1 Israelitakuna jallp'ata jap'iyta tukuspaña, tukuyninku Siló llajtapi tantakorqanku, chaypi Dioswan Tinkukuna Toldota sayarichinankupaj. 2 Chaywampis israelitakunamanta qanchis ayllukuna manaraj jallp'ata jap'isqankurajchu. 3 Chanta Josue israelitakunaman nerqa: «Imata suyashankichej ñawpa tataykichejkunajpa Tata Diosnin jallp'ata qosusqaykichejta mana usqhayta jap'inaykichejpajri? 4 Sapa ayllumanta kinsa qharikunata ajllaychej, chay jallp'ata qhawamojta kachanaypaj, chanta kutimuspa imaynatachus jallp'ata rak'inakunankuta willanawankupaj. 5 Jallp'ata qhawamoj rejkunaqa jallp'ata qanchisman t'aqanqanku; uranejpi Judajpa jap'iyninta saqenqanku, wichaynejpitaj Josejpa ayllumpa jap'iyninta saqellanqankutaj. 6 Chantá chay jallp'ata qanchisman t'aqaspaña, imaynachus kasqanta willawajtinku, noqa Diosta tapusaj, imaynatachus rak'inayta yachanaypaj. 7 Levitakunarí qankunaj chawpiykichejpi mana jallp'anku kanqachu, imaraykuchus paykunaj chayaqenkoqa Diospa sacerdotenkuna kana. Chantá Gad aylluwan, Rubén aylluwan, Manasés khuskan aylluwanqa Jordán mayoj chimpampi, inti llojsimuynejpi ñapis jallp'ata jap'inkuña; chaytaqa Tata Diospa kamachin Moisesña qorqa,» nispa. 8 Chantá chay jallp'ata qhawamoj rejkunaqa llojsinankupaj wakichikorqankupacha, Josuetaj paykunata kachashaspa, nerqa: «Kunanqa chay tukuynin jallp'ata qhawamuspa, rak'ispa mojonta churaychej; chaymantataj kutimuspa willawankichej, Silopi Tata Diosta tapurispa rak'inaypaj,» nispa. 9 Chay runakunaqa tukuy chay jap'iynejta muyurimorqanku, qanchisman r'akispataj mojonkunata churarqanku. Chantá sapa rak'isqanku jap'iypi mashkachus llajtakuna kasqantawan qhelqarqanku; chaymantataj Silopi, Josué kasharqa, chayman kutimorqanku. 10 Josuetaj Silopi Tata Diosta tapuspa, sapa aylluman jallp'ata qoraporqa. 11 Benjamín ayllupaj suerteta choqajtinku jap'inanku jallp'aqa, Judajpata, Josejpatawan jap'iyninku chawpipi llojserqa. 12 Chay jallp'aj mojonnenqa wichaynejman Jordán mayumantapacha karqa, chaymanta Jericoj wichaynejninta rerqa; chaytaj orqorara cheqanejta inti yaykuynejman wicharillarqapuni, chaymantataj Bet-avén ch'in pampanejman rerqa. 13 Chaymanta mojonqa Betel llajtaj urannejnejta rerqa, chaymantataj Atarot-adarman jurayk'orqa, Bet-horonpa ura chimpampi orqo kashan chaynejta. 14 Chaymanta mojonqa inti chinkaykuynejta muyurimorqa, uraynejpi Bet-horón nisqa chimpampi kashan, chay orqoj ñawpaqenta. Chaymantataj Quiriat-baalninta llojsimorqa, chay llajtaj ujnin sutin Quiriat-jearim karqa. Chay llajtaqa Judá ayllojta karqa. Chantapis chayqa inti chinkaykuynejpiña karqa. 15 Uranejman mojonqa Quiriat-jearimpi qallarerqa, inti yaykuynej cheqamanta Neftóah yaku juturinkama rerqa. 16 Chaymantataj mojonqa Ben-hinom Vallej chimpampi kaj orqoj tukukuyninnejta jurayk'orqa; chayqa Refaim Vallej patannejpi kashan. Chaymantataj Hinom Valleman jurayk'orqa, chaymantataj Jebús wichaypa urannejman, chaynejmantataj En-rogel yaku juturikama rillarqapuni. 17 Chaymantaqa wichaynejta kutirerqa, En-semesmantaj llojserqa, Chaymantataj Guelilotman rerqa; chayqa Adumín wichaypa chimpampi kashan. Chaymanta Rubenpa churin Bohanpa qaqankama jurayk'orqa. 18 Chaymantataj Jordán mayoj chimpan pata wichaynejta rerqa, chaymantataj Jordán mayukama jurayk'orqa. 19 Chaymantataj mojonnenqa Bet-hoglaj patanejman rerqa, chaymantataj K'ara Qochaj patanej q'enqopi tukukorqa, maynejpichus Jordán mayu K'ara Qochawan tinkun, chaypi. Uranejman mojonqa chay karqa. 20 Inti llojsimuynejman mojonnenqa Jordán mayu karqa. Chaymin Benjamín aylloj jap'iynimpa mojonnin karqa. 21 Benjamín aylluman chayasqan llajtakunaqa kaykuna karqanku: Jericó, Bet-hoglá, Émec-quesís, 22 Bet-arabá, Semaraim, Betel, 23 Avim, Pará, Ofrá, 24 Quefar-haamoní, Ofní, Gueba ima. Tukuynimpi chunka iskayniyoj llajtakuna karqa chanta juch'uy llajtakunantin ima. 25 Chantá kallarqataj: Gabaón, Ramá, Beerot, 26 Mispá, Quefirá, Mosá, 27 Réquem, Irpeel, Taralá, 28 Selá, Élef, Jebús, chayqa Jerusalén karqa, chanta kallarqataj Gabaa, Quiriat ima. Tukuynimpi chunka tawayoj llajtakuna chanta juch'uy llajtakunantin karqa. Chaymin Benjamin aylluman rikuchipusqan jap'iynin karqa.
