JONÁS 1

1Tata Diosqa Amitaípa churin Jonasman nerqa: 2Wakichikuspa, puririy Nínive jatun llajtaman, willamuytaj chay llajtata chinkarparichinayta, imaraykuchus Noqakama chayamuwan tukuy sajra ruwasqasninku, nispa. 3Jonastajrí kasunantaqa, Tata Diospa ñawpaqenmanta ayqeyta munarqa, jinataj Jonasqa Jatun Qocha kantupi Jopeman urayk'orqa. Chaypi uj barcota Tarsisman puririshajtaña tariparqa. Usqhayta pasajeta rantikuspataj, barcoman wicharerqa. 4Jinallapi Tata Diosqa sinch'ita wayrachimorqa. Jatun Qocha chawpitaña rishajtinku, maytapuni para wayraqa yakuta qhollchoqeyachispa, barcotaqa q'opata jina kayman jaqayman apaykacharqa, phirinampaj jina. 5Barcota purichejkunaqa mancharikuywan sapa ujninku diosninkukunaman qhaparikorqanku. Chantá barco chhallayanampaj, cargasta yakuman wijch'uykorqanku. Chaykamataj Jonasqa barcoj ukhun k'uchunman yaykuspa, chaypi sinch'ita puñurparerqa. 6Chantá barcopi kamachejqa jamuspa, Jonasman nerqa: Imanayasunkitaj puñuysiki? Sayariy, Diosniykiman qhaparikuy, ichapis Pay khuyakuwasunman ama wañunanchejpaj, nispa. 7Chantá barcota purichejkunaqa ninakorqanku: Jamuychej, suerteta choqana, ajinamanta yachananchejpaj pichus juchayoj kasqanta kay jinatapuni llakiy jamunawanchejpaj, nispa. Jinataj suerteta choqarqanku, chay suertepitaj Jonasqa juchayoj rikhurerqa. 8Chaymanta Jonasta taporqanku: Kunanqa sut'inta niwayku imaraykuchus kay llakiy jamuwasqanchejta. Imapitaj purishanki? Maymantataj kanki? Maytaj llajtaykiri? Ima ayllumantataj kankiri? nispa. 9Jonastaj kuticherqa: Hebreo kani, Tata Diosta yupaychani, janaj pachapi kaj Diosta, pichus mama qochata, kay pachatapis ruwajta. 10Chantá barcota purichejkunaqa chayta uyarispa, maytapuni mancharikorqanku, nerqankutaj: Imaraykutaj qan jinata ruwankiri? nispa. Paykuna yacharqanku Jonasqa Tata Diosmanta ayqeshasqanta, imaraykuchus chayta payllataj rimarerqa. 11Paykunataj nerqanku: Kunanqa imatataj qanwan ruwasqayku, Jatun Qochaj yakusnin tiyaykunampajri? nispa. Chaykamataj yakoqa astawan astawan oqharikusharqa. 12Chantá Jonasqa paykunaman nerqa: Jatun qochaman wijch'uykuwaychej, para wayrataj thañiponqapacha. Yachani juchayoj kasqayta; chaynejta qankunaman jamusunkichej kay sinch'i para wayraqa. 13Barcota purichejkunatajrí may jinata kallpakuspa, ñawpajman purichiyta munarqanku jallp'aman chayachinankupaj, nitaj aterqankuchu, imaraykuchus Jatun Qocha yakoqa astawan astawan oqharikusharqa. 14Jinaqa Diosmanta mañakorqanku: Tata Dios, ama saqewaykuchu wañojta kay runaj juchanraykoqa. Sichus pay mana juchayoj chayqa, ama juchachawaykuchu wañuyninmanta ari, imaraykuchus Qanqa, Tata Dios imatapis munasqaykiman jina ruwanki. 15Chantá, Jonastaqa jap'iytawan, jatun qochaman payta wijch'uykorqanku, yakutaj chay jinata oqharikushaspapis, ujllata tiyaykorqapacha. 16Chayta rikuspa, barcota purichejkunaqa Tata Diosta maytapuni manchachikorqanku. Chayrayku uywa wañuchisqasta jaywarqanku, nerqankutaj Payta manchachikuspa kawsanankuta. 17Chaykamaqa Tata Dios uj jatun challwata wakicherqa Jonasta oqoykunampaj. Jinamanta Jonasqa chay challwaj wijsampi kinsa p'unchayta, kinsa tutatawan karqa.

will be added

X\