JOSUÉ 4

1Chantá tukuyña Jordán Mayuta chimpajtinku, Tata Diosqa Josueta nerqa: 2«Israelitakunamanta chunka iskayniyoj qharikunata ajllay, sapa ayllumanta ujta. 3Paykunatataj kamachiy: Jordán Mayumanta maypichá sacerdotekuna sayashanku chaymanta sapa ujpis uj rumita oqhariychej, chaymanta apaspataj, kunan ch'isi maypichá jarakunkichej, chayman churankichej.» nispa. 4Chaymantá Josueqa chay chunka iskayniyoj ajllasqan runakunata wajyaspa, 5nerqa: «Yaykuychej mayu chawpikama, Tata Diosniykichejpa arcampa ñawpaqenta. Chaymanta sapa ujniykichej uj rumita lijrariykukuspa apamuychej, sapa uj Israel ayllupaj uj rumitakama, ajinamanta tukuynimpi chunka iskayniyoj rumikuna kanampaj. 6Chay rumikunaqa qankuna yuyarikunaykichejpaj señal jina kanqa. Qhepanejman wawaykichejkuna tapusojtiykichej: “Kay rumikuna, ¿ima niytataj munanri?” nispa chaypachaqa, 7qankuna ninkichej: “Tata Diospa trato ruwasqan arca Jordán mayuta chimparqa chaypacha, yakoqa arcaj ñawpaqempi iskayman p'itikorqa. Kay tawqasqa rumikunaqa kaypi imachus kasqanta wiñaypaj yuyarikunanchejpaj kashan,”» nispa. 8Israelitakunaqa Josueman Tata Dios kamachisqanman jina kikinta ruwarqanku. Jordán mayumanta chunka iskayniyoj rumikunata oqharerqanku, sapa Israel ayllupaj ujtakama. Chanta jarankukama apaspa, chaypi churarqanku. 9Josuepis chunka iskayniyoj rumikunata oqharispa, Jordán mayupi churallarqataj, sacerdotekuna Tata Diospa trato ruwasqan arca lijrarisqa maynejpichus sayarqanku, chaypi. Chay tawqasqa rumiqa kunankama chaypi kashallanrajpuni. 10Tata Diospa trato ruwasqan arcata apaj sacerdotekunaqa Jordán mayu chawpipi sayasharqanku, israelitakuna Josueman Tata Dios imatachus kamachisqanta ruwayta tukunankukama. Tukuy ima Josueman Moisés kamachisqanman jina ruwasqa karqa. Israelitakunataj usqhay usqhayllata mayuta chimparqanku. 11Tukuy chimpapiña kajtinkutaj, Tata Diospa arcanwan sayashaj sacerdotekunapis chimpallarqankutaj, jinaspataj israelitakunaj ñawpaqenkuman rerqanku. 12Jinataj paykunawan khuska chimpallarqankutaj maqanakunankupaj sumaj wakichisqa kajkuna Rubén ayllumanta, Gadmanta, Manasés khuskan ayllumanta ima. Paykuna Moisespa kamachisqanman jina israelitakunajpa ñawpaqenkuta risharqanku. 13Paykunaqa tawa chunka waranqa kuraj qharikuna karqanku maqanakunankupaj sumaj wakichisqa. Tata Diospa ñawpaqenta Jericó pampakama rerqanku. 14Chay p'unchay Tata Dios imatachus ruwasqanta rikuspa, israelitakunaqa Josueta kamachejninkuta jina resikaporqanku, wañupunankamataj respetakorqanku, imaynatachus Moisestapis jatumpaj qhawarqanku, ajinata. 15Chantá Tata Diosqa Josueta nerqa: 16«Tata Diospa trato ruwasqan arcata apashaj sacerdotekunata kamachiy, Jordán mayumanta llojsimunankuta» nispa. 17Josuetaj sacerdotekunata Jordán Mayumanta llojsimunankuta kamacherqa. 18Chantá sacerdotekuna Jordán mayumanta llojsimuspa, ch'aki jallp'aman chakinkuta churaykusqankutawankama, mayumanta yakoqa ñawpajta jina wasaykuspa maychus rinanta riporqa. 19Israelitakunaqa Jordán mayumanta, wata qallariy killata chunka kaj p'unchaynimpi llojserqanku, chanta Guilgalpi, 20Chaypi Josueqa, Jordán mayumanta apamusqanku, chay chunka iskayniyoj rumikunata tawqarqa. 21Chanta Israelitakunata nerqa: Sichus qhepaman wawaykichejkuna tapusonqachej: Kay rumikuna, ¿ima niytataj munanri? nispa chayqa, 22paykunaman willankichej imaynatachus kay Jordán mayuta ch'aki jallp'ata jina israelitakuna chimpamusqankuta. 23Tata Diosniykichej kay Jordán mayupi yakuta sayacherqa, chayninta chimpamunaykupaj, imaynatachus Puka Qochatapis chayninta chimpanaykupaj ch'akicherqa, ajinata. 24Ajinamanta kay pachapi tukuy runakuna yachanqanku Tata Diosqa may jina atiyniyoj kasqanta, qankunataj Tata Diosniykichejta yupaychankichej, nispa.

will be added

X\