JUECES SUTIYOJ QHELQA 1

1Josué wañupusqanmanta qhepata, israeltakuna Tata Diosta tapukorqanku: –¿Mayqen ayllurajtaj ñawpajta cananeokunawan maqanakoj renqari? nispa. 2Tata Diostaj paykunaman kuticherqa: –Judá aylluraj ñawpajta maqanakoj renqa, payllamantaj chay jallp'aqa qosqa kanqa, nispa. 3Chaypacha Judá ayllumanta kajkunaqa wajyarikorqanku Simeón ayllumanta kaj wawqenkuta, ujchakuspa maqanakoj rinankupaj, Judá aylluman qosqa karqa, chay jallp'akunaman. Chaymantataj khuskallataj rinanku karqa, Simeón aylluman qosqa karqa, chay jallp'akunatapis jap'ikapunankupaj. Jinapi Simeón ayllumanta kajkunaqa Judá ayllumanta kajkunawan khuska maqanakuman rerqanku. 4Ajinamanta Judá ayllumanta kajkunaqa maqanakoj yaykorqanku cananeokunajpa jallp'akunanman, jinataj ferezeokunajpamampis, Tata Diosqa Judajpa ayllunta yanaparqa maqanakupi atipanankupaj. Bezec cheqapeqa cananeokunata chanta ferezeokunatawan chunka waranqa runakunata atiparqanku; kamachej Adonisedecpis paykunawan atipasqa karqa. 6Adonisedec ayqekojtin, paykuna qhatiykuspa jap'irparerqanku; chantá machu dedonta mut'urparerqanku iskaynin makinmanta, chakinmanta ima. 7Chaypacha Adonisedecqa nerqa: «Ñawpajtaqa noqa mut'uracherqani qanchis chunka kamachejkunaj makinkunaj machu dedonta, jinataj chakikumantapis; chay runakunataj mikhuna t'akakusqanmanta mesay urapi pallaj kanku mikhunankupaj. Kunanrí imaynatachus noqa ruwarqani, kikillantataj Tata Dios ruwawan, nispa.» Chantá Jerusalenman payta aparqanku, chaypitaj wañuporqa. 8Jerusalenta jap'ikaporqanku Judá ayllumanta kajkuna maqanakuspa; espadawan runakunanta wañurachiytawan, llajtataqa ruphaykucherqanku. 9Chaymantaqa orqo nejpi tiyakoj cananeokunawanñataj maqanakorqanku Néguev chaynejpi, jinataj chay pampakunanejpi tiyakojkunawampis. 10Ajinallatataj, Hebronpi tiyakorqanku, chay cananeokunawampis maqanakullarqankutaj. Chay llajtaj ñawpa sutenqa Quiriat-arba karqa, chaypitaj Sesaita, Ahimanta, Talmaita ima atiparqanku . 11Chaymantaqa Debir llajtapi tiyakojkunawanwan maqanakullarqankutaj; chay llajtaj ñawpa sutin Quiriat-sefer karqa. 12Chaypacha Caleb nerqa: Pichus Debir llajtata maqanakuspa atipajmanqa ususiy Acsatawan kasarachisaj, nispa 13Calebpa wawqen Quenazpa churin Otonielqa chay llajtata atiparqa. Chanta Calebqa ususin Acsatawan casaracherqa. 14Casarakusqanku p'unchayqa Otonielqa Ascata umacharqa tatanmanta astawan jallp'ata mañakunampaj. Jinapi Calebqa ususin Acsata burromanta urayk'ushajta rikuspa, taporqa: –¿Imatataj munashankiri? nispa. 15Acsataj kuticherqa: –Jallp'a qowasqaykeqa chaki jallp'a mana yakuyoj. Mañarikuyki ari yaku juturisniyoj jallp'akunatawan, nispa. Chantá Calebqa yaku juturiyoj jallp'akunatawan paykunaman qorqa wichaynejpi, jinataj uranejpipis. 16Quenita nisqa runakunaqa karqanku Moisespa suegrompa mirayninmanta kajkuna. Paykunaqa llojserqanku Judá aylluwan khuska Palmeras llajtamanta, rerqankutaj Judajpa ch'in pampannejman, Neguevpi Aradmanta aswan uranejman; chaypi Amalecitakuwan tiyakaporqanku. 17Chaypacha Judá ayllumanta kajkunaqa rerqanku Simeón ayllumanta kajkunawan, imaynatachus parlanakusqankuman jina. Sefatpi tiyakoj cananeokunata atiparqanku, chay llajtata chinkacherqanku thuñispa. Chaytataj Horma, nispa suticharqanku. 