1 Chay qhepata Josueqa Rubén aylluta, Gad aylluta, Manasés khuskan ayllutawan wajyaspa, nerqa: 2 «Qankunaqa, Tata Diospa kamachin Moisés imatachus kamachisorqachej, chayta junt'ankichejña. Jinallataj noqaj kamachisqaykitapis kasullawarqankichejtaj. 3 Kunankama wawqeykichejkunata mana sapankuta saqerparinkichejchu, Tata Diosniykichejpa kamachisqantaqa allintapuni junt'arqankichej. 4 Tata Diospis imatachus nisqanta junt'an, wawqeykichejkunataj sumaj kawsaypiña kashanku. Chayrayku kunanqa jap'isqaykichej jallp'aman kutipuychej, Jordán mayu chimpapi Tata Diospa kamachin Moisés qosorqachej, chayman. 5 Kayllata mañakuykichej: Tata Diospa kamachin Moisés imatachus kamachisusqanta sumajta junt'aychej. Tata Diosniykichejta munakuychej, munasqanta ruwaspa puriychej, kamachisqantapis kasuychejpuni. Tukuy sonqowan, tukuy kayniykichejwantaj Payta sirvikuychej,» nispa. 6 Chantá Josueqa paykunata bendeciykuytawan, kacharpayarqa, paykunataj wasinkuman riporqanku. 7 Manasés khuskan aylluman Moisesqa jallp'ata Basán nisqa chaynejpi qosqa. Manasespa wakin khuskan ayllumantaj, Josueqa Jordán mayoj inti yaykuynejpi jallp'ata qorqa, israelita wawqenkunajpa chawpinkupi. Paykunatapis Josueqa bendeciykuytawan, wasinkuman kachapullarqataj. 8 Chaypachataj paykunaman nerqa: Kunanqa qankuna jallp'aykichejman kutipushankichej ashkha imakunayoj, ashkha uywayoj, qoriyoj, qolqeyoj, bronceyoj, fierroyoj, ashkha p'achayoj ima. Enemigoykichejmanta qhechusqaykichejtaqa wakinta wawqeykichejkunaman jaywarinkichej, nispa. 9 Ajinata Rubén ayllu, Gad ayllu, Manasés khuskan ayllu ima Canaán suyupi, Silo llajtapi, wakin israelitakunamanta t'aqakorqanku, Galaadpi jallp'ankuman kutipunankupaj, mayqentachus Tata Diosqa Moisesman kamacherqa paykunaman qonanta, chayman. 10 Chanta kinsantin ayllu, Rubén ayllu, Gad ayllu, Manasés khuskan ayllu ima Jordán mayu kantuman chayaspa, Canaán suyullapiraj kashaspa uj jatun altarta ruwarqanku. 11 Wakin israelitakunatajrí yacharqanku Canaán suyoj mojonnimpi, Jordán mayu kantupi, israelitakunajpa jap'iyninkupi uj altarta ruwasqankuta. 12 Israelitakunarí yachaytawankama, paykunawan maqanakoj kachaykukunankupaj Silopi tantakorqanku. 13 Manaraj imapis kashajtintaj, Rubén aylluman, Gad aylluman, Manasés khuskan aylluman ima Eleazar sacerdotej churin Fineesta kacharqanku. 14 Paywantaj israelitakunajpa kurajninkumanta chunka rerqanku, sapa ayllumanta ujkama. 15 Galaad cheqaman chayaspataj, Rubén aylluman, Gad aylluman, Manasés khuskan aylluman ima, nerqanku: 16 –Noqaykoqa Tata Diospa tukuy ayllumpa sutimpi nishayku: ¿Imaraykutaj israelitakunajpa Diosninta wasanchankichejri? ¿Imajtintaj Tata Diospa contrampi oqharikuspa kay altarta ruwankichejri? 17 ¿Manachu Peor nisqa cheqapi juchallikusqanchejta yuyarikunkichej? Chaypi juchallisqanchejrayku Diosqa millay onqoywan jasut'iwarqanchej, ashkhataj wañurqanku. Juchallisqanchejraykutaj kunankama ñak'arishanchej. 18 ¿Manachu chaywanqa wanankichej? ¿Imapajtaj kunan qankunapis Tata Diospa contranta oqharikunkichejri? Kunanqa Tata Diospa contranta juchallikusqaykichejrayku, q'aya Diosqa israelitakunajpa contrankuta phiñarikonqa. 19 Sichus jap'isqaykichej jallp'api Diosta yupaychayta mana atinkichejchu chayqa, Tata Dios Payta yupaychanapaj ajllakusqan cheqaman jampuychej ari. Noqaykoj jap'iyniykupi tiyakunaykichejpaj mask'akuychej. Ama Tata Diospa contranta juchallikuychejchu, nitaj noqaykoj contraykupi sayariychejchu, Tata Diosninchejpa altarnin kashajtin waj altarta ruwakuspa. 20 Yuyarikullaychejtaj Zerah churin Achán, Tata Diospaj t'aqasqa phirikunan kajta oqharikuspa, juchallikusqanta. Chay juchanmanta tukuy israelitakunajpa contrankuta Tata Dios phiñarikorqa. Mana Achanllachu juchanrayku wañorqa, nispa. 