JOSUÉ 3

1Q'ayantin paqarin tutamanta jatarispa, Josuewan chanta tukuynin israelitakunawan Sitimmanta purirerqanku. Jordán mayu kantuman chayaspa, chaypi jarakorqanku, manaraj mayuta chimpashaspa. 2Kinsa p'unchaymantaj kurajkunaqa tukuynin jarakunata muyorqanku. 3Chantá israelitakunaman kay jinata kamacherqanku: Maypachachus Diosninchejpa arcanta sacerdotekunata apashajta rikunkichej chaypacha, 4Ajinapi yachankichej maynintachus rinaykichejta, imaraykuchus qankunaqa mana jayk'ajpis chay ñanta purerqankichejchu. Chaywampis ama arcaman anchata qayllankichejchu; uj kilometrota jinalla qhepanta rinkichej, nispa. 5Josuetaj israelitakunata nerqa: “Llimphuchakuychej, imaraykuchus Diosqa q'aya qankuna ukhupi milagrokunata ruwanqa,” nispa. 6Sacerdotekunamampis nillarqataj: “Qankuna Diospa trato ruwasqan arcata lijraykukuspa apaychej, chanta runakunajpa ñawpaqenkuta puririychej,” nispa. Paykunataj Diospa trato ruwasqan arcata lijrariykukuspa, runakunajpa ñawpaqenkuta rerqanku. 7Chantá Tata Diosqa Josueta nerqa: “Kunan p'unchaymantapacha israelitakunajpa ñawpaqenkupi jatun respetowan qhawanaman tukuchisqayki. Ajinapi paykuna yachanqanku Noqaqa qanwampuni kashasqayta, imaynatachus Moiseswan karqani, jinata. 8Qan kamachiy ari sacerdotekunata Diospa trato ruwasqan arcata apanankuta, chantá Jordán mayuman chayaytawan, yaku kantupi sayanankuta,” nispa. 9Chantá Josueqa israelitakunata nerqa: “Qayllamuychej, Tata Diosniykichejpa nisqanta uyarinaykichejpaj. 10Kawsaj Dios qankunawan kashasqanta kunan yachankichej, yachallankichejtaj risqaykichejman jina cananeokunata, hititakunata, heveokunata, ferezeokunata, gergeseokunata, amorreokunata, chantá jebuseokunata ima, ñawpaqeykichejmanta wijch'onqa chaypacha. 11Qhawaychej: Tata Diospa trato ruwasqan arcaqa Jordán Mayuta ñawpaqeykichejta chimpanqa. 12Chayrayku kunanqa ajllaychej ari Israel ayllukunamanta chunka iskayniyoj qharikunata, sapa ayllumanta ujtakama. 13Tukuy kay pachaj Tata Diosninpa arcanta apashaj sacerdotekuna yakuman saruykojtinkukama, yakoqa iskayman t'aqakonqa; patamanta jamoj yakoqa qochayaspa jina kikimpi sayanqa,” nispa. 14Chantá israelitakunaqa Jordán mayuta chimpanankupaj tukuyninku jarankuta oqharerqanku. Ñawpaqenkutataj sacerdotekuna Tata Diospa trato ruwasqan arca lijrarisqa rerqanku. 15Jordán Mayu yakoqa sapa chajra oqharina tiempota wasaykojpuni, chaywampis sacerdotekuna mayuman chayaspa yaku kantuman saruykusqankutawan, patanejmanta jamoj yakoqa kikimpi sayarqa, Adam nisqa llajtamanta Saretán nisqa llajtakama. Uraman p'itikoj yakutaj tukukunankama K'ara Qocha nisqaman jurayk'orqa. Ajinata yakoqa mayupi iskayman t'aqarpayakorqa, israelitakunataj Jericó llajta cheqaman chayninta chimparqanku. 17Tukuynin israelitakuna Jordán Mayuta chimparqanku. Tata Diospa trato ruwasqan arcata apaj sacerdotekunapis mayu chawpipi ch'aki jallp'api jina sayarqanku, tukuynin israelitakuna chaynejta chimpanankukama.

will be added

X\