JOSUÉ 14

1Eleazar sacerdotewan, Nunpa churin Josué chanta israelitakunajpa kurajninkukuna ima, israelitakunaman Canaán suyoj jap'iyninta qorqanku. 2Jisq'on ayllukuna chantá Manaséspa khuskan ayllu ima, chay jallp'akunata sorteaspa rak'inakorqanku, Tata Dios Moisesman kamachisqanman jina. 3Imaraykuchus Moisesqa manaraj Jordán mayuta chimpashaspa, Ruben aylluman, Gad aylluman chanta Manasés khuskan ayllumanwan jallp'ata qosqaña. Levi ayllumanrí manapuni jallp'ata qorqachu. 4Josejpa churinkunaj mirayninmanta iskay ayllu karqanku, Manaseswan, Efraínwan. Leví ayllumanrí mana uj chhikan jallp'allapis chayarqachu; paykunamanqa tiyakunankupaj llajtakunata, uywa michinantinta ima qorqa. 5Ajinata israelitakunaqa Tata Dios Moisesman kamachisqanman jina, jallp'ata rak'inakorqanku. 6Judá ayllumanta kajkunaqa Josuewan parlaj Guilgalman rerqanku, chanta Cenazpa mirayninmanta Jefunej wawan Caleb Josueta nerqa: “Cades-barneapi qanmanta noqamantawan Tata Diosqa kamachin Moisesman imatachus nisqanta qan allinta yachanki. 7Tawa chunka watayoj kashajtiy Moisesqa Cades-barneamanta jallp'ata qhawamojta kachawarqa. Kutimuspataj, noqaqa imatachus rikusqayta maychus kajta willarqani. 8Noqawan rejkunarí mana cheqanta willaspa israelitakunataj sonqonkuta iskayrayacherqanku. Noqarí Tata Diosniy imatachus nisqanta junt'arqani. 9Chaypacha Moisesqa juraspa niwarqa: “Maynejmanchá chakiykita churanki, chay jallp'a wiñaypaj qampata chanta wawaykikunajpatawan kanqa, Tata Diosniypa nisqanta junt'asqaykirayku, nispa. 10Tata Dios ajinata Moisesman nisqanqa tawa chunka phisqayoj wataña kashan. Chayta nerqa israelitakuna ch'innejllataraj jamushajtinku, nisqanman jinataj Diosqa kunankama kawsachiwan. Qhaway, kunanqa ñapis pusaj chunka phishqayoj watayojña kashani. 11Kallpaypiraj kani, maypachachus Moisés jallp'ata qhawajta kachawarqa, chaypacha jina. Ñawpajta jina maqanakuyta atiniraj, jinallataj maymampis riyta. 12Chayrayku qoway ari, orqorara jallp'ata Tata Dios qonawanta nerqa, chayta. Qan yachanki chaynejpi jatun karay runa Anacpa wawankunan sumaj phatu perqawan muyuykusqa llajtakunapi tiyakusqankuta, chaywampis noqaqa Diospa yanapawasqanwan, chay runakunata wijch'usaj, Tata Diospa nisqanman jina,” nispa. 13Chantá Josueqa Jefonej churin Calebta bendicerqa, chanta paypata, jinataj wawankunajtawan kanampaj Hebrón cheqanejta qoporqa. 14Ajinamanta Hebrón cheqanejqa kunankama Calebpata chanta wawankunajpata jap'iynin kashan, Israelpa Tata Diosninta kasusqanrayku. 15Hebronpa ñawpaj sutenqa Quiriat-arbá karqa, imaraykuchus Arbaqa, jatun karay runa Anacpa mirayninmanta karqa. Chaymanta qhepamanqa chay cheqanejpi manaña ni ima maqanaku karqachu.

will be added

X\