1 Abimelecpa qhepanta Isacar ayllumanta uj runa Tola sutiyoj, israelitakunata kacharinampaj sayaykorqa. Tolaqa karqa Dodoj allchhin, Púaj churin. Payqa tiyakorqa Efraín aylluj ja'iynin orqo nejpi, Samir llajtapi. 2 Israelitakunata iskay chunka kinsayoj watakunata kamacherqa; wañupojtintaj, Samir llajtapi ayanta p'amparqanku. 3 Chay qhepanta Galaadmanta Jairñataj sayarerqa, payqa iskay chunka iskayniyoj watata israelitakunata kamacherqa. 4 Jairqa kinsa chunka churinkunanyoj karqa. Paykuna sapa ujninku burropi purej kanku, sapa ujninkutaj Galaad chaynejpi uj llajtayojkama karqanku. Chay kinsa chunka llajtakunaqa kunankamapis Jairpa Llajtakunan nisqa kashanku. 5 Jair wañupojtenqa, Camón nisqa cheqapi ayanta p'amparqanku. 6 Israelitakunaqa watej Diospa contranta juchallillarqankutaj; yupaychaspa Baalman, jinataj Astarteman rijch'akoj lantikunata, ajinallatataj Siriamanta, Sidonmanta, Moabmanta, Amonmanta lantikunata, jinataj filisteokunajpata kajkunatawan. Tata Diosmanta karunchakuspa, manaña Payta kasurqankuchu. 7 Chayraykumari Tata Diosqa paykunapaj sinch'ita phiñarikuspa, filisteokunaman, amonitakunamanwan paykunata qaraykorqa. 8 Chaymantapacha chunka pusajniyoj watata filisteokunaqa, jinataj amonitakunapis maytapuni ñak'aricherqanku Galaadpi tukuy tiyakojkunata, Jordán Mayoj chimpampi amorreokunajpa jallp'ankupi kajkunata ima. 9 Amonitakunaqa Jordán Mayuta chimparqanku maqanakamunankupaj Judá aylluwan, Benjamín aylluwan, jinataj Efraín aylluwampis. Ajinamanta israelitakunaqa may llakiypi rikhurerqanku. 10 Chaypacha Tata Diosmanta mayta mañakorqanku: «Diosniyku, contraykipi juchalliyku; Qanmanta karunchakuyku Baal lantikunata yupaychanaykurayku,» nispa. 11 Chantá Tata Diosqa kuticherqa: «Qankunaqa ñak'arichisqa karqankichej egipciokunanejta, amorreokunanejta, amonitakunanejta, jinataj filisteokunanejta, 12 sidoniokunanejta, amalecitakunanejta, chantá madianitakunanejta; maypachachus qankuna qhaparikamuwarqankichej chaypacha, noqa paykunamanta kacharicherqaykichej. 13 Chaywampis qankunaqa noqamanta karunchakorqankichej waj dioskunata yupaychamuspa. Chayrayku noqaqa manaña ujtawan kacharichisqaykichejñachu. 14 Riychej, mañakamuychej ajllakusqaykichej dioskunamanta. Paykunawan kunanqa ñak'ariykunamanta kacharichikuychej,» nispa. 15 Chanta israelitakunaqa Tata Diosman kuticherqanku: «Juchalliyku. noqaykuwan munasqaykita ruway; Chaywampis ama jina kaychu kacharichiwayku ari,» nispa. 16 Chantá israelitakunaqa waj dioskunata saqespa, Tata Diosta yupaycharqanku; Tata Diospis manaña munarqachu israelitakuna astawan ñak'arinallankutapuni, imaraykuchus sinch'ita llakikorqa. 17 Chaypacha amonitakunaqa sumajta wakichiskuspa, Galaadpi jarakorqanku, israelitakunataj tantaykukuspa, Mizpapi jarakorqanku. 18 Galaadpi tiyakoj israelitakunaqa chay kurajninkuwan parlanakorqanku: ¿Pitaj amonitakunawan maqanakuyta qallarenqari? Pichus qallarejqa Galaadpi tukuy tiyakojkunaj kamachejninku kanqa, nispa.
