JOSUÉ 10

1Jerusalenta 2Chayrayku maytapuni manchachikorqa, imaraykuchus Gabaón llajtaqa jatun llajta karqa, Ai llajtamantapis astawan jatun; chaypi tiyakojkunaqa manchay kallpasapa runakuna karqanku. 3Chayrayku Jerusalenmanta jatun kamachej Adonisedecqa willarachimorqa Hebronta kamachej Hohanman, Jarmut llajtata kamachej Piramman, Laquis llajtata kamachej Jafiaman, Eglonta kamachej Debirman ima, kay jinata nispa: 4“Jamuychej, Gabaonpa contrampi maqanakuyta yanapawaychej, imaraykuchus paykunaqa Josuewan, israelitakunawan ima uj tratota ruwaykusqanku,” nispa. 5Ajinamanta phishqantin amorreo jatun kamachejkuna tantaykukorqanku Jerusalenmanta, Hebronmanta, Jarmutmanta, Laquismanta, Eglonmanta ima. Chantá paykunaqa tukuy soldadonkunawan tantaykukuspa, Gabaón llajtata muyuykuspa maqanakoj phinkiykorqanku. 6Chantá Gabaón llajtayojkunaqa Josueman willachimorqanku, Guilgalpi israelitakuna kasharqanku, chayman: «Ama kamachiykikunataqa sapaykuta saqerpariwaykuchu. Usqhayllata jamuychej jark'akunawaykupaj, yanapanawaykupajtaj, imaraykuchus tukuy amorreokunajpa kamachejninku tantaykukuspa, noqaykuwan maqanakoj jamuykunku,» nispa. 7Josuetaj tukuy soldadonkunanwan, chanta maqanakunapaj wapu kajkunawan ima, Guilgalmanta rerqa. 8Tata Diostaj Josueman nerqa: “Ama manchachikuychu; Noqa paykunata atipaykuchisqaykichej, nitaj mayqenninkupis qanman sayaykuyta atenqankuchu,” nispa. 9Josueqa Guilgalmanta tukuy tutantin rispa, amorreokuna mana yuyashajtillanku paykunawan maqanakoj sayaykorqa. 10Tata Diostaj amorreokunata maytapuni musphacherqa, Israel soldadokunata rikusqankurayku. Ajinamanta Josueqa soldadonkunanwan khuska Gabaonpi ashkhata wañuracherqa. Chaymantaqa Bet-horonman wicharej ñannejta paykunata qhatiykorqa; chanta Azecakama, Maquedakama amorreokunata wañuchispa rillarqapuni. 11Bet-horón urayta amorreokuna israelitakunamanta ayqekushajtinku, Tata Diosqa paykunaj patankuman runtu chhikachaj jinata chijchita parachimorqa. Chay chijchi para amorreokunata astawan ashkhta wañuracherqa, israelitakuna espadawan wañuchisqankumanta nisqaqa. 12Maypachachus Tata Dios amorreokunata israelitakunawan atipaykucherqa chaypacha, Josueqa israelitakuna rikushajtinku, Tata Dioswan parlarqa, nerqataj: “Inti, Gabaonpi sayay; qampis killa, Aialón Vallepi sayallaytaj,” nispa. 13Intiwan, killawantaj sayarqanku, israelitakuna enemigonkuta tukuchinankukama. Kayqa Cheqan Runaj qhelqasqan qhelqapi kashan. Inteqa uj p'unchayta jina, chawpi p'unchaypi sayarqa. 14Chay jina jatun p'unchayqa mana jayk'ajpis karqachu, ni qhepamampis kanqachu, imaraykuchus Tata Diosqa uj runaj mañakusqanta uyarerqa. Ajinata ruwarqa, imajtinchus Tata Diosqa chaypacha israelitakunaman kutikuspa, maqanakorqa. 15Chay qhepata Josueqa, tukuy israelitakuna ima, Guilgalpi jarankuman kutiporqanku. 16Chay phishqa amorreo kamachejkunataj ayqekuspa, Maquedapi chhanka jusk'uman pakaykukorqanku. 17Jinapi Josueman willarqanku chay phishqa jatun kamachejkuna Maqueda chhanka jusk'upi pakashasqankuta. 18Chantá Josue kamacherqa: «Jatuchaj rumita tanqaykuspa, chay chhanka jusk'uta wisq'aykuychej, punkumantaj qhawajkunata churaychej. 19Qankunatajrí ama chayllapi kaychejchu; enemigoykichejta qhatiykuychej, qhepapi kaj soldadokunatataj wañurachiychej. Ama saqeychejchu llajtankuman kutejta, imaraykuchus Tata Diosniykichej makiykichejman paykunata jaywaykusunkichej,» nispa. 20Josuewan, israelitakunawanqa amorreokunata yaqha tukuyninkuta wañuracherqanku. Wakin qhepakoj amorreokunaqa sumaj perqawan muyurisqa llajtakunaman pakaykukorqanku. 21Israelitakunatajrí Maquedapi jarankuman, maypichus Josué kasharqa chayman, tukuyninku walejpacha kutimporqanku. Chaymantaqa ni pi, ni mayqen israelitakunajpa contranta parlarej karqachu. 22Chantá Josue nerqa: “Jusk'uta kicharispa, chay phishqa jatun kamachejkunata orqhomuychej,” nispa. 