21 Chanta Rubén ayllu, Gad ayllu, Manasés khuskan ayllu imaqa israelitakunajpa kurajninkukunaman kuticherqanku: 22 –Tukuy dioskunaj Diosnin yachan, mana Paypa contrampichu, nitaj Paymanta t'aqakunaykuraykuchu kay altarta ruwasqaykuta. Pay yachan imaraykuchus ruwasqaykuta, qankunapis yachallaychejtaj. Sichus Tata Diospa contranta oqharikuyta munaspa, Paymanta t'aqakunaykurayku kay altarta ruwayku chayqa, kunampacha wañurachiwayku. 23 Sichus kay altarta ruwayku Tata Diosta wasanchaspa, Paymantataj t'aqakunaykurayku chayqa, chayrí uywa wañuchisqa q'olachinata, ch'aki mikhuymanta jaywanata, chayrí allinyakuy jaywanata kaypi jaywanaykurayku chayqa, kikin Tata Dios cuentata mañawachuyku. 24 Noqaykoqa kayta ruwayku, yuyaspa, mayk'ajpis wawaykichejkuna wawaykukunaman ama kay jinata ninankupaj: “Qankuna, israelitakunajpa Diosninkuwan, ima ruwanaykichej tiyanri? 25 Rubén aylluta, Gad aylluta noqaykumanta t'aqanampaj Tata Diosqa Jordán mayuta mojonta jina churarqa. Chayrayku qankunaqa Dioswan mana imatapis ruwanaykichej kanchu, nispa. Wawaykichejkunata ajinata nejta nispa uyarispa, wawaykukunaqa Diosta yupaychanata qonqapunkuman. 26 Chayrayku uj altarta ruwayta yuyarqayku, mana ima jaywanata chaypi jaywanaykupajchu, nitaj uywa wañuchisqata q'olachinaykupajchu. 27 Manachayqa, qankunapaj noqaykupajpis, wawaykichejkunapaj chanta wawaykukunapajpis uj yuyarikuna jina kanampaj, noqaykoqa Tata Diosninchejta yupaychasqaykuta, uywa wañuchisqa q'olachinata, jucharayku jaywanata, jinallataj allinyakuy jaywanata jaywasqaykuta. Ajinaqa qhepanejman wawaykichejkuna mana wawaykukunata nenqankuchu: Qankunaqa Tata Dioswan mana ima ruwanaykichej tiyanchu, nispa. 28 Yuyarqayku, sichus chaymanta noqaykuta chayrí wawaykukunatapis imatapis niwaykuman chayqa, noqayku kutichiyta atiykuman: “Qhawaychej, ñawpa tataykukuna kay altarta Tata Diospaj ruwasqanku, mana uywa ñak'asqa q'olachinata, nitaj jucharayku jaywanata chaypi q'olachinankupajchu, manachayqa qankunapaj noqaykupajwan uj yuyarikuna jina kanampaj.” nispa. 29 Noqaykoqa mana jayk'ajpis Tata Diospa contrampi oqharikuykumanchu, nitaj qonqakuykumanchu, uywa ñak'asqata q'olachinapaj, ch'aki mikhuy jaywanata jaywanapaj, chayrí jucharayku jaywanata q'olachinapaj waj altarta ruwaspaqa. Diosninchejpa altarnin Dioswan Tinkukuna Toldoj ñawpaqempi kashajtinñaqa, mana waj altarta ruwaykumanchu, nispa. 30 Chantá, Finees sacerdotewan, israelitakunajpa kurajninkukunawan, wasi ayllukunamanta kurajkunapiwan ima, Rubén aylloj parlasqanta, Gad aylloj parlasqanta, Manasés khuskan ayllojpa nisqantawan uyarispa, repararqanku allillan kasqanta. 31 Sacerdote Eleazarpa churin Fineestaj paykunata nerqa: –Kunanqa allinta yachayku Tata Diosqa noqanchejwan kashasqanta, imaraykuchus qankunaqa mana Tata Diospa contrantachu imatapis ruwayta munasqatkichejta; ajinaqa Tata Dios jasut'inawanchismanta qhespichiwayku, nispa. 32 Chaymantá sacerdote Eleazarpa churin Finees, paywan rejkuna ima Galaad cheqamanta Canaanman kutiporqanku, maypichus israelitakuna kasharqanku, chayman. Chanta paykunaman imatachus kutichisqankuta willarqanku. 33 Chay ayllukunaj imatachus nisqankoqa israelitakunaman allillan rijch'arqa chanta Diosta yupaycharqanku. Chaymantapacha Rubén aylloj jap'iyninta, jinataj Gad ayllojpa jap'iyninta maqanakuspa chinkachimuyta, manaña parlarqankuchu. 34 Rubén ayllumanta kajkuna, Gad ayllumantawan kajkuna altarta suticharqanku «Yuyarikuna,» nispa. Nerqankutaj: «Kay altarqa uj yuyarikuna jina kanqa, noqanchej ukhupi Señorqa Diospuni kasqanmanta,» nispa.
