JUECES SUTIYOJ QHELQA 12

1Efraín ayllumanta runakunaqa tantaykukuspa, Jordán Mayuta chimparqanku Zafón chaynejman, Jeftemantaj nerqanku: –¿Imaraykutaj noqaykuman mana willaspalla amonitakunawan maqanakoj rerqankiri? Noqaykoqa qanwan riykuman karqa. Kunanqa chaymanta, qanta wasiykipi ruphaykuchisqayku, nispa. 2Jinapi Jefté kuticherqa: –Noqata, chantá runaykunatawan amonitakunaqa sinch'ita churanakuwarqayku. Noqa qankunata wajyakorqaykichej, qankunataj mana yanapawaj jamorqankichejchu. 3Qankuna yanapaj mana jamuwasqaykuta rikuspa, wañuyta mana manchachikuspa, amonitakunawan maqanakoj sayaykorqani, Tata Diostaj paykunata atipayta yanapawarqa. ¿Kunanqa imaraykutaj noqawan maqanakoj jamuwankichejri?, nispa. 4Chaypacha Jefteqa Galaadmanta tukuy runakunata tantaykuspa, Efraín aylluwan maqanakorqa, chanta paykunata atipaykorqa. Efraín ayllumanta kajkuna ajinata nispa phiñachisqanku: “Galaad llajtayojkuna chayakamujllan kaspa, Efraín aylloj, jinataj Manasés aylloj jap'iynimpi tiyakushankichej,” nispa. 5Chanta Galaadmanta kajkunaqa Efrain runakunaj Jordán Mayoj chimpanankuta wisk'aykorqanku. Chantá Efrainmanta kajkuna, mayqellampis ayqekushaspa pasachinankuta mañarikojtaqa, tapuj kanku: ¿Efraín ayllumanchu kanki? nispa. Mana chaymantachu kani, nejtataj, 6kay jinata parlachej kanku: Shibolet niy, nispa. Pichari mana sut'ita nejchu, manachayqa Sibolet nispalla parlaj, chaytaqa jap'iytawankama, kikimpi wañuchej kanku, Chaypacha Efraín ayllumanta tawa chunka iskayniyoj waranqatapuni wañuykucherqanku. 7Jefteqa israelitakunata sojta wata kamacherqa. Wañupojtenqa, Galaad, Mizpá llajtampi ayanta p'amparqanku. 8Jeftejpa qhepantaqa Belenmanta Ibsán sutiyojqa israelitakunajpa kamachin karqa. 9Ibsanpata kinsa chunka churinkuna karqa, kinsa chunka ususinkunapiwan, tukuyninkutataj mana ayllumanta kajkunatawan casararaykucherqa. Ibsanqa qanchis watata israelitakuna kamacherqa. 10Wañupojtenqa, Belenpi ayanta p'amparqanku. 11Paypa qhepanta, Zabulón ayllumanta Elonñataj chunka wata junt'ata israelitakunata kamacherqa. 12Wañupojtenqa, Aialón llajtapi ayanta p'amparqanku, Aialonqa Zabulón jap'iypi karqa. 13Paypa qhepanta Piratón llajtamanta Hilelpa churin Abdonñataj israelitakunata kamacherqa. 14Abdonpata tawa chunka churinkuna karqa, kinsa chunka allchhinkunataj, tukuyninkutaj burropi purej kanku. Abdonqa israelitakunata pusaj watata kamacherqa. 15Pay wañupojtenqa, Piratón llajtampi Efraín aylluj jap'iynimpi, Amalec orqo nejpi. ayanta p'amparqanku.

will be added

X\