay llajtayujkunata, Josué kawsashaspa mana wijch'usqachu chaykunata, manachayqa saqellarqa qhepakunankuta.

will be added

X\