JOSUÉ 1

1Diospa kamachin Moisés wañupusqanmanta qhepata, 2“Kamachiy Moisésqa wañupunña. Kunanqa qan tukuynin israelitakunata Jordán Mayuta chimpachinayki tiyan, Noqa qosqaykichej chay jallp'aman rinaykichejpaj. 3Imaynatachus Moisesman nerqani jina, maymanchá chakiykichej saruykonqa, Noqa chay tukuy jallp'ata qankunaman qosqaykichej. 4Jallp'aykichejqa kanqa ch'in pampanejmanpacha Líbano cheqanejkama chanta Éufrates jatun mayukama. Chantá tukuynin hititakunaj jallp'anku Jatun Qochakama qankunajta kanqa 5Kawsanaykikamaqa mana pipis atipasonqachu. Noqaqa qanwan kasaj, imaynatachus Moiseswan karqani, ajinata. Mana jayk'ajpis saqesqaykichu, nitaj wijch'urpasqaykichu. 6Chayrayku kallpachakuy, waputaj kay, qanmin ñawpa tataykichejkunaman qonayta nerqani, chay jallp'ata israelitakunaman qonayki tiyan. 7Sinch'ita kallpachakuy, waputaj kay, kamachiy Moisés kamachisusqanman jina tukuyninta junt'anaykipaj. Chaytaqa junt'aypuni ari, ama ni uj chhikanta karunchakuspa, imatachus nisqanta kikinta ruwaspa, tukuy ima ruwasqaykipi allin risunampaj. 8Diospa kamachiyninmanta qhelqata ñawiriyta amapuni qonqaychu. Tuta p'unchay unanchay, imatachus nisqanta ruwanaykipaj, ajinamanta tukuy ima ruwasqaykipi allin risunampaj. 9Noqa kamachiyki. Sumajta kallpachakuy, waputaj kay. Ama manchachikuychu, nitaj q'ewakuychu. Noqa Tata Diosniyki qanwampuni kasaj, maymanchá rinki, chaypi,” nispa. 10Chantá Josueqa israelitakunaj kurajninkukunata kamacherqa 11“Tukuynin jaraman rispa, kamachiychej qoqawita wakichikunankuta, imaraykuchus kaymanta kinsa p'unchayman Jordán Mayuta chimpasunchej, Tata Diosninchej qowasunchej, chay jallp'ata jap'ikapunanchejpaj,” nispa. 12Chantá Josueqa, Rubén aylluman, Gad aylluman, Manasés khuskan ayllumanwan nillarqataj: –Yuyarikuychej, Tata Diospa kamachin Moisés imatachus nisqasorqachej, chayta. Chaypacha nisorqachej: Tata Diosniykichej qankunaman kay jallp'ata qosunkichej chaypi tiyakunaykichejpaj, nispa. 14Chayrayku warmiykichejta, wawaykichejta, uywaykichejtapis kay jallp'api saqenkichej. Jordan mayu inti llojsimuynejpi Moisés jallp'ata qosorqachej, chaypi. Tukuy qharikuna maqanakupaj jina kajkunataj, armaykichejta oqharikuspa wawqeykichejkunata yanapanaykichejpaj, riychej. 15Ajinata ruwankichej Tata Diosqa paykunamampis qankunaman jina jallp'ata qonankama, chaypi tiyakunankupaj, paykunapis Tata Diosniykichej jallp'a qosqanmanta dueño kanankupaj. Chanta qankunaqa jallp'aykichejman kutimpuyta atinkichej, Jordán Mayumanta inti llojsimuynejpi Diospa kamachin Moisés qorqasunkichej chay jallp'ata jap'ikapunaykichejpaj, nispa. 16Chantá paykuna kuticherqanku: –Tukuy nisqaykita ruwasqayku, risqaykutaj, maymanchá kachawasqayku, chayman. 17Imaynatachus Moisesta kasorqayku, ajinallatataj qantapis kasusqaykupuni. Tata Diosniykeqa qanwampuni kachun, imaynatachus Moiseswan karqa, ajinata. 18Pillapis kamachisqaykita mana kasukuyta munajqa, chayrí churanakojqa, wañuchisqa kachun. Qanqa sinch'ita kallpachakuy, waputaj kay, nispa.

will be added

X\