1 Chantá Job parlarispa, nerqa: 2 Cheqamanta noqa yachani, chayqa ajinapuni kasqanta. Chaywampis runaqa Diospa ñawpaqempi manapuni niyta atinchu cheqan runa kasqanta. 3 Sichus pillapis Paywan churanakuyta munanman chayqa, waranqa imasmanta parlaspapis mana ujllapipis atipayta atinmanchu. 4 Diosqa sumaj yachayniyoj, may atiyniyoj, kallpasapataj. Pitataj allin rerqa Diosman sayaykojtinri? 5 Diosqa phiñarikuspa, orqosta kuyurichin, urmachintaj, nitaj pipis chayta reparanchu. 6 Payqa jallp'ata kuyurichin; maypichus sayantasnin kashan, chay tukuyninta kharkatichin. 7 Diosqa kamachin intita mana llojsimunanta, jinallataj ch'askastapis mana lliphipinankuta. 8 Pay sapallan cielota toldota jina aysarqon; mama qochaj phiñarikuyninta thasnun. 9 Pay ruwarqa Cabrilla nisqa ch'askasta, Osa nisqa ch'askasta, Orionta, Pléyades nisqa jatuchaj ch'askasta, uranejpi kajkuna ch'askastawan. 10 Payqa ruwan may chhika jatuchaj imasta, mana unanchay atinasta, may t'ukuna imasta, mana yupay atinasta. 11 Diosqa ñawpaqeyta pasanqa, noqatajrí mana rikusajchu. Pay pasanqa, noqatajrí mana reparasajchu. 12 Sichus imatapis jap'ikapun chayqa, pitaj mañakapuyta atinmanri? Pitaj ninman: Imatataj ruwashanki? nispa. 13 Diospa phiñakuynenqa mana usqhayta tiyaykuyta atinchu. Chakisnin urapi k'umuykachanku pikunachus machu machusta yanapajkunaqa. 14 Imaynatataj noqa simi nisqasta tarisaj, Dioswan churanakunaypajri? 15 Mana juchayoj kayman chaypis, noqaqa mana kutichiyta atiymanchu. Pay juzgawajtin, Paymanta khuyakunallawanta mañakuyman. 16 Sichus Payta wajyakojtiy, Pay kutichimuwanman chayqa, mana creeymanchu parlasqayta kasuta ruwananta. 17 Payqa astawan castigaykuwanman uj loco parawan, astawantaj nanaykuchiwanman mana imallamanta. 18 Astawan sinch'ita llakichiwanman; ni samarikojllatapis saqewanmanchu. 19 Sichus atiyninmanta parlasunman chayqa, cheqamanta Payqa sinch'i atiyniyoj. Sichus pleitoman wajyachisunman chayqa, pitaj Payta chayachimunmanri? 20 Sichus noqa niyman cheqampi kasqayta chayqa, simillaytaj juchachaykuwanman. Sichus manapuni juchayoj kayman chaypis, Payqa niwanman juchayojpuni kasqayta. 21 Cheqamanta noqaqa allinchu kani? Noqa kikiy mana yachakunichu. Kawsayniytapis pisipaj qhawani. 22 Tukuy imaqa uj rejlla. Chayllata noqaqa yuyani. Juchayojta mana juchayojta Payqa ujllapi tukuchin. 23 Sichus mana juchayoj runas mana yuyasqallamanta ima pasajtin wañunku chayqa, Diosqa asikullan mana imanakuyta atisqankumanta. 24 Kay pachataqa juchasapaspa makinkuman churan, juezkunaj ñawisninkutataj tapaykun. Sichus chayta mana Dioschu ruwan chayqa, pitaj chantari? 25 Watasneyqa imata jina pasarparin, kusiy kawsay imachus kasqanta mana rikuspalla. 26 Watasneyqa ripushan usqhayta purej bote jina, anka imatapis jap'ej kachaykukun, ajinata. 27 Sichus tukuy llakiyniyta qonqayta munani, sitajchus kusisqapis kayman jinaman tukuyman chayqa, 28 tukuy nanayniy watejmanta mancharichiwan. Ajinamanta yachani Diosqa mana juchayoj kasqayta mana creewasqanta. 29 Sichus Dios yuyan noqa juchayoj kasqayta chayqa, imapajtaj imatapis ruwasajri? 30 Ushpha yakuswan mayllakuyman; jabonwampis makisniyta mayllakuyman. 31 Chaywampis Diosqa t'uruman chinkaykuchiwanqa, p'achaynintin noqamanta millachikuwanqa. 32 Dioswanqa mana uyanchanakuymanchu uj runawan jinaqa, nitaj niyta atiymanchu: Jaku, iskayninchej rinachej justicia wasiman, nispa. 33 Manachu kanman uj jamach'aj noqayku chawpipi sayanampaj, iskayniykoj pataykupi makisninta churanampaj? 34 Amaña chay jamach'aj saqechunchu, Diosqa castiganallawantapuni, amaña astawan manchachiyninwan manchachinawampaj. 35 Chaypacha noqapis parlariyman Payta mana manchachikuspa, imaraykuchus noqamantaqa mana jinachu kani.