18Judá ayllumanta kajkunaqa Tata Diospa yanapayninwan wijch'orqanku orqospi tiyakojkunata; chaywampis manapuni wijch'orqankuchu chay pampakunanejpi kajkunataqa, chaypi tiyakoj runakuna fierromanta carretayoj kasqankurayku. 19Manataj jap'ikaporqankuchu Gaza llajtata, Ascalón llajtata, Ecrón llajtatawan nitaj muyuynimpi jallp'akunatawan. 20Moisés nisqanman jina, Hebronqa Calebman qosqa karqa, Calebtaj chaymanta wijch'orqa Anacpa kinsantin churinkunata. 21Jinapis Benjamín ayllumanta kajkunaqa Jerusalén llajtamanta mana wijch'orqankuchu chaypi tiyakoj jebuseokunata. Chayraykumari kunan p'unchaykama Jerusalenpi khuska jebuseokuna Benjamín ayllumanta kajkunawan tiyakushanku. 22Tata Diospa yanapayniwan José ayllumanta kajkunaqa Betelta jap'ikapoj rerqanku. 23Chay llajtaj ñawpa sutenqa K'anchay nisqa karqa. Chaykama wateqajkunata kacharqanku. 24Chay wateqajkunataj llajtamanta llojsimushaj uj runata rikuspa, nerqanku: «Sichus qan rikuchiwasqayku maynintachus llajtaman yaykunata chayqa, noqaykupis qanta khuyasqayku, nispa.» 25Jinapi chay runaqa rikuykucherqa maynintachus llajtaman yaykunata, paykunataj chay llajtapi tiyakojkunata tukuyninkuta wañuracherqanku; jinapis ñanta rikuchej chay runataqa mana wañucherqankuchu, nitaj aylluntapis. 26Chaypacha chay runaqa hititakunaj jallp'ankuman ripuspa, chaypi mosoj llajtata jataricherqa, K'anchay sutitataj churarqa; chay sutiwan rejsisqa kunankama kashan. 27Manasés ayllumanta kajkunaqa mana wijch'orqankuchu kay llajtakunapi tiyakojkunata: Bet-seanmanta, Taanacmanta, Dormanta, Ibleammanta, Meguidomanta ima, nillataj chay qayllakunapi juch'uy llajtakunamantapis. Chayrayku cananeokunaqa tiyakullarqankupuni paykunawan. 28Israelitakuna astawan kallpachakuspa, chay cananeokunataqa sinch'i ruwanaman churarqanku; chaywampis manapuni paykunata wijch'uyta aterqankuchu. 29Efraín ayllumanta kajkunapis manallataj wijch'orqankuchu Guézerpi tiyakoj cananeokunata; jinamanta cananeokunaqa paykunallawampuni tiyakorqanku. 30Zabulón ayllumanta kajkunapis manallataj wijch'orqankuchu Quitronpi, jinataj Nahalalpi tiyakoj cananeokunataqa; jinamanta cananeokunaqa chayllapipuni tiyakorqanku, sinch'i ruwanaman churasqa kaspapis. 31Aser ayllumanta kajkunapis chaypi tiyakoj cananeokunataqa manallataj wijch'orqankuchu: Acomanta, Sidonmanta, Ahlabmanta, Aczibmanta, Helbamanta, Afecmanta, Rehob llajtamanta ima. 32Chay llajtakunapi tiyakojkunata mana wijch'usqankurayku paykunawan khuska tiyakaporqanku. 33Neftalí ayllumanta kajkunapis manallataj wijch'orqankuchu Bet-semesmanta, Bet-anatmantapis, tiyakoj cananeokunataqa; chaywampis sinch'i ruwanaman paykunata churarqanku, chaypitaj paykunawan khuska tiyakorqanku. 34Amorreokunaqa Dan ayllumanta kajkunata qharqorqanku orqonejkama, manataj pampakunaman urayk'amojta saqerqankuchu. 35Jinamanta amorreokunaqa Jerespi, Aialonpi, jinataj Saalbimpi tiyakapoj qhepakaporqanku. Chaywampis Josejpa mirayninmanta kajkuna aswan atiyniyoj kaspa, amorreokunata sinch'i ruwanaman churarqanku. 36Amorreokunajpa jallp'ankoj mojonnenqa Acrabim wichaynejmantapacha Selakama karqa, aswan patakamapis rillarqapuni.

will be added

X\