1 Josué machituña kashajtin, Tata Diosqa payta nerqa: “Qanqa ancha machuña kashanki; chaywampis jallp'a jap'inaqa ashkharaj kashan. 2 Jap'inaraj kashan chay jallp'aqa, kaykuna kanku: Filisteokunajpata 3 Sihor wayq'omantapacha, Egiptomanta inti llojsimuyninnejpi, Ecronwan mojonkama. Chayqa cananeokunajpa jallp'anku kashan. Cananeokunajpa jap'iynimpi phishqa jatun kamachejkuna kanku, paykunaqa Gazapi, Asdodpi, Ascalompi, Gatpi, Ecronpi ima tiyakunku. Jinallataj Heveokunaj jallp'anku jap'inaraj kashallantaj. 4 Uraynejmantaj kashan tukuy cananeokunajpa jap'iyninku, sidoniokunajpa llajtanku Megaramantapacha Afeckama, amorreokunajpa jap'iyninkoj mojonkama. 5 Guiblitakunajpa 6 Israelitakuna yaykusqankuman jina Noqaqa orqorara cheqanejpi, Libanomanta Misrefot-maimkama tiyakoj sidoniokunata wijch'usaj. Qantaj chay jallp'ata israelitakunaman chayaqenkupaj rak'irapunki, imaynatachus kamachishayki, chayman jina. 7 Chay jallp'ataqa jisq'on aylluman, chantá Manasés khuskan ayllumanwan qopunki,” nispa. 8 Rubén aylluwan, Gad aylluwan, chantá Manasés khuskan aylluwanqa Jordán Mayu chimpapi, inti llojsimuynejpi, jallp'ata jap'inkuña, imaraychus Moises chayaqenkupaj rikuchiporqaña. 9 Jap'iyninkoj tinkuynenqa karqa: Arnón mayu kantupi Aroermantapacha, Dibonkama; valle chawpipi llajtantin, Medebá tukuy pampannintin ima. 10 Jinallataj amorreokunajpa jatun kamachejninku Sihonpa tukuy llajtantinta, amonitakunaj jap'iyninku tinkuykama jap'erqanku; Sihonqa Hesbonpi kamacherqa. 11 Paykunallapajtaj Galaad jap'iy karqa, gesureokunajpa jap'iyninku, maacateokunaj jap'iyninku ima, jinallataj Hermón Orqo, tukuy Basán jap'iynin Salcakama karqa. 12 Chantá jap'ikapullarqankutaj Basanmanta Og jatun kamachejpa jap'iyninta. Payqa Astarotpi, Edreipi ima kamacherqa; payqa refaitakunamanta qhepa kaj karqa. Paykunatamin Moisesqa atipaspa chinkachisqa. 13 Guesureokunawan, maacateokunawanqa mana chaynejmanta wijch'usqachu karqanku, manachayqa paykunaqa Isarael suyupi kunankama tiyakushankuraj. 14 Leví ayllumanrí Moisesqa jallp'ata mana qorqachu. Paykunaqa israelitakuna Tata Diosman jaywanata apamusqankumanta kawsananku karqa, Tata Diospa kamachisqanman jina. 15 Moisesqa Rubén aylluman, mashkhachus kasqankuman jina jallp'ata qorqa. 16 Jallp'a jap'isqankoqa Arnón Wayq'o kantupi Aroermantapacha, valle chawpipi llajtantin, Medebá tukuy pampanintinkama karqa. 17 Chaymanta Hesbón, pampakunapi kaj tukuy llajtakunanintin karqa: Dibón, Bamot-baal, Bet-baal-megón, 18 Jahas, Cademot, Mefáat, 19 Quiriataim, Sibmá, vallepi kaj moqopi Zaret-sahar, 20 Bet-peor, Pisga kinraykuna, Bet-jesimot, 21 pampa tukuy llajtakuna ima karqa. Chayqa amorreokunajpa jatun kamachejninku Sehonpa tukuy jap'iynin karqa, pichus Hesbonpi kamacherqa, chaypata. Moisesqa Sihónta chanta payta yanapajkuna Madianmanta kurajkunata atipallasqataj: Evita, Réquemta, Surta, Hurta, Rebata ima. 22 Jinallataj israelitakunaqa Beorpa wawan watuj Balaamtapis wañuchillarqankutaj. 23 Rubén aylloj jap'iynenqa, mashkhachus kasqankuman jina jap'isqanku jallp'a karqa, llajtakunayoj, juch'uy llajtitakunayoj jallp'a, chay jap'iyninkutaj Jordán Mayu tinkuykama chayarqa. 24 Gad ayllumampis Moisesqa jallp'ata qollarqataj, mashkhachus kasqankuman jina. 25 Paykunamantaj chayarqa Galaad jap'iymanta kaj tukuy llajtakuna chanta Jazerpa jap'iynin ima, chanta amonitakunajpa khuskan jap'iyninku ima, chaytaj karqa Rabá chimpampi Aroer llajtakama. 26 Jap'iyninku kallarqataj Hesbonmanta, Ramat-mispekama, chantá Betonim, Mahanaimanta Debirwan tinkuykama. 27 Vallenejpitaj Bet-aram, Bet-nimra, Sucot, Safón ima paykunaman chayarqa. Chay jallp'aqa Hesbónpi Sihón jatun kamachejmanta puchoj karqa. Ajinaqa jap'iyninkoqa Jordán Mayoj inti llojsimuynejmanta, Galilea Qochaj uran kantunkama karqa. 28 Chaymin Gad ayllupaj, mashkhachus kasqankuman jina jallp'anku karqa. Chay jallp'aqa jatuchaj llajtayoj, juch'uy llajtayoj ima karqa. 29 Chaymantá Moisesqa Manasés khuskan aylluman, mashkhachus kasqankuman jina jallp'ata qopullarqataj. 30 Paykunaj jallp'ankoqa Mahanaimmantapacha, tukuy Basánpa jap'iyninkama karqa, chay niyta munan Basanmanta jatun kamachej Ogpa kamachisqan jap'iy chanta Jairpa jap'iynin ima; tukuynimpi sojta chunka llajtakuna karqanku. 31 Kay khuskan aylluman, pikunachus Manaséspa wawan Maquirpa mirayninmanta karqanku, chaykunaman Moises Galaad jap'iypa khuskanninta qorqa, chaytawan khuska Astarot llajtata chanta Edrei llajtatawan qollarqataj. Kay llajtakunapi Og sutiyoj jatun kamachej kamachisqa. 32 Ajinata Moisesqa Jericomanta inti llojsimuynejpi Jordan mayu chimpapi, Moabpa jap'iyninta paykunaman qorqa. 33 Leví ayllumanrí Moisesqa mana jallp'ataqa qorqachu, imaraykuchus paykunaj chayaqenkoqa Israelpa Tata Diosnin karqa, Tata Diospa nisqanman jina.
