JONÁS 2

1Chaypacha Jonasqa challwaj wijsan ukhupi Señornin Tata Diosmanta 2mañakorqa kay jinata: May llakiyniypi qhaparikamorqayki Qanman Tata Diosníy, Qantaj uyariwanki. Ukhu pachamantapacha qhaparikamorqayki, Qantaj uyarimuwarqanki. 3Jatun Qocha ukhuman wijch'uykuwarqanki, yakutaj ukhuman chinkaykuchiwarqa; chay yaku qhollchoqeyay kachamusqayki patayta pasarqa. 4Ñawpaqeykimanta wijch'usqa rikukorqani, yuyarqanitaj manaña santo Temploykita rikunayta. 5Yakusqa p'ampaykuwarqa, qocha laqha ukhumantaj chinkaykorqani; yaku laqhospis umayman mayt'uykukuwarqanku. 6Yakupi chinkaykorqani orqospa pampankama; jallp'aj sonqompi wisq'asqa rikhurerqani wiñaypaj. Qantajrí, Señor Tata Diosníy, kawsayniyta wañuymanta orqhonki. 7Wañusqa jinaña rikukuspa, Qanmanta yuyarikorqayki, mañakususqaytaj Qanman chayamusorqa santo Temploykikama. 8Lantista yupaychajkunaqa Qanmanta qonqaspa wasanchasunku. 9Noqatajrí agradecekuspa, q'olachinapaj uywa wañuchisqasta jaywakusqayki; imatachus qosaj nisusqayta jaywasqayki. Salvasqa kayqa Tata Diosmantamin jamun. 10Chay qhepata Tata Diosqa kamacherqa chay jatun challwaqa yaku kantuman Jonasta lanzarparimunanta.

will be added

X\