JOSUÉ 17

1Josejpa kuraj kaj wawan Manasés ayllupajñataj suerteta choqarqanku. Manasespa kuraj kaj wawanqa Maquir karqa, sumajta maqanakoj runa karqa, paytaj Galaadpa tatan karqa, paypajtaj Galaad jap'iy, Basan suyuwan karqa. 2Chaymanta Manasespa wakin churinkunapajñataj suerteta choqarqanku, mashkhachus kasqankuman jina, chaytaj kay jina karqa: Abiezerpa churinkunapaj, Helecpa, Asrielpa, Sichempa, Heferpa, chanta Semidaj churinkunapaj ima. Chaykuna Manasespa churinkunan chanta Josejpa allchhinkunan karqanku. 3Zelofehadqa karqa Heferpa churin, Galaadpa allchhin, Galaadtaj karqa Maquirpa churin Manasespa allchhin. Paypata mana qhari wawankuna karqachu, manchayqa warmi wawakunalla, sutinkutaj karqa Maala, Noa, Hogla, Milca, Tirsa ima. 4Paykuna Eleazar sacerdoteman, Nunpa churin Josueman chanta kurajkunamanwan rispa, nerqanku: “Tata Diosqa Moisesman kamacherqa aylluykuwan khuska noqaykuman jallp'ata qonawaykuta,” nispa. Josuetaj Tata Diospa nisqanman jina tatankoj ayllumpa ukhupi paykunaman jallp'ata qoporqa. 5Ajinata Manasés aylloqa chunka suyutawan jap'erqa, chantá Jordán mayoj inti llojsimuynej chimpapi Galaad jap'iyta, Basan suyuta ima, jap'illarqataj. 6Manasespa ususinkunanqa qharikunawan khuska jallp'ata jap'erqanku. Galaad jap'iypi jallp'aqa Manasespa wakin churinkunampaj karqa. 7Manases aylloj jallp'anqa Aser aylloj jap'iyninmanta Micmetatkama karqa, chaytaj Siquem nisqa chimpampi karqa. Uraynejmantaj jap'iynenqa Tapuapi tiyakojkunaj jap'iyninkukama karqa. 8Tapúah jap'iyqa Manasespata karqa, Tapúah llajtatajrí Manases aylloj jap'iynimpa mojón qayllapi kasqanrayku, Efraín ayllojta karqa. 9Chay mojonqa uraynejman Caná wayq'okama karqa. Efraínpa llajtakunanqa, Manasespa llajtakunanwan khuskallataj karqa. Manasespa mojonnenqa Caná wayq'oj wichaynejnejta Jatun Qochakama llojsishan, chaynintin karqa. 10Efrain ayllojtaqa wayq'omanta uraynejman karqa, Manasespatataj wayq'omanta wichaynejman, mojonninkutaj Jatun Qocha karqa. Wichaynejmanqa Aser aylloj jap'iyninwan tinkorqa, inti llojsimuynejmantaj Isacarpa jap'iyninwan tinkorqa. 11Isacarpa jap'iynin ukhupi chantá Aser aylloj jap'iynin ukhupi ima, Manases ayllojta llajtakuna, chanta juch'uy llajtakuna ima kallarqataj. Kaykuna karqanku: Bet-sean, Ibleam, Dor, Endor, Taanac chanta Meguido ima. Kinsa kaj llajtaqa Nafot karqa. 12Chaywampis Manasés ayllumanta kajkunaqa chaypi tiyakojkunata mana wijch'uyta aterqankuchu, imaraykuchus cananeokunaqa mana llojsiyta munarqankuchu. 13Aswan qhepamantaj israelitakunaqa kallpachakuspa cananeokunata sinchi ruwanaman churarqanku; chaywampis manapuni chay jallp'amanta paykunata wijch'uyta aterqankuchu. 14Josej ayllumanta kajkunaqa Josueman nerqanku: –¿Imajtintaj suerteta choqaspa jallp'ata uj cheqallapi qowaykurí, noqayku Tata Diospa bendicionninwan may chhika kashajtiykuri? nispa. 15Josuetaj kuticherqa: –Sichus qankuna ashkha kankichej, jallp'aykichejtaj pisi chayqa, ferezeokunajpa jap'iyninkuman chanta refaitakunajpa jap'iyninkuman yaykuspa monteta chaqomuychej, nispa. 16Paykunatajrí nerqanku: –Arí, Efrain jap'iypi orqorara cheqaqa cheqamanta mana tukuyniykupaj wakinchu. Chaywampis pampakunapi tiyakoj cananeokunaqa fierromanta carretakunayoj kanku, 17Josuetaj Josejpa mirayninmanta kajkunaman, Efraín aylluman, Manasés ayllumanwan nerqa: –Qankunaqa cheqamanta ashkha kankichej, kallpayojkunataj, chaynejta qankunapajqa mana uj chhika jallp'allachu kanan tiyan. 18Chay sach'arara orqokunantin qankunajta kanan tiyan. Chay monteta chaqospa, jallp'ata jap'ikapuychej. Chaypi tiyakoj cananeokunataqa qankuna wijch'unkichej; mana imananchu fierro carretakunayoj kasqankoqa, nitaj may jina kallpayoj kasqankupis, nispa.

will be added

X\