JOSUÉ 12

1Israelitakunaqa Jordán mayoj inti llojsimuynejpi kay jatun kamachejkunata atiparqanku. Jap'isqanku jallp'ataj Arnón Mayumanta Hermón Orqokama, Jordán mayoj inti llojsimuynejpi vallenkunantin karqa. 2Amorreokunajpa jatun kamachejninkumanta ujnin Sihón karqa, payqa Hesbonpi tiyakorqa. Payqa Galaadpa khuskanninkama kamacherqa; jap'iynintaj karqa patanejman Jaboc mayumantapacha, uraynejman Arnón mayukama. Inti llojsimuynejman jinataj Aroer llajtakama jap'iynin karqa. Inti yaykuynejman jinataj jap'iynenqa, Arnón vallej khuskanninmantapacha K'ara Qochakama karqa. 3Inti yaykuynejman mojonenqa Jordan Mayu karqa, patanejmantaj Galilea Qochakama karqa, uranejmantaj K'ara Qochakama karqa. Jinallataj jap'iynenqa K'ara Qochamanta inti llojsimuynejman jina Bet-jesimot llajtakama chanta Pisgá orqokama karqa. 4Moisespa chanta israelitakunajpa atipasqanku ujnin kaj kamachejtaj, Basanmanta jatun kamachej Og karqa, payqa Refaitakunamanta qhepa qhepa kaj karqa. Kamachej Ogqa Astarotpi chanta Edrei sutiyoj llajtakunapi kamacherqa. 5Jap'iynin karqa patanejman Hermón Orqokama, inti llojsimuynejmantaj Salcá llajtakama, inti yaykuynejmantaj tukuy Basámpa jap'iynin, Guesurpa jap'iyninwan chanta Maacaj jap'iyninwan tinkuykama. Chay jawa kamachillarqataj Galaadmanta patanejman, Hesbonpi jatun kamachej Sihónpa jap'iyninkama. 6Chay jatun kamachejkunata Tata Diospa kamachin Moiseswan, israelitkunawan atiparqanku. Moisestaj chay jap'isqanku jallp'ata Rubén aylluman, Gad aylluman, Manasés khuskan ayllumanwan rak'irarqa. 7Josuewan, israelitakunawan Jordán Mayu inti yaykuynejpi jatun kamachejkunata atiparqanku, Líbanoj Vallempi Baal-gadmantapacha, Edommanta uranejman Halac Orqokama. Josueqa chay jallp'ata israelitakunaman wiñaypaj paykunajta kanampaj rak'irarqa, mashkha aylluchus kasqankuman jina. 8Chay rak'isqan jallp'a karqa: Orqorara cheqanejpi jallp'a, Jordán mayunejpi valle, inti yaykuynejman orqorara jallp'a, uranejmantaj ch'in pampanejpi jallp'a. Chaynejpi ñawpajta heteokuna, amorreokuna, cananeokuna, ferezeokuna, heveokuna, jebuseokuna ima tiyakusqanku. 9Israelitakuna kay llajtakunaj jatun kamachejninkuta atiparqanku: Jericomanta, Aimanta, chayqa Betel qayllallapi karqa; 10Jerusalenmanta, Hebronmanta; 11Jarmutmanta, Laquismanta; 12Eglonmanta, Guezermanta; 13Debirmanta, Guedermanta; 14Hormamanta, Aradmanta; 15Libnamanta, Adulammanta; 16Maquedamanta, Betelmanta; 17Tapuahmanta, Hefermanta; 18Afecmanta, Saronmanta; 19Madonmanta, Hazormanta; 20Simrón-meronmanta, Acsafmanta; 21Taanacmanta, Meguidomanta; 22Cedesmanta, Carmelo orqopi Jocneammanta; 23Dormanta, Guilgalpi Goimmanta, 24chanta Tirsamanta ima. Tukuynimpi atipasqanku jatun kamachejkunaqa kinsa chunka ujniyoj karqanku.

will be added

X\