23Ajinata israelitakunaqa chay phishqa jatun kamachejkunata chhanka jusk'umanta orqhomorqanku. Chay jatun kamachejkuna karqanku Jerusalenmanta, Hebronmanta, Jarmutmanta, Laquismanta, Eglonmanta ima. 24Josueman pusamojtinkutaj, Josueqa israelitakunamanta tukuy qharikunata wajyarqa, jinataj soldadokunata kamachejkunaman nerqa: «Qayllamuychej, kay jatun kamachejkunajpa kunkankuman chakiykichejta churaychej,» nispa. Paykunataj qayllaykuytawan jatun kamachejkunaj kunkankuman chakinkuta churarqanku. 25Chanta Josue nillarqataj: «Ama manchariychejchu, nitaj llawch'iyaychejchu, astawanqa sinch'i, waputaj kaychej, imaraykuchus Tata Diosqa ajinatapuni ruwanqa qankunawan maqanakoj tukuy enemigoykichejta,» nispa. 26Chaymantá Josueqa chay jatun kamachejkunata espadawan wañuracherqa, jinaspataj sapa ujta uj sach'aman warkhuracherqa. Chaypitaj ayankoqa ch'isiyaykunankama warqhurayarqa. 27Inti chinkaykushajtintaj, Josueqa chay warkhusqa ayakunata jurayk'uchichimorqa, chaymantataj kamacherqa, may jusk'upichus pakakorqanku, chayllamantaj wijch'uykamunankuta. Israelitakunataj jusk'uman chay ayakunata wijch'uykamuytawan, punkuta jatuchaj rumiwan sumajta wisq'aykorqanku. Chaytaj kunankama kashan. 28Chay kikin p'unchayllataj Josueqa Maquedá llajtata jap'ispa, llajtayojkunata, chantá jatun kamachejnintapis espadawan wañuracherqa. Ajinata mana uj puchuyojta wañurachispa, ch'impachata chay llajtata saqerparerqa. Maquedá llajtaj jatun kamachejinta ruwarqa, imaynatachus Jericó llajtaj jatun kamachejninta ruwarqa, kikillantataj. 29Chantá Josueqa israelitakunata pusariykukuspa, Libna llajtatañataj muyuykuspa, maqanakorqa. 30Tata Diosqa chay llajtatapis, jatun kamachejnintawan khuska israelitakunawan atipaykuchillarqataj. Chantá paykunaqa chay llajtapi tukuy tiyakojkunata ni ujta saqespa espadawan wañuracherqanku. Libná llajtaj jatun kamachejnintapis, imaynatachus Jericó llajtaj jatun kamachejninta ruwarqa, kikillantataj ruwarqa. 31Chaymantata Josuewan israelitakunawanqa Libná llajtata jap'iytawan Laquis llajtamanñataj rerqanku. Chayman chayaspataj muyuykuytawan maqanakorqankupacha. 32Q'ayantintaj Tata Diosqa Laquis llajtayojkunata israelitakunawan atipaykucherqa. Paykunaqa chay llajtapi tukuy tiyakojkunata wañuracherqanku, imaynatachus Libná llajtapi ruwarqanku, kikinta. 33Guezermanta Horam sutiyoj kamachejñataj Laquis llajtaman kutikuspa, israelitakunawan maqanakoj tukuy soldadonkunanwan jamorqa. Josueqa paytapis, jinata tukuy soldadonkunantawan ima tukuyninta wañucherqa. 34Chantá Josueqa, tukuynin israelitakunawan Laquis llajtamanta Eglón llajtamanñataj rillarqankutaj. Eglón llajtaman chayaspataj, maqanakorqankupacha. 35Chay p'unchaypacha chay llajtata jap'erqanku; chay llajtapi tukuy tiyakojkunata espadawan wañuracherqanku, imaynatachus Laquispi ruwarqanku, jinallatataj. 36Eglón llajtamanta Hebrón llajtamanñataj Josuewan, tukuynin israelitakunawan rispa maqanakullarqankutaj. 37Chay llajtaman yaykuytawan, jatun kamachejninta, jinallataj tukuy kawsajta espadawan wañuracherqanku, jinallataj qayllampi llajtakunapipis, imaynatachus Eglonpi ruwarqanku, kikinta ruwarqanku. 38Chantá Josueqa tukuy israelitakunawan Debir llajtamanñataj kutirimuspa, chay llajtayojkunawan maqanakullarqankutaj. 39Chay llajtaman yaykuytawan, jatun kamachejninta, chay llajtapi tukuy tiyakojkunatawan ni uj puchuyojta wañuracherqanku, jinallataj qayllampi llajtakunapipis wañuracherqanku, imaynatachus ruwarqanku Hebronta, Libnata, jatun kamachejninta ima, ajinata. 40Ajinata Josueqa chay tukuynin llajtakunata jap'erqa, orqo kinraykunapi tiyakoj kamachejkunata wañurachispa, Néguev Orqokunapi, wichay pampakunapi, wichaykunapi tiyakojkunata ima mana uj puchuyojta wañuracherqa, Israelpa Diosnin kamachisqanman jina. 41Chay kamachejkunata wañurachispa, Josueqa Cades-barneamantapacha Gazakama, chantá tukuy Gosén jap'iyta Gabaonkama jap'ikaporqa. 42Ajinata Josueqa ujllapi jallp'ankuta jap'ikaporqa, imaraykuchus Israelpa Tata Diosnin israelitakunaman kutikuspa, paykunarayku maqanakorqa. 43Chaymanta Josueqa tukuy israelitakunawan khuska Guilgalpi jarankuman kutiporqanku.

will be added

X\