JONÁS 3

1Watejmanta Tata Diosqa kay jinata nerqa: 2Sayarikuspa, rerqoy, jaqay jatun Nínive llajtaman, chaypitaj willamuy, imatachus Noqa nisqayki, chayta, nispa. 3Jonastaj sayariytawan, Niniveman purirerqa, Tata Diospa kamachisqanman jina. Niniveqa jatun llajta karqa; uj kantunmanta uj kantunkamaqa kinsa p'unchay chaki puriy jina karqa. 4Chantá Jonasqa llajtaman yaykorqa uj p'unchay puriyta jina, jatunmanta willaraspa: Kaymanta tawa chunka p'unchayman Nínive llajtaqa chinkachisqa kanqa, nispa. 5Jinapi chay llajtapi tiyakojkunaqa Diospi creerqanku. Chantá kamacherqanku tukuy runas ayunota ruwanankuta, llakiy p'achastataj churakorqanku jatunmanta juch'uykama. 6Jonaspa willasqantaj Nínivej reyninmampis chayarqa. Jinapi payqa kamachina tiyananmanta sayarerqa, p'achasninta lluch'ukuspa, llakiy p'achasta churaykukuytawantaj ushpha patapi tiyakorqa. 7Chantá reyqa, yanapajninkuna ima kurajkunawan tukuy chay llajtapi tiyakojkunata kamacherqanku, kay jinata: Mana pipis mikhunanchu tiyan, nillataj uywaspis mikhunankuchu nitaj ujyanankuchu. 8Manachayqa llakiy p'achasta churakuspa, tukuyniykichej sinch'ita Diosmanta mañakuychej, sapa ujtaj saqeychej sajra kawsayniykichejta, kallpaman atienekuspa tukuy sajrata ruwasharqankichej, chayta. 9Ichapis Dios jinamanta juchasninchejta pampachanman, k'ajaj phiñakuynintaj tiyaykunman, jinamanta mana wañusunchu, nispa. 10Chantá Diosqa sajra ruwayninkuta saqespa allin ñanman kutirikusqankuta rikuspa, mana ruwarqachu imatachus ruwayta yuyasqantaqa.

will be added

X\