JOSUÉ 11

1Hazormanta jatun kamachej Jabín chayta yachaspa, Madonmanta jatun kamachej Jobabman, jinallataj Simronmanta jatun kamachejman, Acsafmanta jatun kamachejman ima, uj tratota ruwanankupaj willachimorqa. 2Chantá willachimullarqataj, wichaynej orqorara cheqanejpi jatun kamachejkunaman, Cineret Qocha uraynej Arabapi kajkunaman, Ura pampapi kajkunaman, Dormanta inti yaykuynejpi tiyakojkunaman, 3inti llojsimuynejpi tiyaj cananeokunaman, inti yaykuynejpi kajkunaman, amorreokunaman, heteokunaman, ferezeokunaman, orqo kinraykunapi tiyakoj jebuseokunaman, Mizpa jap'iypi Hermón Orqo k'uchupi tiyakoj heveokunaman ima, tantakuspa uj tratota ruwanankupaj. 4Tukuy chay jatun kamachejkunaqa mama qochapi t'iyu jina, may chhika soldadokunawan, may chhika caballokunawan, carretakunawan ima llojsimorqanku. 5Chanta chay jatun kamachejkuna tantaykukuspa, israelitakunawan maqanakunankupaj Merom mayu chimpapi jarakorqanku. 6Tata Diostaj Josueta nerqa: Ama paykunata manchachikuychu. Noqaqa q'aya kunanta jina tukuyninkuta wañusqata qankunaman rikhurichisqaykichej. Qantaj caballonkunaj chaki ankunkuta khuchuspa p'itiranki, carretankutataj ninawan kanaykunki, nispa. 7Chaymantá Josueqa tukuy soldadonkunanwan khuska, Merom mayu chimpapi kashajtinku kaymanta jinalla paykunawan maqanakoj yaykuykorqanku. 8Tata Diostaj paykunata israelitakunawan atipaykucherqa, israelitakunataj paykunata wañuracherqanku, wakintataj Sidón jatun llajtakama qhatiykorqanku, chaymanta Misrefot-maimkama, inti llojsimuynejpi Mizpa pampakama, tukuyninkuta tukuchinankukama wañucherqanku. 9Chanta Josueqa Tata Diospa kamachisqanta kasuspa, caballokunajpa chaki ankunkuta khuchuspa p'itirarqa, jinallataj carretakunatapis ninawan kanaykorqa. 10Chaymanta kutimuspataj, Hazor llajtata jap'erqanku, maypichus chay jatun kamachejkuna tratota ruwasqanku, chayta; Jabin sutiyoj jatun kamachejtapis chaypi wañucherqanku. 11Hazor llajtapi tiyakojkunata ni uj puchuyojta wañuracherqanku, llajtapi kaj chhikata phirispa. Jinaytawantaj, Hazor llajtata ruphaykucherqanku. 12Ajinata Josueqa chay tukuynejmanta tantakamoj jatun kamachejkunaj llajtankuta jap'erqa, jinallatataj jatun kamachejkunatapis wañuracherqa. Tukuy imankutataj phirerqanku, Tata Diospa kamachin Moisés kamachisqanman jina. 13Chaywampis israelitakunaqa orqokunapi kaj llajtakunata mana ruphacherqankuchu; Josueqa Hazor llajtallata ninawan kanaykorqa. 14Israelitakunaqa chay llajtakunapi tiyakojkunata tukuyninta mana uj puchuyojta wañuracherqanku; imankuchus kajta, jinataj uywankunatawan jap'ikaporqanku. 15Imaynatachus Tata Diosqa kamachin Moisesman nerqa, kikillantataj Moisesqa Josueman kamacherqa. Chanta Josueqa mana pantaspa kikinta ruwarqa. 16Jinamanta Josueqa tukuy chay cheqanejta jap'erqa: Orqorara, tukuy Néguev jap'iyta, tukuy Gosén jap'iyta, pampapi jallp'akunata, Jordán valleta, tukuy Israel orqorara cheqakunata, chay pampa jallp'akunata ima. 17Josue atipaspa jap'isqanqa karqa Halac Orqomantapacha, Seirman wicharejmanta, Líbano pampapi Baal-gadkama, Hermón Orqo k'uchupi. Josueqa chay llajtakunamanta jatun kamachejkunata jap'ispa, wañuracherqa. 18Josueqa chay cheqankunamanta kamachejkunawan unayta maqanakorqa. 19Chay cheqakunamanta kajkunaqa israelitakunawan ni mayqen uj tratota ruwarqankuchu. Gabaonpi tiyakoj heveokunalla tratota ruwarqanku. Wakin llajtakunatataj maqanakuspa jap'erqanku. 20Tata Diospuni chay llajtayojkunaj sonqonkuta rumiyacherqa, israelitakunawan maqanakoj sayaykunankupaj, ajinata Dios ruwarqa israelitakuna mana khuyakuspa tukuyninta wañuchinankupaj, Tata Dios Moisesman kamachisqanman jina. 21Chaypachallataj Josueqa, Hebrón Orqopi tiyakoj anaquitakunaj tukuy llajtankunanta phiriykorqa, Debir llajtata, Anab llajtata, Juda jap'iypi orqorara cheqanejpi tiyakojkunata, Israelpi orqorara cheqanejpi kajkunata ima. 22Ajinamanta Israel suyupi jatun karay runaj Anac sutiyoj ayllunmanta ni uj qhepakorqachu. Wakin anaquitakuna Gazapi, Gatpi, Asdodpi imalla qhepakorqanku. 23Ajinata Josueqa Tata Dios Moisesman kamachisqanman jina, chay tukuy jallp'ata jap'erqa. Chaymantataj israelitakunaman, mashkha aylluchus kasqankuman jina paykunajta kanampaj rak'irarqa. Chay qhepata manaña maqanaku, ni ima ch'ajwapis karqachu.

will be added

X\